1-6. Fa alege nde nde so aTémoin ayeke fa na tënë.

 NA GHANA, Rebecca, mbeni maseka so ayeke Témoin ti Jéhovah, amû lani ekole tongana territoire ti fango tënë ti lo. Lakue ambeti ayeke lani na yâ ti bozo ti lo. Na ngoi ti wungo terê, lo yeke gi lani ti fa tënë na amba ti lo élève. Rebecca ayeke manda Bible na gbâ ti amba ti lo ni.

² Na Madagascar, so ayeke na yanga ti ngu na est ti Afrika, atâa so lâ ayeke su mingi, lakue apionnier use ayeke tambela kilomètre 25 ti gue na mbeni kete kodro. Kâ, ala yeke manda lani Bible na azo so tënë ni anzere na ala.

³ Ti wara lege ti fa tënë na azo so ayeke na terê ti kota ngu ti Paraguay nga na Paraná, aTémoin ti Jéhovah ti kodro ti Paraguay nga na ambeni so alondo na akodro 15 aleke mbeni bateau. Azo 12 apeut ti vivre na yâ ti bateau ni. Ni la a mû lege na awafango tënë so ayapu so ti fa nzoni tënë na ando ni so, so a yeke ngangu fade ti tene a gue a fa tënë dä.

⁴ Na Alaska, so ayeke na Amerika, aTémoin ti Jéhovah ayeke lakue nduru ti fa tënë na ngoi so atouriste ayeke gue kâ. Na ngoi ni so, so lâ ayeke su pendere, abateau ayeke gue na gbâ ti agene so alondo na akodro nde nde; aita ti kâ ague na port ni na ala tanda gbâ ti ambeti na ayanga ti kodro nde nde. Nga, mbeni avion ayeke mû lani maboko mingi na aita ni kâ ti gue na akete kodro so ayo ti fa nzoni tënë na azo so ayeke tene yanga ti Aléoute, Athabascan, Tsimshian nga na Tlingit.

⁵ Na Texas, so ayeke na Amerika, Ita Larry ayeke na territoire ti lo: ndo ti batango ambakoro so lo yeke lango dä. Mbeni accident asara si lo yeke gï na yâ ti puse ti azo so ayeke na kpale ti seni; atâa so kue lo duti gï tongaso pëpe. Me lo yeke fa tënë ti Royaume na amba ti lo. Lo yeke fa nga na ala so Bible afa so ande na gbe ti Royaume ni, lo yeke kiri ti tambela.—És. 35:5, 6.

⁶ Ti gue na mbeni assemblée na nord ti kodro ti Myanmar, ambeni ita amû bateau na gbata ti Mandalay, na ala yeke sara lango ota na lege. Teti so a nzere na ala mingi ti fa tënë, ala mû gbâ ti ambeti, na ala mû na azo na yâ ti bateau ni. Tongana bateau ni aluti na mbeni gbata wala  na mbeni kete kodro, akpengba wakua so ayeke sigi hio ti mû ambeti so na azo ti ndo ni. Na ngoi ni so, ambeni fini zo ayeke monté na yâ ti bateau ni; tongana awafango tënë so akiri, ala wara afini zo ti fa tënë na ala.

7. Awakua ti Jéhovah ayeke fa tënë ti Royaume ti Nzapa tongana nyen? Ye so ala gi ayeke nyen?

⁷ Legeoko tongana ti aita so a sara tënë ti ala na yâ ti atapande so, awakua ti Jéhovah so ayapu na yâ ti dunia kue ayeke ‘fa nda ti tënë ni kue na ndö ti Royaume ti Nzapa’. (Kus. 28:23). Ala yeke gue da na da, ala yeke sara lisoro na azo na yanga ti lege, ala yeke fa tënë na lege ti alettre nga na téléphone. Atâa ala yeke na yâ ti bus, wala ala gue ti bâ mbeni pendere ndo wala ala yeke na ngoi ti wungo terê na place ti kua, ala yeke gi ti fa tënë na ndö ti Royaume ti Nzapa. Akode ti fango tënë ni alingbi ti duti nde nde, me ye so ala gi ayeke gï oko: ala ye ti fa nzoni tënë na ndo kue so azo ayeke dä.—Mat. 10:11.

8, 9. (a) Maïngo ti kua ti fango tënë ti Royaume ayeke mbeni miracle ngbanga ti nyen? (b) Ye so asara si zo ayeke hunda terê ti lo na tënë wa? E yeke sara tongana nyen ti hinga ndani?

