Peut-être a yeke nzere ka na mo ti mä nzoni tënë. Tongaso, mbeni nzoni tënë ayeke dä ndali ti mo na azo so mo ye ala mingi.

Nzoni tënë ni so ayeke na yâ ti Bible, mbeni mbeti so Lo so aleke aye kue, Jéhovah Nzapa, la apusu azo ti sara ni, a sara angu mingi awe. Mbeti so na maboko ti mo so, a sara tënë mingi na ndo ti ambeni buku osio ti Bible so a yeke wara na yâ ni ambeni nzoni tënë so ayeke ndali ti azo kue. Buku ni oko oko amû iri ti azo so Nzapa asara kua na ala ti sû ni: Matthieu, Marc, Luc na Jean.

Mingi ti azo airi abuku osio ni so aÉvangile. Abuku osio so kue asara gi tënë ti évangile wala nzoni tënë na ndo ti Jésus. Abuku ni so atene so lo yeke zo so Nzapa asara kua na lo ti mû salut na azo nga so lo Jésus ni, so ayeke Gbia ti Royaume ti Nzapa, ayeke sara ande si azo kue so ayeke na mabe na lo awara gbâ ti atufa na ndo ti ala.—Marc 10:17, 30; 13:13.

Peut-être mo yeke hunda ngbanga ti nyen la Nzapa asara si a sû ambaï osio na ndo ti fini ti Jésus nga na afango ye ti lo.

A yeke nzoni ti wara abuku nde nde tongaso so asara tënë na ndo ti aye so Jésus atene na lo sara lani. Zia e mû mbeni tapande: Tara ti bâ na yâ ti li ti mo ambeni koli osio so angbâ ti duti na tere ti mbeni wafango ye so azo ahinga lo mingi. Mbeni oko so aduti na devant ti wafango ye ni ayeke zo ti rongo nginza ti impôt. Lo ti so aduti na mbage ti koli ayeke mbeni docteur. Lo so aduti na mbage ti wali ayeke mbeni zo ti gingo susu nga lo yeke mbeni kota kamarade ti wafango ye ni. Osio koli ni, so aduti ti lo na mbage ti peko, ayeke mbeni senge zo so ayeke bâ ti lo gi ndo na so ngu ti lo ayeke kete na amba ti lo. Akoli osio so kue ayeke azo so ayeke sara ka ye na lege ni nga bango ndo ti ala ayeke nde nde. Tongana ala oko oko asû mbaï ti aye so wafango ye ni ayeke tene na lo yeke sara, peut-être mbaï so zo oko oko ayeke sû ayeke fa ambeni nzene nzene tënë so ambeni afa ni ape. Me, tongana e bungbi ambaï so kue na e bata na li anzene nzene tënë nde nde kue so ala fa ni, a yeke mû ande lege na e ti hinga na ti gbu nda ti aye kue so wafango ye ni atene na lo sara. Tapande so amû lege na e ti bâ ye ti nzoni so e lingbi ti wara na lege ti abuku osio so asara tënë na ndo ti gigi ti Kota Wafango ye so ayeke Jésus.

 Zia e kiri na ndo ti tapande ti e so. Lo so ayeke zo ti rongo nginza ti impôt so aye ti ndu bê ti aJuif. Tongaso lo sû peko ti afango ye wala aye so asi ti aidé aJuif ni so. Lo so ayeke docteur asara tënë mingi na ndo ti asavango zo so ayeke na kobela wala azo so ayeke awazin, tongaso lo sara tënë pëpe na ndo ti aye so zo ti rongo nginza ti impôt asû wala afa ni na mbeni lege nde. Ti lo so ayeke kota kamarade ti wafango ye ni so, lo sara ti lo tënë mingi na ndo ti asarango ye ti tere ti wafango ye ni nga na abibe ti lo. Lo ti so ngu ti lo ayeke kete na amba ti lo, lo sara tënë nduru me na mbeni lege so ayeke polele. Na ndo ti aye so kue, atënë so kue akoli so asû ni so ayeke tâ tënë. Tapande so amû lege na e ti bâ so abuku osio so, so kue asara tënë na ndo ti gigi ti Jésus, amû lege na e ti hinga nzoni mingi aye so Jésus asara, aye so lo fa nga mara ti zo wa lo yeke lani.

