1. Tongana mo “ga nduru na Nzapa” nyen la ayeke si ande?

JÉHOVAH andoye azo so ayeke voro lo. Tongana mo yeke voro Jéhovah, lo yeke sara tufa na ndö ti mo laso nga na yâ ti ngoi so ayeke ga. Bible atene: “Ala ga nduru na Nzapa, na lo yeke ga ande nduru na ala.”—Jacques 4:8.

2. E lingbi ti ga nduru na Nzapa tongana nyen? Na a yeke sara nyen na ndö ti asambela ti e?

² Ti tene mo ga nduru na Nzapa, mo doit ti manda Bible nga ti sara ye alingbi na ni. Tongana mo sambela Jéhovah alingbi na ye so bê ti lo aye, lo yeke mä asambela ti mo na lo yeke kiri tënë na ni. Bazengele Jean atene: “Confiance so e yeke na ni na lo ayeke so: Atâa ye wa la e hunda, tongana a gue oko na ye so bê ti lo aye, lo yeke mä e. Tongana e hinga so atâa nyen la e hunda na lo, lo yeke mä e, e hinga nga so e yeke wara biani aye so e hunda ni ngbanga ti so e hunda ni na lo.”—1 Jean 5:14, 15.

3-7. E lingbi ti wara ndara so alondo na Nzapa tongana nyen? Nga a peut ti mû maboko na e tongana nyen?

³ Nga, tongana mo ga nduru na Nzapa, lo yeke mû na mo ndara ti hon ndö ti akpale ti lâ oko oko. Bible atene: “Tongana ndara amanke mbeni zo na popo ti ala, zia lo ngbâ ti hunda ni na Nzapa.”—Jacques 1:5.

⁴ Tongana nyen la ndara so alondo na Nzapa apeut ti mû maboko na mo? Mbeni ye oko ayeke so, a yeke mû maboko na mo ti hinga aye so Jéhovah ake. Nga a yeke fa na mo ngbanga ti nyen la aye ni so ayeke sioni na nyen la mo peut ti sara ti kpe aye ni so. So mo hinga tongaso apeut ti bata mo si mo tï pëpe na yâ ti mingi ti akpale so azo ayeke wara. Na tapande, ti sara ye alingbi na wango ti Nzapa so ahunda na awakua ti lo ti kpe lango sioni abata ala si ala mû pëpe ngo so zo a ye ni ape, ala wara pëpe akobela ti koli na wali, ala sara pëpe mbeni mariage so ala te gï vundu na yâ ni wala so ahunzi na divorce.

⁵ Mbeni ye nde wa la ndara so alondo na Nzapa apeut ti sara na mo? A peut ti mû lege na mo ti wara ye ti nzoni mingi na yâ ti fini ti mo. A peut ti mû maboko na mo ti mû adesizion ti ndara na yâ ti aye so mo yeke sara na yâ ti gigi ti mo ti lâ oko oko, na tapande sarango kua nzoni na nginza ti mo. A yeke aidé mo ti tomba peko ti aye so ayeke tâ ye biani nga ti kpe aye so ayeke asenge senge ye so aninga ape.

⁶ Ndara so alondo na Nzapa alingbi nga ti mû maboko na mo ti duti na nzoni songo na amba ti mo. Ti duti na ngia mingi na yâ ti sewa ti mo. Ti lë kpengba songo ti kamarade so aninga, ti tene azo ane mo, même azo so avoro Nzapa ape.

⁷ Na ndö ni, ti wara ndara so alondo na Nzapa ayeke sara si lê ti mo azi. A yeke mû maboko na mo ti hon ndö ti akpale ti gigi nga na aye ti vundu. A yeke sara si mo duti nga na nzoni bango ndo na ndö ti gigi ti kekereke, na mo yeke duti na nzoni seni ti li nga na ti terê.—aProverbe 14:30; Ésaïe 48:17.

8. Tongana mo voro Nzapa, mo yeke sara ande mbeto ti nyen ape?

⁸ Tongana mo voro tâ Nzapa, mo yeke sigi na gbe ti ambeto so ayeke gbu azo so avoro lo ape so. So mo hinga so akuâ ayeke na yâ ti dû  ti kuâ, na ala hinga ndo ape, mo yeke sara mbeto ti ala ape. Nga grâce na beku so mo yeke na ni na zendo ti Nzapa ti zingo akuâ, mbeto ti tene mo kui ayeke sara mo ape. Nga so mo hinga so Nzapa ayeke na ngangu ahon aye kue, mbeto ti likundu wala ti tënë ti yorö ayeke sara mo oko ape.—Jean 8:32.