⁸ Mo ita so mo yeke diko mbeti so, eskê mo kue mo yeke na popo ti gbâ ti awafango tënë ti Royaume, so laso ayeke fa tënë ngangu na yâ ti akodro ahon 235 so? Tongana mo yeke na popo ti ala, mo kue mo yeke oko ti azo so ayeke sara si kua ti fango tënë ti Royaume ayeke maï pendere mingi! Maïngo ti kua ni so ayeke tâ mbeni miracle. Akota kpale ayeke dä; même agouvernement ayeke kanga lege na aTémoin ti Jéhovah nga azo ayeke sara ye ti ngangu mingi na ala. Atâa so kue, ala yeke fa tënë ti Royaume ti Nzapa na azo ti amara kue.

⁹ Ye so asara si zo ayeke hunda terê ti lo, atene: Me ngbanga ti nyen la mbeni ye, même Satan, alingbi pëpe ti kanga lege na maïngo ti kua ti fango tënë ti Royaume so? Ti hinga ndani, a yeke nzoni e kiri na ngoi ti akozo Chrétien, ngbanga ti so e aTémoin ti Jéhovah, e yeke sara mbeni kua so akomanse ândö na ngoi ni so.

10. Jésus abi terê ti lo lani kue na yâ ti kua wa? Nyen la lo hinga na ndö ti kua ni so?

¹⁰ Jésus Christ, so asigi na congrégation ti aChrétien, abi terê ti lo lani kue na yâ ti kua ti fango nzoni tënë ti Royaume ti Nzapa; kua so agbu lani bê ti lo ngangu. Mbeni lâ, lo tene: “Mbi doit ti fa nga nzoni tënë ti Royaume ti Nzapa na ambeni gbata nde, ngbanga ti so a yeke ndali ni la a tokua mbi.” (Luc 4:43). Lo hinga lani so kua so lo zia gere ni na sese so, lo la lo yeke hunzi ni ape. Kozo si lo kui, lo tene so a yeke fa ande tënë ti Royaume ni “na amara kue”. (Marc 13:10). Me, a yeke sara ni tongana nyen? Nga zo wa la ayeke sara ni?

11. Kota kua wa la Jésus amû na adisciple ti lo? Ala yeke wara mungo maboko na ndo wa ti sara na ni?

¹¹ Na peko ti so Jésus akui si a zingo lo na kuâ, lo si na adisciple ti lo, na lo  mû na ala kota kua so: “Tongaso ala gue, ala sara si azo na popo ti amara kue aga adisciple. Ala batize ala na iri ti Babâ, na ti Molenge na ti yingo vulu. Ala fa na ala ti bata aye kue so mbi mû yanga na ala ti sara. Bâ, mbi yeke na terê ti ala lango oko oko kue juska na lâ ni so aye ti ngoi so ayeke gue ti hunzi.” (Mat. 28:19, 20). So lo tene “mbi yeke na terê ti ala” afa so lo yeke mû maboko na adisciple ti lo na yâ ti kua ti fango tënë na ti sarango si azo aga adisciple. Adisciple ayeke na bezoin ti mungo maboko so ngbanga ti so Jésus atene so “amara kue ayeke ke ala”. (Mat. 24:9). Me mbeni ye nde ayeke nga dä ti mû maboko na adisciple ni. Kozo si Jésus akiri na yayu, lo tene na ala so yingo vulu ayeke mû ande ngangu na ala, na ala yeke duti atémoin ti lo “juska na ambage ti sese so ayeke tâ yongoro.”—Kus. 1:8.

12. Akpengba hundango tënë wa la abâ gigi? A yeke nzoni e hinga akiringo tënë ni ngbanga ti nyen?

¹² Ambeni kpengba hundango tënë abâ gigi: Eskê abazengele ti Jésus nga na tanga ti adisciple ti lo ti ngoi ni kâ abâ kua ti ala so na nene ni? Eskê kete wungo ti aChrétien so afa lani nda ti tënë ni kue na ndö ti Royaume ti Nzapa même tongana a sara ye ti ngangu mingi na ala? Jéhovah amû lani maboko na ala? Nga, eskê lo mû yingo vulu na ala si amû maboko na ala na yâ ti kua ti sarango si azo aga adisciple? Mbeti ti Kusala ti aBazengele akiri tënë na ahundango ndo so nga na ambeni nde so ague oko na ni. A yeke nzoni e hinga akiringo tënë ni. Ngbanga ti nyen? Ngbanga ti so Jésus atene kua so lo mû ândö na adisciple ti lo ayeke gue “juska na lâ ni so aye ti ngoi so ayeke gue ti hunzi.” Tongaso, kua so abâ atâ Chrétien kue, même e so e yeke na ngoi ti nda ni so. Ndani la e yeke tâ na nzara ti hinga ambaï so a sû peko ni na yâ ti mbeti ti Kusala.

