A yeke na e ti soro mbeni ye. Ti soro ti voro Jéhovah, wala Satan na adémon ti lo. E peut ti voro ala use kue ape. Me a yeke na lege ti ndara ti voro Jéhovah!

Tongana ti so e bâ awe, a nzere na adémon ti sara sioni na azo nga ti handa ala. Jéhovah ayeke tongaso ape. Lo ye azo tongana ti so mbeni babâ aye amolenge ti lo. Lo yeke lo so amû “nzoni matabisi kue nga na matabisi kue so ayeke mbilimbili-kue”. (Jacques 1:17). Lo gbanzi nzoni ye na azo ape, atâa so ti sara ni a hunda na lo aye mingi.—aÉphésien 2:4-7.

Bâ gï aye so Jésus, Molenge ti Nzapa, asara lani na ndö ti sese. Lo sara si awabuburu asara tënë, lo zi lê ti awaziba. Lo sava azo ti buruma nga na azo so gere ti ala abuba. Lo tomba adémon na yâ ti azo nga lo kaï mara ti akobela nde nde kue. Na lege ti ngangu ti Nzapa, lo zingo akuâ.—Matthieu 9:32-35; 15:30, 31; Luc 7:11-15.

Ahon ti tene Nzapa atene mvene ti handa na e, lo yeke tene lakue gï tâ tënë. Lo handa zo lâ oko ape.—Nombre 23:19.

Legeoko tongana ti so kamba ti tere ayeke gbu angungu, ambeni tënë so ayeke tâ tënë ape so azo ayeke croire na ni na ambaï ti mvene agbu nga azo kutu mingi na ngbâa. Ala sara mbeto ti azo so akui. Ala sara mbeto ti adémon. Ala sara mbeto ti atënë ti deba nga na ti aye so apeut ti si na ala kekereke. Nga ala yeke yü lakue awaraga na ala yeke sara yorö ndali ti so ala sara mbeto ti wara akpale. Ala ga ngbâa ti atënë nga na angobo ti akotara so alondo na amvene ti Satan Zabolo. Awakua ti Nzapa atï na yâ ti mbeni oko ti akûkû so ape.

Jéhovah ayeke na ngangu mingi ahon Satan. Tongana mo voro Jéhovah, lo yeke bata mo si adémon asara ye na mo ape (Jacques 4:7). Aye ti yorö ayeke sara ye oko na mo ape. Na tapande, na Nigéria, ambeni zo ti nganga ota so ayeke ngangu mingi airi kuâ na ndö ti mbeni Témoin ti Jéhovah so aye ape ti quitté kodro ni ti hon. Tongana ala bâ so yorö ti ala ni asara ye oko na lo ape, mbeto agbu mbeni oko ti anganga ni na lo gue lo bâ Témoin ni lo voro yanga na lo ti pardonné lo.

Tongana adémon ayeke sara mo pasi, mo peut ti di iri ti Jéhovah na lo yeke bata mo (aProverbe 18:10). Me, ti tene Nzapa abata mo, mo doit ti zi aye kue so andu sarango yorö nga na vorongo adémon. A yeke ye so ambeni zo so avoro Nzapa asara ândö na Éphèse. Ala bungbi ambeti ti ala kue ti magie na ala zö ni (Kusala 19:19, 20). Laso, awakua  ti Nzapa adoit ti sara nga tongaso. Ni la, bi ayorö, akamba “ti batango na terê”, awaraga, ambeti ti magie na aye kue so andu sarango yorö.

Tongana mo ye ti nzere na lê ti Nzapa, a hunda ape gï ti ke lege ti vorongo nzapa ti wataka, na ti zia ti sara asioni ye. Mo doit ti voro Nzapa na lege ni. Bible afa ye so mo doit ti sara ni:

Satan na adémon ti lo ayeke na azo ge na ndö ti sese so ayeke fa na azo aye ti sioni nga ala wani ayeke sara aye ti sioni. Me, Jéhovah nga ayeke na awakua ti lo. A yeke aTémoin ti Jéhovah (Ésaïe 43:10). Na ndö ti sese kue, wungo ti ala ahon kutu miombe. Ala kue ayeke sara ngangu ti sara ye ti nzoni na ti fa tâ tënë na azo. Na yâ ti akodro mingi, mo peut ti wara ala na Da ti Royaume ti ala, kâ ala yeke na ngia ti yamba mo.

Kua ti ala ayeke ti aidé amba ti ala ti voro Nzapa. Ala yeke manda Bible na mo na ndo ti mo, ala yeke aidé mo ti hinga tongana nyen ti voro Jéhovah na lege ni. Mo yeke payé ala ape. A-Témoin ayeke na ngia ti fa tâ tënë na azo ngbanga ti so ala ye amba ti ala nga ala ndoye Jéhovah Nzapa.