FANI mingi, Jéhovah ahaka lo wani na mara ti berger tongaso. Na yâ ti Bible lo dë bê ti e, lo tene: “Mbi mveni, fade Mbi gi angasangbaga [wala “ataba,” FD] ti Mbi, fade Mbi gi juska Mbi wara ala.”—Ézéchiel 34:11, 12.

Ataba ti Jéhovah ayeke azo wa? Na nduru tënë, a yeke azo so aye Jéhovah nga ayeke voro lo. Bible atene: “Ala ga, e voro lo nga e kuku na gbe ti lo; zia e sara agenou na gbe ti Jéhovah so asara e, ndali ti so lo yeke Nzapa ti e, na e yeke ataba ti benyama ti lo so lo yeke bâ lege ti ala.” (Psaume 95:6, 7, FD). Legeoko tongana avrai taba ayeke mû peko ti berger ti ala, awakua ti Jéhovah aye mingi ti mû peko ti lo tongana Berger ti ala. Ala yeke nzoni-kue? Ên-ën. Na ambeni ngoi, awakua ti Jéhovah aga tongana ‘ataba so yâ ti ala akangbi kirikiri’, ‘ataba so agirisa’, wala  ‘tongana ataba so agirisa lege’. (Ézéchiel 34:12; Matthieu 15:24; 1 Pierre 2:25). Atâa so kue, tongana mbeni zo ahon yongoro na Jéhovah, lo yeke lakue na beku so zo ni ayeke kiri.

Mo bâ so Jéhovah ayeke lakue Berger ti mo? Tongana nyen la Jéhovah afa so lo yeke mbeni Berger laso? Bâ alege ota so afa ni:

Lo yeke mû kobe na e na lege ti yingo. Jéhovah atene: “Fade Mbi fa ndo ti tengo pere na ala na yâ benyama ti nzoni, . . . fade ala lango kâ na yangbo ti nzoni, na fade ala te pere na yâ benyama ti nzoni.” (Ézéchiel 34:14). Jéhovah amanke lâ oko ape ti mû na e apendere kobe nde nde na lege ti yingo na ngoi so alingbi. Mo dabe ti mo na mbeni article, na mbeni diskur wala na mbeni vidéo so akiri tënë na sambela so mo sara ti hunda mungo maboko? Ye so asara si mo hinga biani so Jéhovah ayeke bâ lege ti mo, ni la ape?

Lo yeke bata e nga lo yeke mû maboko na e. Jéhovah atene: “Mbi kiri na ala so agirisa lege ti ala; fade Mbi kanga tere ti ala so tere ti ala a fâ awe, na Mbi sara si ala so anze awara ngangu.” (Ézéchiel 34:16). Jéhovah ayeke mû ngangu na azo so awoko wala azo so gingo bê ahon ndo ti ala. Lo yeke kanga lê ti kä ti ataba ti lo, tongana tere ti ala ason lo yeke mû maboko na ala ti wara sava, peut-être lo yeke sara ni même na lege ti amba ti e aChrétien. Nga, ala so ahon yongoro na lo na ala so peut-être ayeke sara ngangu ti hon ndo ti abango ndo so ayeke na lege ni ape, lo yeke kiri na ala na mbage ti lo.

Lo yeke wa ti e. Jéhovah atene: “Fade Mbi zi ala na ndo kue so ala kangbi dä.” Lo kiri lo tene: “Fade Mbi gi ala so agirisa awe.” (Ézéchiel 34:12, 16). Ti Jéhovah, tongana mbeni taba agirisa, ti lo awe la ape. Tongana mbeni taba agirisa Jéhovah ayeke hinga ni, lo yeke gi lo, nga tere ti lo ayeke nzere tongana lo wara lo (Matthieu 18:12-14). Jéhovah airi atâ wakua ti lo, lo tene: “Ataba ti mbi so mbi yeke bâ lege ti ala.” (Ézéchiel 34:31, FD). Mo kue mo yeke na popo ti ataba so.

Ngbanga ti nyen Jéhovah ayeke gi peko ti mo nga lo tisa mo ti kiri na lo? Ngbanga ti so lo ye ti tene mo duti na ngia. Lo tene so “fade ye ti nzoni atï” na ndo ti ataba ti lo “legeoko tongana ngu so apika.” (Ézéchiel 34:26). Tënë so ayeke gi senge tënë ti yanga ape. Mo wani mo bâ na lê ti mo awe so tënë so ayeke tâ tënë.

Dabe ti mo na anzoni ye so mo wara na ngoi so mo hinga Jéhovah lani. Na tapande, bê ti mo ayeke lani tongana nyen na ngoi so a fa na mo pan apendere tâ tënë na ndo ti iri ti Nzapa nga na aye so lo leke ti sara ndali ti azo? Tere ti mo anzere lani mingi na ngoi so mo bungbi oko na amba ti mo aChrétien na ngoi ti akota bungbi, ni la ape? Tongana mo fa tënë lani legeoko na mbeni ita so abi bê ti lo mingi na mo, mo kiri na yanga-da na nzerengo tere ape?

Mo lingbi ti kiri ti wara ngia so. Awakua ti Nzapa ti ândö asambela, ala tene: “Sara si e kiri na Mo, O [Jéhovah], na fade e kiri na Mo. Mo kiri Mo sara si lâ ti e aga tongana ti giriri.” (Toto ti Jérémie 5:21). Jéhovah akiri tënë lani na sambela ti awakua ti lo so, ala kiri avoro lo nga ala kiri awara ngia ti ala (Néhémie 8:17). Jéhovah ayeke sara nga na mo tongaso.

A yeke ngangu ape na mbeni zo ti tene ni yeke kiri na Jéhovah me sarango ni si. Bâ ambeni kpale so mo lingbi ti wara tongana mo ye ti kiri na Jéhovah nga tongana nyen la mo lingbi ti hon ndo ni.