1, 2. Ngbanga ti nyen la mo pensé so sambela ayeke mbeni cadeau so ayeke tâ nde? Ngbanga ti nyen la a lingbi e hinga ye so Bible afa na ndö ti sambela?

TONGANA a haka sese na tanga ti aye so ayeke na yâ ti dunia, sese ayeke tâ kete mingi. Tongana Jéhovah abâ ndo na sese, azo ti amara kue ayeke tongana kete goutte oko ti ngu na yâ ti mbeni sceau (Psaume 115:15; Ésaïe 40:15). Atâa so e yeke kete mingi tongana a haka e na tanga ti aye so ayeke na yâ ti dunia, Psaume 145:18, 19 atene: “Jéhovah ayeke nduru na azo kue so ayeke iri lo, azo kue so ayeke iri lo na bê ti ala kue. Lo mû na azo so akpe mbeto ti lo aye so ala sara nzara ni; lo mä toto so ala toto na lo ti mû maboko na ala, na lo zi ala.” So tâ kota pasa si e yeke na ni! Jéhovah, so ayeke Zo so asara aye kue so ngangu ti lo ahon angangu kue, aye ti duti nduru na e nga lo ye ti mä asambela ti e. Sambela ayeke mbeni pasa, mbeni matabisi so ayeke nde so Jéhovah amû na e oko oko kue.

² Me Jéhovah ayeke mä sambela ti e gï tongana e sambela lo na lege so anzere na lo. E lingbi ti sara ni tongana nyen? Zia e bâ tënë so Bible atene na ndö ti sambela.

3. A lingbi mo sambela Jéhovah ngbanga ti nyen?

³ Jéhovah aye ti tene mo sambela lo, wala mo sara tënë na lo. E hinga ni tongana nyen? Diko aPhilippien 4:6, 7. Gbu li ti mo na ndö ti tisango ndo so. Gbia ti dunia kue ayeke pensé mingi na mo na lo ye ti tene mo fa na lo atënë ti bê ti mo nga na akpale ti mo.

4. Ti sambela Jéhovah lakue ayeke kpengba songo ti mo na lo tongana nyen?

 ⁴ Sambela ayeke mû maboko na e ti lë kpengba songo na Jéhovah. Tongana akamarade ayeke sara lisoro lakue na mba na ndö ti apensé ti ala, agingo bê ti ala nga na atënë ti bê ti ala, songo ti ala ayeke kpengba mingi. Ti sambela Jéhovah ayeke nga tongaso. Na lege ti Bible, lo fa na mo apensé ti lo na atënë ti bê ti lo, nga lo fa na mo ye so lo yeke sara ande na yâ ti ngoi so ayeke ga. Mo lingbi ti fa na lo atënë ti gbe ti bê ti mo tongana mo yeke sara tënë na lo lakue. Tongana mo sara ni, songo ti mo na Jéhovah ayeke kpengba mingi ahon ti kozo.—Jacques 4:8.

5. E hinga tongana nyen so Jéhovah ayeke mä asambela kue ape?

⁵ Jéhovah ayeke mä asambela kue? Ên-ën. Na ngoi ti prophète Ésaïe, Jéhovah atene na azo ti Israël, lo tene: “Même tongana ala sambela gbani, mbi yeke mä pëpe; maboko ti ala asi singo na mênë.” (Ésaïe 1:15). Tongaso,  tongana e sara hange pëpe, e lingbi ti sara mbeni ye so ayeke gue na e yongoro na Jéhovah, na a yeke sara si lo mä asambela ti e pëpe.

6. Ngbanga ti nyen la mabe ayeke kota ye? Tongana nyen la mo yeke fa so mo yeke na mabe?

⁶ Tongana e ye ti tene Nzapa amä sambela ti e, a lingbi e mä na bê na lo (Marc 11:24). Bazengele Paul atene: “Tongana mabe ayeke dä pëpe zo alingbi ti nzere na lê ti Nzapa pëpe, ndali ti so zo so aga nduru na Nzapa a lingbi lo mä na bê so Nzapa ayeke dä nga so Nzapa ayeke zo so ayeke futa azo so ayeke gi lo ngangu.” (aHébreu 11:6). Gï ti tene so e mä na bê awe alingbi pëpe. A lingbi e fa mabe ti e ni polele na mango yanga ti Jéhovah lâ na lâ.—Diko Jacques 2:26.