13, 14. (a) Zo wa la asû mbeti ti Kusala? Lo wara asango ni tongana nyen? (b) Atënë ti nyen la ayeke na yâ ti mbeti ti Kusala?

¹³ Zo wa la asû mbeti ti Kusala? Iri ti zo ni asigi na yâ ti mbeti ni ape; me akozo tënë ti yâ ti mbeti ni afa so oko zo so asû Évangile ti Luc la asû ni (Luc 1:1-4; Kus. 1:1, 2). Tongaso, ngbene ye ândö, a bâ Luc, “docteur so [a] ndoye lo mingi” nga nzoni wasungo mbaï, tongana zo so asû mbeti ti Kusala (aCol. 4:14). Mbeti ni afa peko ti aye so asi na yâ ti ngu 28, ti londo na ngoi so Jésus akiri na yayu na ngu 33 ti si na ngu 61, ngu so bazengele Paul asara kanga na Rome. So na yâ ti fango peko ti aye ni, na ambeni ngoi Luc atene “ala” nga na ambeni ngoi lo tene “e” afa so mingi ti aye so lo sara tënë ni so, lo wani lo yeke dä (Kus. 16:8-10; 20:5; 27:1). So Luc ayeke zo so ayeke gi nda ti ye mbilimbili, âmanke lo wara asango ni na mbage ti Paul, Barnabas, Philippe nga na ambeni zo so iri ti ala asigi na yâ ti mbaï ni.

¹⁴ Atënë ti nyen la ayeke na yâ ti mbeti ti Kusala? Kozoni, na yâ ti Évangile ti Luc, Luc asû peko ti aye so Jésus atene nga lo sara. Me na yâ ti mbeti ti Kusala,  lo fa peko ti aye so adisciple ti Jésus atene nga ala sara. Tongaso, mbeti ti Kusala asara tënë ti azo so asara mbeni kpengba kusala, atâa so ambeni zo abâ mingi ti ala tongana “azo so amanda mbeti pëpe na ala yeke asenge zo”. (Kus. 4:13). Na nduru tënë, mbaï ni so a sû na gbe ti yingo ti Nzapa afa na e tongana nyen la congrégation ti aChrétien abâ gigi nga tongana nyen la amaï. Mbeti ti Kusala afa tongana nyen la akozo Chrétien afa tënë lani: akode ti fango tënë ti ala nga bibe so ala yeke na ni (Kus. 4:31; 5:42). A fa tongana nyen la yingo vulu amû maboko ti tene nzoni tënë amû ndo (Kus. 8:29, 39, 40; 13:1-3; 16:6; 18:24, 25). Mbeti ti Kusala ayâa na nduzu mama-tene ti Bible, so andu sarango si iri ti Nzapa aga nzoni-kue na lege Royaume ti Nzapa so Christ ayeke na ndö ni, nga a fa tongana nyen la tënë ti Royaume ni amû ndo atâa so a kanga lege na ni ngangu.—Kus. 8:12; 19:8; 28:30, 31.

15. Anzoni ye wa la e yeke wara tongana e manda mbeti ti Kusala?

¹⁵ Tongana e manda atënë ti yâ ti mbeti ti Kusala ayeke nzere na e mingi nga ayeke kpengba mabe ti e. Tongana e gbu li ti e na ndö ti tapande ti akozo disciple ti Christ so ala yeke lani na mbeto pëpe nga ala yapu na kusala ni, ye ni ayeke ndu bê ti e. A yeke pusu e ti mû tapande ti mabe ti ala. A yeke aidé e ti mä yanga ti Jésus ti ‘gue, ti sara si azo aga adisciple.’ A sara mbeti so, so mo yeke diko ni so, ti mû maboko na mo ti manda mbeti ti Kusala nzoni.

16. Fa araison ota so a sigi na mbeti so ndali ni.

¹⁶ A sigi na mbeti so ngbanga nyen? Ndali ti araison ota: (1) ti sara si e hinga biani so Jéhovah, na lege ti yingo vulu ti lo, ayeke mû maboko na kua ti fango tënë ti Royaume na ti sarango si azo aga adisciple, (2) ti pusu e ti yapu na kua ni tongana e bâ tapande ti akozo disciple ti Christ nga (3) ti sara si e ne mingi bungbi ti Jéhovah nga na ala so ayeke mû li ni na kua ti fango tënë na ayeke bâ ndo na ndö ti acongrégation.

