Daouda, so ayeke na Sierra Leone, atene: “Mbi kono na yâ ti mbeni kete kodro na mbage ti Nord. Na temps so mbi ngbâ kete, sewa ti mbi na mbeni sewa apapa ndali ti sese. Ala kue atene sese ni ayeke ti ala. Ti leke tënë ni, a iri mbeni zo ti nganga. Zo ti nganga ni aga, lo mû tatara na mbeni koli na lo bi vuru bongo na ndö ti koli ni. Mo ye ti bâ, koli ni so ayeke na gbe ti bongo ni so akomanse ti dö nga gbiki ayeke sigi na terê ti lo. Na temps so lo bâ ndo na yâ ti tatara ni, lo dekongo, lo tene: ‘Mbi bâ mbeni âta-koli ayeke ga! Lo yü vuru bongo. Lo kono nga lo yeke mbakoro, kuä ti li ti lo avuru, na lo tambela lo ba bango.’

“Zo so lo yeke sara tënë ti lo so ayeke âta ti e ti koli la! Na pekoni lo sara ye na ngangu na lo dekongo, lo tene: ‘Tongana ala mä na bê na tënë ti mbi ni ape, ala ga ala bâ na lê ti ala wani!’ Ti vrai ni, zo ti mû courage ti gue ti bâ ni ayeke dä ape! Zo ti nganga ni amû mbeni ngu ti yorö so ayeke na yâ ti mbeni kangu lo fi ni na terê ti koli ni na koli ni aduti kpô.

“Na lege ti koli so agbu tatara ni so, ‘âta-koli’ atene so sese ni ayeke ti sewa ti e. Lo tene na âta-wali so lo peut ti sara kua na ndö ti sese ni so senge. Mbeni sewa ni so ayeda na ni, na tënë ni ahunzi.”

 Mara ti ambaï tongaso ayeke mingi na mbage ti ouest ti Afrique. Na yâ ti akodro ni so nga na ambeni ndo, azo kutu mingi amä na bê so azo so akui awe ayeke gue na ndo ti ayingo, na ala peut ti bâ azo so ayeke na ndö ti sese nga ti pusu ala ti sara ambeni ye. Tënë so ayeke vrai? Eskê akuâ angbâ na fini? Tongana ala ayeke na fini ape, ka azo wa la aye ti fa so ala yeke azo so akui so? A yeke kota ye ti wara atâ kiringo tënë na ahundango tënë so. A yeke mbeni tënë so andu fini ti e.