7. (a) Ngbanga ti nyen la a lingbi e sara terê ti e kete nga e ne Jéhovah na ngoi so e yeke sambela lo? (b) Tongana nyen la e lingbi ti fa so atënë so e tene na Jéhovah na yâ ti sambela alondo na bê ti e?

⁷ Na ngoi so e yeke sambela Jéhovah, a lingbi e sara terê ti e kete nga e ne lo. Ngbanga ti nyen? Tongana e ye ti sara tënë na mbeni gbia wala mbeni président, e yeke sara ni na mbeni lege so ane zo. Jéhovah ayeke Nzapa so ngangu ti lo ahon angangu kue, tongaso, a lingbi e ne lo mingi nga e sara terê ti e kete na ngoi so e yeke sara tënë na lo (Genèse 17:1; Psaume 138:6). A lingbi nga e fa so atënë so e yeke tene na lo alondo tâ na bê ti e, me e yeke kiri gï pëpe na ndö ti a-oko tënë fani mingi.—Matthieu 6:7, 8.

8. Tongana e sambela ndali ti mbeni ye, nyen la a lingbi e sara nga?

⁸ Na nda ni, tongana e sambela ndali ti mbeni ye, a lingbi e sara kue ti wara ye so e sambela ndali ni. Na tapande, tongana e sambela Jéhovah ndali ti aye so e bezoin ni lâ oko oko, a lingbi e kanga maboko ti e pëpe e ku ti tene Jéhovah amû na e ye kue atâa so e lingbi ti sara kua ti wara ni. A lingbi e sara kua ngangu nga e yeda ti sara kua  kue so e lingbi ti sara (Matthieu 6:11; 2 aThessalonicien 3:10). Wala tongana e sambela Jéhovah ti mû maboko na e ti zia lege ti sarango mbeni ye ti sioni, a lingbi e kpe ye kue so alingbi ti sara si e tï na yâ ni (aColossien 3:5). Zia e bâ ambeni tënë so azo ayeke hunda ka na ndö ti sambela.

9. A lingbi e sambela zo wa? Jean 14:6 afa na e nyen na ndö ti sambela?

⁹ A lingbi e sambela zo wa? Jésus afa lani na adisciple ti lo ti sambela “Babâ ti e so [a]yeke na yayu”. (Matthieu 6:9). Lo tene nga: “Mbi yeke lege ni, tâ tënë na fini. Zo oko alingbi ti ga na Babâ na mbeni lege nde pëpe, gï na lege ti mbi.” (Jean 14:6). Tongaso, a lingbi e sambela Jéhovah na lege ti Jésus. Ti sambela na lege ti Jésus aye ti tene nyen? Ti tene Jéhovah amä asambela ti e, a lingbi e fa so e bâ na nene ni kua so ayeke nde so Jéhovah amû na Jésus. Tongana ti so e manda awe, Jésus aga lani na sese ti zi e na gbe ti siokpari na kuâ (Jean 3:16; aRomain 5:12). Jéhovah azia nga Jésus Kota Prêtre nga na Juge.—Jean 5:22; aHébreu 6:20.

10. Na ngoi so e yeke sambela, mbeni mbilimbili fason ti dutingo ni ayeke dä? Ngbanga ti nyen?

¹⁰ Na ngoi so e yeke sambela, mbeni mbilimbili fason ti dutingo ni ayeke dä? Ên-ën, Jéhovah ahunda na e pëpe ti sara agenou, ti duti wala ti luti na nduzu na ngoi so e yeke sambela. Bible afa so tongana e duti na mbeni fason so ane Jéhovah, e lingbi ti sara tënë na lo (1 Chronique 17:16; Néhémie 8:6; Daniel 6:10; Marc 11:25). Ye so ayeke kota mingi na lê ti Jéhovah ayeke pëpe fason so e duti na ni, me ti duti na nzoni bango ndo na ngoi so e yeke sambela lo. E lingbi ti sambela na kota go wala na yâ ti bê ti e na ndo kue so e  yeke dä nga na ngoi kue na bï wala na kota lâ. Tongana e sambela Jéhovah, e yeke na confiance so lo yeke mä e même tongana mbeni zo amä e pëpe.—Néhémie 2:1-6.