17, 18. Nyen la mo yeke bâ ande na yâ ti mbeti so? Ambeni ye so ayeke mû ande maboko na mo na ngoi ti mandango Bible mo wani ayeke nyen?

¹⁷ A leke yâ ti mbeti so tongana nyen? Mo yeke bâ so a kangbi yâ ti mbeti so na mbage miombe; mbage oko oko aluti na ndö ti mbeni chapitre wala ambeni chapitre ti mbeti ti Kusala. Nda ti mbeti so ayeke pëpe ti fa nda ti versê oko oko ti mbeti ti Kusala; me a yeke ti fa aye so e lingbi ti manda na ndö ti aye so asi, so a fa peko ni na yâ ti mbeti ti Kusala. A yeke aidé nga e ti bâ tongana nyen la e oko oko kue e peut ti sara ye alingbi na ye so e manda. Na tongo nda ti chapitre oko oko, a fa ye so chapitre ni aluti na ndö ni; a fa nga chapitre wala achapitre ti mbeti ti Kusala so a yeke sara tënë na ndö ni.

¹⁸ Ambeni ye nga ayeke dä so ayeke mû ande maboko na mo na ngoi ti mandango Bible mo wani. Apendere foto ti akpengba ye so asi na yâ ti mbeti ti Kusala ayeke aidé mo ti tene na ngoi so mo yeke gbu li na ndö ti mbaï ni, mo tara ti bâ aye so asi lani. Na yâ ti gbâ ti achapitre ti mbeti so, mo yeke wara  a-encadré so afa ambeni sango na ndö ti tënë ni. Ambeni afa gigi ti azo so Bible asara tënë ti ala so e peut ti mû tapande ti mabe ti ala. Ambeni afa anzene nzene tënë na ndö ti ando, aye so asi, angobo ti sarango ye wala ambeni zo so a sara tënë ti ala na yâ ti mbeti ti Kusala.

19. Ngoi na ngoi, a yeke nzoni ti tene e sara nyen?

¹⁹ Mbeti so apeut ti aidé mo ti gbu li ti mo nzoni na ndö ti kua so mo yeke sara na Jéhovah. Atâa mo ga wafango tënë a sara ngu oke, a yeke nzoni ti tene ngoi na ngoi mo kiri mo bâ aye so mo zia na kozo ndo na yâ ti gigi ti mo nga bango ndo ti mo na ndö ti kua ti fango tënë (2 aCor. 13:5). Hunda terê ti mo: ‘Tongana mbi yeke fa tënë, mbi ngbâ ti sara ye na mbeni lege so afa so ngoi angbâ mingi ape? (1 aCor. 7:29-31). Tongana mbi yeke fa nzoni tënë, mbi fa so tënë ni ayeke biani tâ tënë nga mbi yapu na fango ni? (1 aThes. 1:5, 6). Eskê mbi yeke sara ye kue so mbi peut ti sara ti fa tënë nga ti sara adisciple?’—aCol. 3:23.

20, 21. Ngbanga ti nyen la kua so a mû na e ayeke mbeni ye so a lingbi e sara ni hio? A yeke nzoni e leke na bê ti e ti ngbâ ti sara nyen?

²⁰ Zia e girisa ape so a mû na e mbeni kota kua: a yeke ti fa tënë nga ti sara si azo aga adisciple. So alango ayeke hon, kua ni so akiri aga mbeni ye so a lingbi e sara ni hio. Nda ti aye ti ngoi so ayeke ga na loro mingi na ndembe so. Laso, wungo ti azo so abezoin ti hinga ye so ala doit ti sara si ala sö kuâ ayeke mingi ahon ti kozo. E hinga pëpe wungo ti azo so ayeke nduru ti yeda na tënë ni so peut-être ayeke yeda ande na ni (Kus. 13:48). Me a yeke ti e ti mû maboko na azo tongaso kozoni si ngoi ayeke dä mbeni pëpe ti sara ni.—1 Tim. 4:16.

²¹ Tongaso, a yeke kota ye mingi ti tene e mû tapande ti akozo Chrétien, so ala yapu lani na fango tënë ti Royaume. Zia si mandango mbeti so apusu mo ti yapu na fango tënë nga ti sara ni na mbeto ape. Zia nga si mandango mbeti so asara si mo duti na nzara mingi ti ‘fa nda ti tënë ni kue na ndö ti Royaume ti Nzapa’.—Kus. 28:23.