Depuis na peko ti batême ti Jésus juska ti ga na ni, azo ahinga fadeso lo mingi. Gbâ ti aJuif abâ amiracle so lo sara nga sango ti aye so lo sara amû yâ ti kodro ni. Fadeso, na Jérusalem, na ngoi ti Matanga ti aTabernacle (wala ti akpangba), gbâ ti azo ayeke gi lo.

Azo ayeke na abango ndo nde nde na ndo ti Jésus. Ambeni atene: “Lo yeke nzoni zo.” Me ambeni nde atene: “Lo yeke nzoni zo ape, me lo yeke handa azo handango.” (Jean 7:12). A yeke lani na akozo lango ti matanga ni la azo ayeke tene atënë ni so. Ye oko, zo oko tongaso ti luti ti tene nzoni tënë ti Jésus dandara ayeke dä ape, ngbanga ti so azo kue ayeke kpe lê ti amokonzi-nzapa mingi.

A si na ambeni lango ti yâ ti matanga ni, Jésus ague na temple. Li ti azo mingi akpe kue tongana ala bâ fason so lo yeke fa na ye. Teti so lâ oko lo sara nga ekole ti gango Rabbin ape, ambeni Juif ahunda tere ti ala atene: “So lo manda mbeti na a-ekole ti e ape so, koli so ahinga tënë ti Mbeti ti Nzapa mingi tongaso tongana nyen?”—Jean 7:15.

Jésus afa na ala atene: “Ye so mbi fa ayeke ti mbi ape, me a yeke ti lo so atokua mbi. Tongana mbeni zo aye ti sara ye so bê ti Nzapa aye, fade lo hinga wala fango tënë so alondo na Nzapa wala mbi yeke sara gï tënë ti li ti mbi.” (Jean 7:16, 17). Afango ye ti Jésus ague oko na Ndia ti Nzapa, tongaso a yeke polele so lo yeke gi lani ti mû gloire na Nzapa, me na lo wani ape.

Na pekoni, Jésus atene: “Eskê Moïse amû lani Ndia na ala ape? Me ala akpe Ndia ni ape. Ala yeke gi ti fâ mbi ngbanga ti nyen?” Ambeni zo na milieu ti azo ni lani, peut-être ala so alondo na ambeni kodro nde si aga, ahinga ti ala ape so azo ayeke gi lani ti fâ Jésus. Ti ala, a yeke ngangu na ala ti pensé so ambeni zo ayeke gi ti fâ mara ti zo so ahinga ti fa ye tongana lo so. Tongaso, ala pensé so âmanke li ti Jésus ayeke nzoni ape la si lo tene mara ti tënë tongaso. Ala tene: “Sioni yingo ayeke na yâ ti mo. Zo wa la ayeke gi ti fâ mo ni zo wa?”—Jean 7:19, 20.

A sara lani ngu oko na ndambo tongaso awe la ambeni mokonzi ti aJuif aye lani ti fâ Jésus ndali ti so lo sava mbeni koli na lâ ti Sabbat. Ge fadeso, Jésus asara kua na mbeni tënë so apusu zo ti gbu li na so afa na aJuif tongana nyen la ala yeke sara ye ahon ndo ni. Lo fa na azo ni so, Ndia ahunda lani ti tene a fâ mbeni kete molenge-koli na ganza na lango miombe na peko ti so a dü lo, même si lango ni so atï na lâ ti Sabbat. Na pekoni, lo hunda azo ni lo tene: “So a fâ mbeni zo na ganza na lâ ti sabbat ti tene a doro ndia ti Moïse ape so, ala sara ngonzo mingi na tere ti mbi ngbanga ti so mbi sara si tere ti mbeni zo aga nzoni na lâ ti sabbat? Ala zia ti fâ ngbanga na ndö ti ye so lê ti ala abâ, me ala fâ gi ngbanga so ayeke mbilimbili.”—Jean 7:23, 24.

Ambeni azo ti Jérusalem, so ahinga tënë ni so, atene: “Koli so ala [amokonzi ayeke] gi ti fâ lo so la ape? Bâ! Lo yeke tene tënë na lê ti azo kue, me ala sara tënë na lo oko ape. Amokonzi ni ahinga biani awe so lo la lo yeke Christ ni?” Me, ngbanga ti nyen la azo amä na bê lani ape so Jésus la ayeke Christ ni? Ngbanga ti so ala yeke tene: “E hinga ndo so koli so alondo dä. Me tongana Christ aga ande, zo ti hinga ndo so lo londo dä ayeke ti lo dä ape.”—Jean 7:25-27.

Gi na yâ ti temple ni ge, Jésus akiri tënë na ala, lo tene: “Ala hinga mbi, na ala hinga nga ndo so mbi londo dä. Mbi ga na bê ti mbi wani ape, lo so atokua mbi ayeke dä biani me ala hinga lo ape. Ti mbi, mbi hinga lo ngbanga ti so mbi yeke zo so aga na iri ti lo, lo la lo tokua mbi.” (Jean 7:28, 29). Tongana azo ni amä tënë ni so, ala ye ti tara ti gbu Jésus, ti tene wala na pekoni ala bi lo na da ti kanga wala ala fâ lo. Ye oko, ala wara lege ape, ngbanga ti so lango ti tene lo kui ade ti lingbi ape.

Ye oko, mingi ti azo amä na bê na lo, tongana ti so ala doit ti sara ni. Lani, Jésus atambela na ndo ti ngu, lo sara si pupu akaï, lo mû kobe na azo saki mingi gi na lege ti kete mapa na susu, lo sava kobela ti azo, lo sara si awazin atambela, lo zi lê ti awaziba, lo sava azo ti buruma nga lo zingo même akuâ. Tongaso, a yeke na raison ti tene azo ni so ahunda ndo atene: “Tongana Christ aga ande, lo yeke sara afä ahon ti so koli so asara so?”—Jean 7:31.

Tongana aFarizien amä azo ni na tenengo tongaso, ala na aprêtre-mokonzi atokua ambeni turugu ti gue ti gbu Jésus.