Peut-être mingi ti azo ayeke tene ka ‘Évangile ti Matthieu’ wala ‘Évangile ti Jean.’ A yeke sioni ape ti tene tongaso, ndali ti so aÉvangile ni oko na oko asara gi tënë na ndo ti “nzoni tënë na ndo ti Jésus Christ”. (Marc 1:1). Ye oko, e peut ti tene so évangile, wala nzoni tënë, ayeke gi oko na ndo ti Jésus, so e peut ti wara ni na yâ ti abuku osio so.

Gbâ ti azo so ayeke manda Bible amû aye so a sara tënë ni na yâ ti ambeti ti Matthieu, Marc, Luc na Jean, ala haka ni nga ala tingbi atënë ni ti tene alingbi tere. Na ngu 170 tongaso, Tatien, so ayeke mbeni wasungo mbeti ti Syrie, asara effort ti sara tongaso. Lo yeda so abuku osio so ayeke tâ tënë nga alondo na Nzapa, nga lo sara Diatessaron, so ayeke ambaï ti fini ti Jésus nga na ti kua ti lo ti fango tënë. Lo leke yâ ti ambaï ni na molongo ni.

Buku Jésus: Lege ni, tâ tënë na fini asara nga tongaso, me a fa ti lo atënë ni polele mingi. A yeke ngbanga ti so, laso, e gbu nda ti aprophétie ti Jésus nga na ti atapande ti lo nzoni mingi ahon ti kozo. Gbungo nda ti ye ni so a-aidé e ti mä yâ ti aye so Jésus atene na lo sara, nga ti zia ambaï ni na molongo ni. Aye so a wara na gbe ti sese a-aidé nga e ti gbu nda ti ambeni nzene nzene tënë so a tene na yâ ti ambaï ni nga ti hinga nyen la azo so asû ni ayeke na ni na yâ ti li ti ala lani. A yeke tâ tënë so, zo alingbi pëpe ti tene so aye ni oko oko kue asi tâ gi tongaso na ti luti nganganga na ndo ni. Me, buku Jésus: Lege ni, tâ tënë na fini afa na e aye ni na molongo ni nga na lege ni.

Na ngoi so mo yeke diko ande buku so, tara ti gi ti hinga nzoni kota tënë so ayeke na yâ ni ndali ti mo na azo so mo ye ala mingi. Girisa ape so, Jésus Christ lo wani lo tene na bazengele Thomas, lo tene: “Mbi yeke lege ni, tâ tënë na fini. Zo oko alingbi ti ga na Babâ na mbeni lege nde pëpe, gi na lege ti mbi.”—Jean 14:6.

Buku Jésus: Lege ni, tâ tënë na fini ayeke aidé ande mo ti bâ na lege wa la Jésus ayeke “lege ni”. A yeke gi na lege ti Jésus la si e peut ti ga nduru na Jéhovah Nzapa na yâ ti sambela. Na ndo ni, lo la lo yeke lege so ayeke gue na e ti leke songo ti e na Nzapa (Jean 16:23; Romain 5:8). Ni la, a yeke gi na lege ti lo la si e peut ti duti na nzoni songo na Nzapa.

Jésus ayeke “tâ tënë”. Lo yeke tene gi tâ tënë nga sarango ye ti lo ague oko na tâ tënë so Nzapa afa; a yeke mo bâ mo tene tâ tënë ayeke gi lo wani. Lo sara si gbâ ti aprophétie aga “En na lege ti lo.” (2 aCorinthien 1:20; Jean 1:14). Aprophétie ni a-aidé e ti bâ kota kua so lo yeke na ni na yâ ti ye so Nzapa aleke ti sara.—Apocalypse 19:10.

Jésus ayeke nga “fini.” Na lege ti ngere so lo futa ti zi na azo, so ti tene fini ti lo so ayeke nzoni-kue nga mênë ti lo so lo mû tongana sacrifice, lo sara si e peut ti wara “tâ fini” so ayeke “fini ti lakue lakue”. (1 Timothée 6:12, 19; aÉphésien 1:7; 1 Jean 1:7). Lo yeke fa nga ande so lo yeke “fini” ndali ti gbâ ti azo so akui, na lege so a yeke zingo ande ala na fini ti duti na yâ ti Paradis teti lakue lakue.—Jean 5:28, 29.

E kue e bezoin ti hinga nga ti mä yâ ti kua so Jésus ayeke na ni na yâ ti ye so Nzapa aleke ti sara. Zia si mo wara ngia na ngoi so mo yeke gi ti hinga ye mingi na ndo ti Jésus so ayeke “lege ni, tâ tënë na fini.”