Tara ti bâ ye so: David ayeke kpe na oto na mbeni ndo so lo hinga ni ape. Apanneau nga na aye so lo bâ afa so ndo so lo ye ti gue dä so la ape. David aga ti bâ so lo girisa lege awe. Na yâ ti tambela ti lo ni lo mû mbeni lege so lo doit fade ti mû ni ape.

Tongana mo yeke David, nyen la mo yeke sara?

Mo yeke na aye mingi ti sara:

1. Hunda mbeni zo.

2. Bâ mbeni carte wala sara kua na GPS.

3. Ngbâ ti kpe na oto ni, peut-être mo yeke tï na ndo ti lege so mo ye ti mû.

Ti vrai ni, ye so ayeke na C ayeke aidé mo kue ape.

Ye so ayeke na B ayeke nzoni ahon ye so ayeke na A. Kozoni kue, mbeni carte wala GPS ayeke ngbâ na tere ti mo na yâ ti voyage ni kue, ti aidé mo ti wara lege so mo ye ti mû.

Bible ayeke mû maboko na mo nga tongaso.

Buku so, so azo mingi ayeke na ni so apeut:

• ti fa lege na mo na yâ ti akpale so mo yeke wara na yâ ti gigi ti mo

• ti aidé mo ti hinga mo wani nga ti ga mbeni nzoni zo

• ti fa na mo tongana nyen ti duti na fini so ayeke tâ pendere mingi

Gi na ngoi so e komanse ti sara tënë, e yeke hunda tere ti e na atënë so.

• Zo wa la asara yayu zo wa?

• A sara atongoro tongana nyen?

Na pekoni, e yeke hunda tënë na ndo ti aye so angoro e.

• Asioni ye ayeke si ngbanga ti nyen?

• Azo ayeke kui ngbanga ti nyen?

Hinga ape akiringo tënë ni ayeke depuis na yâ ti Bible.

Ambeni zo atene so atënë ti tere na ti pande asi singo na yâ ti Bible, ambeni atene so Bible aga ngbene ye awe wala so atënë ti yâ ni akpengba mingi. Me Bible la ayeke biani kpale ni, wala pensé ti azo na ndo ti Bible la ayeke kpale ni? Azo la aba yâ ti tënë ni ape?

Na tapande, azo apensé so Bible atene dunia ayeke na maboko ti Nzapa. Me apeut ti duti tongaso tongana nyen? A gbu azo ti dunia ti laso gbä. Dunia ni asi singo na vundu, pasi, kobela, kuâ, yere nga na aye ti ngangu. Mbeni Nzapa so aye azo alingbi ti duti na gunda ti aye so kue tongana nyen?

Mo ye ti hinga kiringo tënë ni? Li ti mo ayeke kpe ti hinga ye so Bible atene na ndo ti zo so akomande dunia so.

Tongana ti so mo bâ, awango so ayeke na yâ ti brochure so alondo na yâ ti Bible. A-Témoin ti Jéhovah ahinga na bê ti ala kue so zo apeut ti zia bê ti lo kue na ndo ti Bible ti fa lege na lo. A yeke tongaso ndali ti so Bible ayeke buku so “a sara ni na mbeti na gbe ti yingo ti Nzapa, na a yeke nzoni ti fa na ye na zo, ti suku na zo, ti kiri na aye na nzoni lege.” (2 Timothée 3:16, 17). A lingbi mo wani mo manda buku so, so a sû ni giriri me so atënë ti yâ ni angbâ na ngangu juska laso.