11. Ambeni ye wa la e lingbi ti sara tënë ni na Jéhovah?

¹¹ E lingbi ti sambela ndali ti aye wa? E lingbi ti sambela Jéhovah ndali ti ye kue so anzere na lo. Bible atene: “Atâa ye wa la e hunda, tongana a gue oko na ye so bê ti lo aye, lo yeke mä e.” (1 Jean 5:14). E lingbi ti sambela ndali ti aye so abâ e wani? En. A yeke nzoni sambela so e tene na Jéhovah aduti tongana lisoro so e yeke sara na mbeni kamarade ti e so e ye lo mingi. E lingbi ti tene na Jéhovah atënë kue so ayeke na yâ ti li ti e nga na bê ti e (Psaume 62:8). E lingbi ti sambela lo ti mû na e yingo vulu ti lo so ayeke ngangu mingi ti mû maboko na e ti sara ye so ayeke nzoni (Luc 11:13). E lingbi nga ti hunda Jéhovah ti mû na e ndara ti mû anzoni desizion, nga e lingbi ti sambela ti wara ngangu ti hon ndö ti akpale (Jacques 1:5). A yeke nzoni e hunda na Jéhovah ti pardonné asiokpari ti e (aÉphésien 1:3, 7). A yeke nzoni e sambela nga ndali ti ambeni zo, na tapande sewa ti e nga na aita ti congrégation.—Kusala 12:5; aColossien 4:12.

12. Nyen la a lingbi aduti kota ye na yâ ti asambela ti e?

¹² Nyen la a lingbi aduti kota ye na yâ ti asambela ti e? Jéhovah nga na ye so bê ti lo aye. A yeke nzoni e kiri singila na lo na bê ti e kue ndali ti aye kue so lo sara ndali ti e (1 Chronique 29:10-13). E hinga ni ndali ti so na ngoi so Jésus ayeke lani na sese, lo fa na adisciple tongana nyen ti sambela. (Diko Matthieu 6:9-13.) Lo tene na ala so a yeke nzoni ala sambela kozoni kue ti tene iri ti Nzapa aga nzoni-kue. Na pekoni, Jésus afa so a yeke nzoni e sambela ti tene Royaume ti Nzapa aga nga ti tene a sara na ndö ti sese kue ye so bê ti Nzapa aye. Jésus atene so a yeke gï tongana e sambela ndali ti akota ye so awe si na pekoni e lingbi ti  sambela ndali ti abezoin ti e wani. Tongana e zia Jéhovah nga na ye so bê ti lo aye kozo na yâ ti asambela ti e, e yeke fa ye so ayeke kota na lê ti e.

13. A yeke nzoni asambela ti e ayo tongana nyen?

¹³ A yeke nzoni asambela ti e ayo tongana nyen? Bible afa ni pëpe. Asambela ti e alingbi ti duti nduru wala ayo alingbi na ye so e sambela ndali ni. Na tapande, e lingbi ti tene mbeni nduru sambela kozo ti te ye me e lingbi ti sambela ayo na ngoi so e yeke kiri singila na Jéhovah wala e  yeke fa na lo agingo bê ti e (1 Samuel 1:12, 15). E bezoin ti tene yongoro sambela gï ti pika bê ti amba ti e pëpe, tongana ti so ambeni zo ayeke sara lani na ngoi ti Jésus (Luc 20:46, 47). Asambela tongaso ayeke pika ti lo bê ti Jéhovah pëpe. Ye so ayeke kota na lê ti Jéhovah ayeke sambela so alondo na bê ti e.

14. A lingbi e sambela fani oke? Ye so afa na e nyen na ndö ti Jéhovah?

¹⁴ A lingbi e sambela fani oke? Jéhovah ahunda na e ti sara tënë na lo lakue. Bible atene so a yeke nzoni e “ngbâ ti sambela lakue”. (Matthieu 26:41; aRomain 12:12; 1 aThessalonicien 5:17). Jéhovah ayeke lakue nduru ti mä e. E lingbi ti kiri singila na lo lâ na lâ ndali ti ndoye ti lo nga ndali ti aye so lo mû na e. E lingbi ti hunda lo ti fa lege na e, ti mû ngangu na e nga ti dë bê ti e. Tongana e bâ biani na  nene ni pasa so e yeke na ni ti sambela Jéhovah, e yeke sara tënë na lo na ngoi kue so lege azi na e.

