Jésus atene lani na adisciple ti lo osio, so ti tene Pierre, André, Jacques na Jean, ti ga azo ti gingo azo. Fadeso, na lâ ti Sabbat, ala kue ague na mbeni synagogue so ayeke na Capernaüm. Jésus afa tënë na yâ ti synagogue ni, na ge encore li ti azo kue akpe tongana ala bâ fason so lo yeke fa na tënë. Lo fa tënë tongana mbeni zo so ayeke na komandema, me pëpe tongana ti ascribe.

Na ngoi ti Sabbat ni so, mbeni koli so sioni yingo ayeke na yâ ti lo ayeke dä. Tâ gi na yâ ti synagogue ni, koli ni akomanse ti tene na kota go, a tene: “Ti mo na e nyen? Jésus, zo ti Nazareth. Mo ga ti futi e? Mbi hinga mo nzoni mingi: Mo yeke Lo so ayeke nzoni-kue so alondo na Nzapa si aga!” Jésus asuku na sioni yingo so ayeke na yâ ti koli ni so, lo tene: “Kanga yanga ti mo, sigi na yâ ti lo!”—Marc 1:24, 25.

Na sioni yingo ni ayengi koli ni abi lo na sese, na lo dekongo ngangu. Me sioni yingo ni asigi na yâ ti koli ni “sân ti sara sioni na lo.” (Luc 4:35). Li ti azo kue so ayeke na tere ti lo na yâ ti synagogue ni akpe kue, na ala hunda tere ti ala atene: “So nyen la?” Na ala kiri atene: “Lo yeke na ngangu ti mû yanga même na asioni yingo, na ala mä yanga ti lo.” (Marc 1:27). Kite ayeke dä ape so, sango ti ye ni so amû yâ ti Galilée kue.

Jésus na adisciple ti lo alondo na synagogue ni ala gue na da ti Simon, so ti tene Pierre. Fièvre asara mama ti wali ti Pierre sioni na yâ ti da ni so. Ala toto na Jésus ti aidé mama ni. Tongaso, Jésus ague na tere ti mama ni, lo gbu maboko ti lo na lo yô lo na nduzu. Droit tere ti lo akaï na lo komanse ti sara kua na ala, peut-être na tongo mbeni kobe na ala.

Tongana lâ ague ti lï, azo ti kodro ni akomanse ti ga na azo ti ala, so tere ti ala ason, na da ti Pierre. Gi hio tongaso, a kpa mo bâ mo tene azo ti kodro ni kue la si abungbi ge na yanga-da ni so. Ngbanga ti nyen? Ala ye ti tene a sava ala. Tongaso, “ala kue so ayeke na azo ti kobela nde nde aga na ala na [Jésus]. Lo zia maboko ti lo na ndo ti ala oko oko kue, na ala sava.” (Luc 4:40). Kite ayeke dä ape so, atâa kobela ti ala ni ayeke tongana nyen, Jésus asava ala, tongana ti so mbeni prophétie atene lani (Ésaïe 53:4). Lo tomba même asioni yingo na yâ ti azo. Tongana asioni yingo ni ayeke sigi na yâ ti azo ni, ala yeke tene: “Mo yeke Molenge ti Nzapa.” (Luc 4:41). Me Jésus asuku na ala na lo zia lege na ala ti sara encore ambeni tënë na ndo ni ape. Ala hinga so Jésus la ayeke Christ ni, me Jésus aye pëpe si asioni yingo ni so ahanda lê ti azo ti fa so ala, asioni yingo ni, ala yeke sara na tâ Nzapa.