Jésus na adisciple ti lo osio so ayeke lani na akua mingi ti sarango ni na Capernaüm. Na lakui, azo ti Capernaüm aga na lo azo ti ala so ayeke na kobela ti tene a sava ala. Jésus awara nga ngoi mingi ti wu tere ti lo ape.

Na ndade ni, na yanga ti ndapre, tongana ndo angbâ ti vuko kete, Jésus alondo, lo sigi lo oko. Lo gue na mbeni ndo so zo ayeke dä ape tongaso si lo peut ti sambela Babâ ti lo. Me lo wara lege ti sara ni a ninga ape. Na ngoi so ala bâ so lo yeke na popo ti ala ape, “Simon na ala so ayeke na tere ti lo” alondo ti gi Jésus. Peut-être Pierre la adoit ti mû li ni, ngbanga ti so a yeke na ndo ti lo la Jésus alango dä.—Marc 1:36; Luc 4:38.

Na ngoi so ala wara Jésus, Pierre atene: “Azo kue ayeke gi mo.” (Marc 1:37). Kite ayeke dä ape so, azo ti Capernaüm aye ti tene Jésus angbâ. Aye so lo sara anzere tâ na ala mingi, ni la si “ala tara ti gbanzi lo si lo zia ala ape.” (Luc 4:42). Me eskê Jésus aga gi ge na sese kozoni kue ti sava kobela ti azo? Na a yeke gi na ndo ni so la si lo doit ti sara akua ti lo kue dä? Tënë ti nyen la lo wani lo tene na ndo ni?

Jésus akiri tënë na adisciple ti lo, lo tene: “Zia e gue na mbeni ndo nde. E gue na akete gbata so ayeke nduru ge, tongaso si mbi lingbi nga ti fa tënë kâ, ndali ti so ayeke ye so mbi ga ngbanga ni la.” Ni la, Jésus atene même na azo so aye ti tene lo ngbâ so, lo tene: “Mbi doit nga ti fa nzoni tënë ti Royaume ti Nzapa na ambeni gbata nde, ngbanga ti so a yeke ndali ni la a tokua mbi.”—Marc 1:38; Luc 4:43.

Biani, kota raison so ndali ni Jésus aga na sese ayeke ti fa nzoni tënë ti Royaume ti Nzapa na azo. Royaume ni so ayeke sara ande si iri ti Babâ ti lo aga nzoni-kue nga ayeke sara si kobela ti azo kue ayeke hunzi biani biani. So Jésus asava azo na lege ti miracle so, a fa biani so lo la Nzapa atokua lo. Angu mingi kozoni na lo, Moïse nga kue asara akota miracle ti fa na azo so Nzapa la atokua lo.—Exode 4:1-9, 30, 31.

Tongaso, Jésus azia Capernaüm, lo gue na ambeni gbata ni nde, legeoko na adisciple ti lo osio so. Adisciple ni ayeke Pierre na ita ti lo André nga na Jean na ita ti lo Jacques. Girisa ape so, na yenga so ahon lani, Jésus ahunda na ala ti ga akozo zo so lo na ala ayeke sara kua legeoko nga ayeke voyagé legeoko.

Voyage so Jésus asara na yâ ti Galilée kue, legeoko na adisciple ti lo osio so, apassé pendere mingi. Ye so asara si tënë ti Jésus amû lani ndo mingi. Bible atene so “sango ti lo amû yâ ti Syrie kue,” nga na yâ ti agbata bale-oko so a iri ni Décapole, nga na mbage ti Ngu ti Jourdain kâ (Matthieu 4:24, 25). Gbâ ti azo so ayeke na ando ni so, nga so ayeke na Judée, amû peko ti Jésus na adisciple ti lo. Ala ga na gbâ ti azo ti kobela na Jésus. Jésus azia vundu na bê ti ala ape, lo sava ala nga lo tomba asioni yingo na yâ ti ala so ayeke na asioni yingo.