15. A lingbi e tene “amen” na hunzingo ti sambela ngbanga ti nyen?

¹⁵ A lingbi e tene “amen” na hunzingo ti sambela ngbanga ti nyen? Tënë “amen” aye ti tene “biani” wala “zia a duti tongaso.” A yeke mbeni fason ti tene so tënë so e tene na yâ ti sambela ti e alondo na bê ti e (Psaume 41:13). Bible afa na e so a yeke nga nzoni ti tene “amen,” atâa na kota go wala na yâ ti bê ti e, na hunzingo ti sambela so a tene na devant ti gbâ ti azo ti fa so e yeda na tënë so a tene.—1 Chronique 16:36; 1 aCorinthien 14:16.

16. Jéhovah ayeke kiri tënë biani na asambela ti e? Nyen la afa ni?

¹⁶ Jéhovah ayeke kiri tënë biani na asambela ti e? En, lo yeke sara ni. Bible atene lo yeke ‘lo so ayeke mä sambela’. (Psaume 65:2). Jéhovah ayeke mä asambela so azo kutu mingi ayeke tene na bê ti ala kue na lo nga lo yeke kiri tënë na ni, na lo yeke sara ni na alege nde nde.

17. Tongana nyen la Jéhovah ayeke sara kua na a-ange nga na awakua ti lo ti kiri tënë na asambela ti e?

¹⁷ Jéhovah ayeke sara kua na a-ange nga na awakua ti lo na ndö ti sese ti kiri tënë na asambela ti e (aHébreu 1:13, 14). E yeke na atapande ti azo mingi so asambela ti tene a mû maboko na ala ti mä yâ ti Bible, ngoi kete na pekoni mbeni Témoin ti Jéhovah aga na ndo ti ala. Bible afa so a-ange ayeke mû mbage na kua ti fango “nzoni tënë” na ndö ti sese kue. (Diko Apocalypse 14:6.) Nga, mingi ti e asambela Jéhovah ndali ti mbeni mbilimbili kpale wala mbeni mbilimbili bezoin, na pekoni e wara mungo maboko so e yeke fade na bezoin ni na mbage ti mbeni ita.—aProverbe 12:25; Jacques 2:16.

18. Tongana nyen la Jéhovah ayeke sara kua na yingo ti lo nga na Bible ti kiri tënë na asambela?

 ¹⁸ Jéhovah ayeke sara kua na yingo ti lo ti kiri tënë na asambela ti e. Tongana e sambela ti wara mungo maboko ti hon ndö ti mbeni kpale, lo lingbi ti sara kua na yingo vulu ti lo ti fa lege na e nga ti kpengba e (2 aCorinthien 4:7). Jéhovah ayeke sara nga kua na Bible ti kiri tënë na asambela ti e nga ti mû maboko na e ti mû anzoni desizion. Na ngoi so e diko Bible, e lingbi ti wara mbeni versê so ayeke mû maboko na e. Jéhovah alingbi ti pusu mbeni ita ti mû commentaire so e yeke na bezoin ni na ngoi ti bungbi wala lo lingbi ti pusu mbeni ancien ti fa na e mbeni ye na yâ ti Bible.—aGalate 6:1.

19. Ngbanga ti nyen la na ambeni ngoi e bâ so Jéhovah akiri tënë na asambela ti e ape?

¹⁹ Na ambeni ngoi, e lingbi ti hunda terê ti e: ‘Ngbanga ti nyen la ade Jéhovah akiri tënë na ambeni sambela ti mbi pëpe?’ Girisa ape so lo hinga lawa nga tongana nyen la lo lingbi ti kiri tënë na asambela ti e. Lo hinga bezoin ti e. Peut-être a lingbi e ngbâ ti sambela teti mbeni ngoi ti fa so ye so e hunda na lo agbu bê ti e mingi nga ti fa na lo so e yeke biani na mabe na lo (Luc 11:5-10). Na ambeni ngoi Jéhovah ayeke kiri tënë na asambela ti e na mbeni lege so e ku terê ti e na ni pëpe. Na tapande, e lingbi ti sambela ndali ti mbeni ye so ayeke ngangu, me ahon ti tene lo zi kpale ni, lo lingbi ti mû na e ngangu ti gbu ngangu na yâ ti kpale ni.—Diko aPhilippien 4:13.

20. Ngbanga ti nyen la a lingbi e sambela Jéhovah fani mingi?

²⁰ E bâ na nene ni mingi pasa so e yeke na ni ti sambela Jéhovah. E yeke na confiance so lo yeke mä e (Psaume 145:18). Tongana e sambela Jéhovah na bê ti e kue fani mingi, songo ti e na lo ayeke kpengba mingi.