Ngbanga ti nyen la Satan na adémon ti lo ayeke sara kue ti handa azo? A yeke ngbanga ti so ala ye si e mû peko ti ala ti sara kpengba-li na Nzapa. Ala ye si e voro ala. Ala ye si e mä na bê na amvene ti ala tongaso si e sara aye so anzere na bê ti Jéhovah ape. Mingi ti aye ni andu acoutume na ndö ti akuâ.

Tongana mbeni zo so e ndoye lo akui ayeke sara e vundu mingi, na a yeke na lege ni ti fa vundu ni so na gigi. “Ngu ti lê ti Jésus ayuru” ndali ti so kamarade ti lo, Lazare akui lani.—Jean 11:35.

Na yâ ti dunia kue, acoutume so andu tënë ti akuâ ayeke mingi nga ayeke nde nde. Mingi ti acoutume ni Bible ake ni ape. Me ti ambeni coutume ni aluti na ndö ti tënë so a tene akuâ angbâ na fini na ala peut ti bâ azo so ayeke na fini. Azo ayeke sara mbeto ti son bê ti azo so akui, ni la ala yeke lango na place ti kuâ, ala yeke sara mua ahon ndö ni nga ala yeke leke akota matanga ti lungo kuâ. Me so akuâ “ahinga ti ala ye oko pëpe”, azo so ayeke sara aye tongaso ayeke sara si mvene so Satan atene na ndö ti akuâ amû ndo.—Zo-ti-fa-tene 9:5.

Ti ambeni coutume ni azo ayeke sara ni ndali ti so ala yeda so  akuâ abezoin aide ti azo so angbâ na fini nga ala yeke sara sioni na azo ni tongana ala dë bê ti ala ape. Na yâ ti ambeni kodro, lango 40 na peko ti kuâ ti zo ni azo ayeke sara mbeni matanga nga ala yeke sara asandaga. Ala tene so matanga ni so ayeke ti aidé zo ni so akui so ti gue na ndo ti ayingo. Mbeni coutume ni nde ayeke ti mû kobe na sämba na azo ni so akui so.

Aye so ayeke sioni ndali ti so ayeke sara si mvene so Satan atene na ndö ti akuâ amû ndo. Eskê a yeke nzere na Jéhovah tongana e mû mbage na acoutume so alondo na afango ye ti adémon? Ên-ën.—2 aCorinthien 6:14-18.

Awakua ti tâ Nzapa ayeke mû mbage ape na asarango ye so ayeda na amvene ti Satan. Me, na ndoye, ala yeke gi ti aidé azo so angbâ na fini na ti dë bê ti ala. Ala hinga so gï Jéhovah oko la apeut ti aidé mbeni zo so akui.—Job 14:14, 15.

Ambeni zo ayeke na songo na adémon ala wani wala ala sara songo na ala na lege ti mbeni zo ti sarango tënë na yingo ti akuâ. A iri ye so sarango yorö. Alege ti sarango yorö ayeke mingi, mo yeke wara vaudou, likundu, magie, bingo zeke na sarango tënë na akuâ.

Bible afâ ngbanga na ndö ti aye ni so, a tene: “A lingbi a wara na popo ti ala pëpe . . . zo ti bango mbadi, wala zo ti sarango magie, wala zo ti fango ye so ayeke si kekereke, wala zo ti yorö, wala zo ti kangango amba ti lo na yorö, wala zo so ague abâ zo ti sarango tënë na yingo ti akuâ, wala zo so ague abâ zo ti fango aye so ayeke si ande na zo, wala zo so ayeke hunda tënë na akuâ. Zo so asara aye so, lo yeke sioni mingi na lê ti Jéhovah.”—Deutéronome 18:10-12.

Ngbanga ti nyen la Jéhovah agboto mê ti e ngangu tongaso?

 A yeke ndali ti nzoni ti e la si Jéhovah agboto mê ti e ti sara hange na sarango yorö. Lo ndoye e azo na lo pensé na e, lo hinga so azo so ayeke na songo na adémon ayeke bâ pasi.

Mbeni zo ni ayeke Nilda, so ayeke mbeni zo ti sarango tënë na yingo ti akuâ na Brésil. Adémon abuba gigi ti lo. Lo tene: “Mbi . . . yeke na gbe ti ngangu ti ayingo, ala la ayeke fa na mbi ye so mbi doit ti sara. Na mbeni ngoi mbi évanouir na mbeni ngoi mbi yeke bien, na a gbanzi mbi na hôpital ndali ti kobela ti li. Adémon ayeke sara ye ti ngangu na mbi mingi asara si mbi wara akpale ti nerf. Mbi yeke nyon yorö si mbi duti nzoni kete nga mbi komanse ti nyon sämba na manga lakue lakue. Ye so asara angu mingi.”

Na pekoni, grâce na aide ti Jéhovah na ti aTémoin ti lo, Nilda asigi na gbe ti ngangu ti adémon, laso, gigi ti lo aga nzoni mingi. Lo tene: “Mbi encouragé azo kue ti sara songo na adémon ape, même gï teti kete ngoi.”