Na ngoi ti mbeni Sabbat ni nde, Jésus ague na mbeni synagogue, peut-être na Galilée. Kâ, lo wara mbeni koli so maboko ti lo ti koli abuba (Luc 6:6). Me lê ti ascribe na aFarizien ayeke gi na ndo ti Jésus. Ngbanga nyen? Ala fa tâ ye so ayeke biani na yâ ti bê ti ala na ngoi so ala hunda ndo, a tene: “Ndia amû lege na zo ti sava azo na lâ ti Sabbat?”—Matthieu 12:10.

Amokonzi-nzapa ti aJuif atene so Ndia amû lege na zo ti sava mbeni zo na lâ ti Sabbat, gi tongana fini ti zo ni so ayeke na yâ ti kpale. Me, na tapande, a yeke na lege ni ape ti kiri na bio ti mbeni zo na place ni wala ti soigné entorse, ngbanga ti so aye ni so ayeke nga kota kpale mingi ape. A yeke polele so, ascribe na aFarizien ayeke hunda lani ndo tongaso, pëpe ngbanga ti so ala sara mawa ti koli so kobela awoko lo depuis, me ngbanga ti so ala yeke gi gi lani lege ti wara Jésus na yâ ti atënë ti lo.

Me Jésus amä gbe ti tënë so ala ye ti tene so. Lo bâ so ala gue ayo mingi na yâ ti atënë ti ala, nga ala gue nde mingi na ye so Mbeti ti Nzapa afa na ndo ti tënë ti aye so zo adoit ti sara ni pëpe na lâ ti Sabbat (Exode 20:8-10). Lo tingbi na mara ti azo tongaso awe, so ayeke na sioni bango ndo na ndo ti amiracle so lo sara. Me Jésus abi mbeni tënë na sese na ngoi so lo tene na koli so maboko ti lo abuba so, lo tene: “Londo mo ga mo luti na milieu.”—Marc 3:3.

Jésus atourné na mbage ti ascribe na aFarizien ni, lo tene: “Na popo ti ala so, zo wa la tongana lo yeke na taba oko, na taba ni atï na dû na lâ ti Sabbat, lo yeke gue ti mû lo ti sigi na ni ape?” (Matthieu 12:11). Teti so taba ayeke mbeni ye ti warango na nginza lani, ala peut ande pëpe ti yeda si taba ni angbâ na yâ ti dû juska ndo ahan ngbanga ti lo kui, na tongana lo kui, andâ nginza lâ ahon so. Na ndo ni, Bible atene: ‛Zo ti mbilimbili abâ lege ti anyama ti lo nzoni.ʼ—aProverbe 12:10.

Na ziango kamba na popo ti aye ni so, Jésus atene: “Ngere ti zo ahon ti taba! Tongaso, ndia amû lege na zo ti sara ye ti nzoni na lâ ti Sabbat.” (Matthieu 12:12). Ni la, a yeke duti ande pëpe dorongo ndia ti Sabbat tongana Jésus nga kue asava mbeni zo na lango ni so. Amokonzi-nzapa ti aJuif so apeut nga ti ke tënë ni ape, ngbanga ti so tënë ni ayeke na lege ni nga afa so lo bâ mawa ti zo. Ni la, ala zi nga yanga kete na ndo ni ape.

Jésus abâ ala oko oko kue, na mawa nga ngonzo asara lo ndali ti so bango ndo ti ala ayeke na lege ni ape. Na pekoni, lo tene na koli ni, lo tene: “Yôro yâ ti maboko ti mo.” (Matthieu 12:13). Maboko ti koli ni akiri aga nzoni, tâ gi na ngoi so lo yôro yâ ti maboko ti lo ni. Tere ti koli ni anzere mingi. Me ka ti awato ti Jésus ayeke tongana nyen?

A hon ti tene tere ti ala nga kue anzere ndali ti so maboko ti koli so akiri aga nzoni, aFarizien ni asigi, na hio ala gue ala wara “azo ti Hérode ti mä tere ti tene ala fâ Jésus.” (Marc 3:6). Na yâ ti bungbi ti kama-poroso so, a yeke wara nga ambeni membre ti bungbi ti vorongo nzapa so a iri ala aSadducéen. Mingi ni, aSadducéen na aFarizien ayeke mä ka tere ape, me ti ge ala mä tere nzoni ti ke Jésus.