Gbâ ti azo aga abungbi na tere ti Jésus na sese ti Décapole, so ayeke mbeni ndo so ayeke na mbage ti est ti Kota ngu ti Galilée. Azo ni aga ti mä Jésus nga ti tene lo sava ala. Ala zia nga akobe na yâ ti akota sakpa, ala ga na ni.

Me, a si na mbeni ngoi, Jésus atene na adisciple ti lo atene: “Mawa ti gbâ ti azo so asara mbi, ngbanga ti so a sara laso lango ota awe la ala ngbâ na tere ti mbi na ala yeke na ye ti tengo ni ape. Tongana mbi tene na ala ti gue na kodro na nzara na yâ ti ala, ala yeke woko ande na lege, ndali ti so ambeni alondo ayo.” Me, adisciple ni ahunda lo atene: “Ge na yâ ti benyama tongaso, zo ayeke wara ande mapa na ndo wa ti mû na gbâ ti azo so si ala te, yâ ti ala asi?”—Marc 8:2-4.

Jésus akiri tënë atene: “Ala yeke na mapa oke?” Adisciple ni atene: “Mbasambala, na ambeni kete susu so ayeke mingi ape.” (Matthieu 15:34). Na pekoni, Jésus atene na azo ni ti duti na sese. Lo mû amapa na asusu ni, lo sambela Nzapa na lo mû ni na adisciple ti lo ti kangbi ni na azo ni. Tâ gi tongana ye ti bango li, azo kue ate kobe na yâ ti ala asi. Atâa so azo kue so ate lani kobe ni ayeke akoli 4 000, sân ti diko awali na amolenge dä, tanga ti kobe ni angbâ na a ro ni asi yâ ti akota sakpa mbasambala!

Na peko ti so Jésus atene na azo ni ti kiri na ndo ti ala, lo na adisciple ti lo amû mbeni ngö, ala gue na Magadan, so ayeke na mbage ti ouest ti yanga ti Kota ngu ti Galilée. Kâ, aFarizien nga na ambeni Sadducéen aga ti tara lo na hundango na lo ti sara mbeni fä so alondo na yayu.

Jésus ahinga ye so apusu ala ti hunda ndo tongaso, ni la lo kiri tënë, lo tene: “Tongana ndo ague ti vuko, ala yeke tene: ‘Ndo ni ayeke duti nzoni ngbanga ti so lê ti nduzu abe bengo.’ Nga na ndapre, ala yeke tene: ‘Ndo ni ayeke dë ande dengo, nga ngu ayeke pika laso, ngbanga ti so lê ti nduzu abe bengo nga avuko vukongo.’ Ala hinga ti bâ lê ti nduzu ti hinga ye so ayeke si ande, me ala lingbi pëpe ti fa nda ti aye so ayeke si na ngoi so.” (Matthieu 16:2, 3). Na pekoni, Jésus afa na aFarizien nga na aSadducéen so, a yeke sara na ala mbeni fä nde ape, gi ti Jonas awe.

Na pekoni, Jésus na adisciple ti lo amû mbeni ngö, ala gue na Bethsaïda, so ayeke na mbage ti nord-est ti yanga ti ngu ni. Na lege, adisciple ni aga ti bâ so mapa so ala yeke na ni ayeke lingbi ande ala kue ape. Ala yeke gi na lê ti mapa oko. Jésus ayeke pensé na ye so asi fade na popo ti lo na aFarizien nga na aSadducéen, so amû mbage ti Hérode, na ngoi so lo gboto mê ti adisciple ti lo, lo tene: “Zia lê ti ala akpengba, ala sara hange na levure ti aFarizien nga na ti Hérode.” Adisciple ni apensé ti ala atene, so Jésus asara tënë ti levure so, âmanke lo ye ti sara tënë ti mapa ti ala so ala girisa ti mû fade so la. Me, teti so Jésus abâ so adisciple ni apensé ti ala na mbeni ye nde, lo tene: “Ndali ti nyen si ala papa na popo ti ala ngbanga ti so ala yeke na mapa ape?”—Marc 8:15-17.

Ade ti ninga ape, Jésus amû mapa na gbâ ti azo. Tongaso, adisciple ni adoit ti hinga so, so ala yeke na mapa mingi ape so, bê ti Jésus agi nga lo ape. Jésus ahunda ala atene: “Ala girisa awe, lani so mbi sara si mapa oku aga gbani ndali ti akoli 5 000 so, tanga ti anduru ni so ala ro asi sakpa oke?” Ala tene na lo: “Bale-oko na use.” Jésus angbâ atene: “Lani so mbi sara si mapa mbasambala aga gbani ndali ti akoli 4 000 so, tanga ti anduru ni so ala ro asi akota sakpa oke?” Ala tene na lo: “Mbasambala.”—Marc 8:18-20.

Jésus ahunda ala atene: “A sara tongana nyen si ala hinga ape so mbi yeke sara na ala tënë ti mapa ape? Me ala sara hange na levure ti aFarizien na aSadducéen.”—Matthieu 16:11.

Na nda ni, adisciple ni amä yâ ti tënë ni. A yeke sara kua na levure ti sara si farine asuku. Ge, Jésus ayeke haka levure na bubango ti mbeni ye. Lo tene lani na adisciple ti lo ti sara hange na “aye so aFarizien na aSadducéen ayeke fa,” so ayeke tongana mbeni ye so ayeke buba zo.—Matthieu 16:12.