Na peko ti so Jésus asara tënë na ndo ti pardon na da ti Simon, so ayeke mbeni Farizien, lo komanse ti sara mbeni fini tambela ti fango tënë ti lo na yâ ti Galilée kue. Lo yeke na yâ ti ngu use ti kua ti fango tënë ti lo la, na lo sara tambela ni lo oko ape. Abazengele 12 ayeke na tere ti lo, nga na ambeni wali so lani lo “tomba asioni yingo na yâ ti ala nga lo sava akobela ti ala.” (Luc 8:2). Na popo ti awali ni so, a yeke wara Marie ti Magdala, Suzanne nga na Jeanne so koli ti lo ayeke zo ti kua ti Gbia Hérode Antipas.

Tongana azo ayeke mä atënë na ndo ti Jésus lani, ala yeke hunda tere ti ala kirikiri na ndo ti aye so lo yeke sara. A bâ ni polele lani na ngoi so a ga na Jésus mbeni koli so sioni yingo ayeke na yâ ti lo, na so lo yeke waziba nga so lo yeke sara tënë ape. Jésus asava koli ni, na pekoni lo komanse ti bâ ndo, ti sara tënë, nga sioni yingo ni asigi na yâ ti lo. Li ti azo kue akpe, na ala tene: “Âmanke Molenge ti David la ape?”—Matthieu 12:23.

Gbâ ti azo abungbi na tere ti da so Jésus ayeke dä juska asara si Jésus na adisciple ti lo awara même lege ti te kobe ape. Me, azo kue pëpe la apensé so Jésus ayeke “Molenge ti David”, so a sara tënë ti lo lani so. Ambeni scribe na aFarizien, so alondo na ando nde nde na mbage ti Jérusalem, ayeke nga dä. Me ala ga pëpe ti mä tënë ti Jésus wala ti yeda na aye so lo yeke sara. Ala tene na azo atene: “Béelzéboub ayeke na yâ ti lo,” na lo yeke sara kua “na ngangu ti mokonzi ti asioni yingo.” (Marc 3:22). Na ngoi so afami ti Jésus amä tënë ti ye so asi so, ala ga ti gbu Jésus ti hon na ni. Ndali ti nyen?

Na ngoi ni so aita ti Jésus kue amä na bê ape so Jésus ayeke Molenge ti Nzapa (Jean 7:5). Jésus so asara si wusuwusu alondo so ayeke nde na Jésus so lo na ala akono legeoko na Nazareth. Ndali ti so ala bâ ti ala atene li ti Jésus ayeke nzoni kue ape, ala tene: “Ye asara li ti lo awe.”—Marc 3:21.

Aye so kue aye ti fa na e nyen la? Jésus alondo ti sava mbeni koli so sioni yingo ayeke na yâ ti lo, na fadeso lo peut ti bâ ndo nga ti sara tënë. Zo oko apeut ti de kite na ni ape. Tongaso, ascribe na aFarizien atara ti bi nengo ti Jésus na sese na tenengo mbeni tënë ti mvene. Ala tene: “Koli so ayeke tomba asioni yingo gi na ngangu ti Béelzéboub, mokonzi ti asioni yingo.”—Matthieu 12:24.

Jésus ahinga ye so ayeke na yâ ti li ti ascribe na aFarizien, ni la lo tene na ala lo tene: “Royaume kue so yâ ni akangbi ayeke futi, na gbata wala da kue so yâ ni akangbi ayeke ngbâ na nduzu ape. Legeoko nga, tongana Satan atomba Satan, andâ yâ ti lo akangbi. Tongaso, royaume ti lo ayeke ngbâ na nduzu tongana nyen?”—Matthieu 12:25, 26.

So pendere fango ye! A-Farizien kue ahinga lani so ambeni Juif ayeke tomba ka asioni yingo na yâ ti azo (Kusala 19:13). Ni la Jésus ahunda ala, lo tene: “Tongana mbi yeke tomba asioni yingo na ngangu ti Béelzéboub, ka adisciple ti ala ayeke tomba ti ala asioni yingo ni na ngangu ti zo wa?” Jésus aye ti fa so, tënë so ala tene so alingbi gi na ala wani. Na pekoni, Jésus atene: “Me tongana a yeke na lege ti yingo ti Nzapa si mbi yeke tomba asioni yingo, andâ Royaume ti Nzapa asi na ala awe si ala hinga ape so.”—Matthieu 12:27, 28.

Ti fa so, tongana ni yeke tomba asioni yingo na yâ ti azo aye ti fa so ni yeke na ngangu na ndo ti Satan, Jésus atene: “Eskê zo alingbi ti lï na ngangu na da ti mbeni ngangu koli na ti gbu akungba ti lo sân ti tene lo kanga lo kozoni? Lo yeke gbu akungba ti da ti lo gi tongana lo kanga lo awe si. Zo so ayeke na mbage ti mbi pëpe ake mbi, na zo so abungbi azo legeoko na mbi pëpe akangbi yâ ti azo kirikiri.” (Matthieu 12:29, 30). Ascribe na aFarizien aye tënë ti Jésus ape, ye so afa biani so ala yeke azo ti Satan. Ala yeke tomba azo na tere ti Molenge ti Nzapa, so Jéhovah la amû na lo ngangu ti sara na aye so kue.

Jésus agboto mê ti awato ti lo ni so, lo tene: “Aye kue so amolenge ti azo ayeke sara, a yeke pardonné ni ande na ala, atâa asiokpari wa la si ala sara wala asioni zonga wa la si ala zonga. Me, zo so azonga yingo vulu, a yeke pardonné lo lâ oko ape, me ngbanga ayeke ngbâ lakue lakue na li ti lo.” (Marc 3:28, 29). Kota tënë ayeke na li ti azo so atene Satan la asara mbeni ye so yingo ti Nzapa la asara ni!