Jésus asara aye lani mingi na lango ni so. Na peko ti so lo gue na yâ ti akodro ti Décapole, lo sava lani mbeni wali so mênë ayeke ga na tere ti lo mingi nga lo zingo molenge-wali ti Jaïrus na kuâ. Me ye ni ade ahunzi ape. Tongana Jésus alondo na ndo ti Jaïrus ti hon, ambeni waziba use amû peko ti lo, na ala yeke dekongo atene: “Sara nzoni bê na e, Molenge ti David.”—Matthieu 9:27.

So akoli so airi Jésus “Molenge ti David,” a fa so ala mä na bê so Jésus ayeke hale ti Gbia David na tongaso lo yeke Messie ni. Jésus asara mo bâ mo tene lo mä tënë ni ape, peut-être ti bâ wala ala yeke ngbâ ti dekongo ni. Na a yeke ye so ala sara la. Tongana Jésus alï na yâ ti mbeni da, ala nga alinda na peko ti lo. Jésus ahunda ala atene: “Ala yeke na mabe so mbi lingbi ti sara ye so?” Ala use kue akiri tënë atene: “En, Seigneur.” Jésus angbâ andu lê ti ala, na lo tene: “Zia ye ni asi na ala alingbi na mabe ti ala.”—Matthieu 9:28, 29.

Droit lê ti ala azi! Me tongana ti so Jésus asara na ambeni zo, lo tene na ala ti sara tënë ti ye ni so na azo ape. Me teti so tere ti ala anzere mingi, ala gue asara tënë ti ye ni so na azo kue.

Tongana akoli use so ahon awe, azo aga na Jésus mbeni koli so ayeke sara tënë ape, ngbanga ti so sioni yingo ayeke na yâ ti lo. Jésus atomba sioni yingo ni na yâ ti koli ni, na droit koli ni akomanse ti sara tënë. Na bango ye ni so, azo atene: “Lâ oko ade a bâ mara ti ye tongaso na Israël ape.” A-Farizien ayeke nga na place ni so lani. Ti so, ala peut nga ti dë kite na ndo ti miracle ni so ape. Me ala dë kite na ndo ti ndo so Jésus awara ngangu ni dä si lo yeke sara na amiracle ni so. Ala tene: “Lo yeke tomba asioni yingo na ngangu ti mokonzi ti asioni yingo.”—Matthieu 9:33, 34.

Kete na peko ti ye ni so, Jésus akiri legeoko na adisciple ti lo na Nazareth, kodro so lo kono dä. Lo fa lani tënë kâ na yâ ti synagogue ni a sara ngu oko tongaso awe. Na tongo nda ni, tënë ti lo apika bê ti azo ti ndo ni ngangu mingi, me na pekoni ngonzo agbu ala na tere ti lo, na ala ye même ti fâ lo. Fadeso, Jésus aye ti gue ti tara ti aidé azo ti kodro ti lo ni encore.

Na mbeni lango ti Sabbat, lo kiri lo gue na synagogue ni ti fa ye na azo. Li ti azo kue akpe na même ala yeke hunda ndo atene: “Koli so awara ti lo ndara so nga na ngangu ti sara amiracle so na ndo wa? Molenge ti charpentier so la ape? Iri ti mama ti lo ayeke Marie ape? Aita ti lo ti koli ayeke Jacques, Joseph, Simon nga na Judas ape? Aita ti lo ti wali ayeke na popo ti e ape? Lo hinga ti lo aye so kue na ndo wa?”—Matthieu 13:54-56.

Azo ni abâ so Jésus ayeke nga mbeni zo ti kodro ti ala. Na yâ ti li ti ala, ala yeke tene, ‘Lo peut ti duti Messie ni tongana nyen, so lo kono na lê ti e so?’ Me, atâa so ala bâ kota ndara so Jésus ayeke na ni nga na amiracle kue so lo sara, azo ni ake lo. Même afami ti lo nga amä na bê na lo ape, ndali ti so ala hinga lo nzoni mingi. Ni la si Jésus atene: “A yeke ne ka prophète na kodro ti lo ape nga na yâ ti da ti lo wani ape, me gi na ambeni ndo nde.”—Matthieu 13:57.

Mawa asara Jésus tongana lo bâ so mabe amanke ala. Tongaso, lo sara nga gbâ ti amiracle na place ni so ape, me lo “zia maboko ti lo gi na ndo ti ambeni zo ti kobela oko oko na lo sava ala.”—Marc 6:5, 6.