9-11. Azo wa la ayeke duti na yâ ti Paradis, na azo wa la ayeke duti dä pëpe?

⁹ Tongana mo ga nduru na Nzapa, mbeto ti ye so ayeke si kekereke ayeke sara mo ape. Tongana ti so e bâ fade awe, mingi ti akpale so e yeke bâ na ndö ti sese laso, Bible afa tënë ni kozo awe. Jéhovah atene na e so aye ni so ayeke ninga ape. Na yâ ti kete ngoi, Royaume ti Nzapa ayeke sara si sese aga paradis.—Luc 21:10, 11, 31; 23:43.

¹⁰ Gï azo so aga nduru na Jéhovah na avoro lo la si ayeke duti ande na yâ ti Paradis. Bible atene: “Na yâ ti kete ngoi, azo ti sioni ayeke duti dä encore ape; mo yeke bâ ande place so ala yeke lani dä, me ala yeke duti dä encore ape. Me azo so asara terê ti ala kete, sese ayeke ga ye ti ala, na ala yeke duti na ngia mingi na yâ ti siriri so amû ndo.”—Psaume 37:10, 11.

¹¹ Azo so ake na mbana ti sara ye alingbi na andia ti Nzapa so ayeke mbilimbili ayeke girisa ande fini ti ala biaku biaku (2 aThessalonicien 1:8, 9). Ala yeke ngbâ encore ape. Ala na Satan nga na adémon ti lo ayeke wara kuâ ti lakue lakue (Apocalypse 20:10, 14). Me, azo so amanda ye na ndö ti Jéhovah nga avoro lo la ayeke wara ngia mingi na yâ ti Paradis na ndö ti sese.

12. Bible atene nyen na ndö ti gigi ti kekereke?

¹² Jéhovah aleke apendere ye ndali ala so andoye lo! Bâ gï ye so Tënë ti lo afa na ndö ti fini na yâ ti Paradis na sese ma:

• Gbâ ti kobe ti tengo ni: “Alê ti kobe ayeke dü mingi na ndö ti sese; a yeke sigi gbani gbani na li ti ahoto.”—Psaume 72:16.

• Pendere da: “Azo ayeke leke ada, na ala yeke lango na yâ ni.”—Ésaïe 65:21.

• Pendere kua ti sara: “Ala ayeke wara ngia na yâ ti kua so ala sara na maboko ti ala. Ala yeke bâ pasi gï senge senge pëpe.”—Ésaïe 65:22, 23.

• Kobela ayeke dä encore ape: “Zo ti kodro ni ayeke tene ande pëpe: ‘Terê ti mbi ason.’”—Ésaïe 33:24.

• Terê so abuba ayeke dä encore ape: “Na ngoi ni so, lê ti awaziba ayeke zi, nga azo so mê ti ala akanga ayeke mä ndo. Na ngoi ni so, azo so gere ti ala abuba ayeke huru tongana lekpa, nga azo so yanga ti ala akanga ayeke dekongo na ngia.”—Ésaïe 35:5, 6.

• Pasi, vundu na kuâ ayeke dä encore ape: “[Nzapa a]yeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”—Apocalypse 21:4.

• Bira ayeke dä encore ape: “[Nzapa a]yeke sara si abira ahunzi na ndö ti sese kue.”—Psaume 46:10.

• Fini ti lakue lakue: “Sese ayeke ga ande ye ti azo ti mbilimbili, na ala yeke ngbâ na ndö ni lakue lakue.”—Psaume 37:29.

13. Gï zo wa la alingbi ti sara si sese so aga paradis, na ngbanga ti nyen?

¹³ Azo apeut ti sara aye so lâ oko ape, me Jéhovah apeut ti sara aye kue so lo sara tënë ni. Ye oko apeut ti kanga lege pëpe na ye so lo ye ti sara. Bible atene: “Mbeni ye ti kara Nzapa ayeke dä pëpe.”—Luc 1:37.

14. Tongana nyen la mo lingbi ti komanse ti tambela na ndö ti lege so ague na fini ti lakue lakue?

¹⁴ Na lege ti aTémoin ti lo, Jéhovah ayeke mû na azo na ndo kue lege ti “lï na kete yanga ti gbagba” ni na ti tambela na ndö ti lege so ague na fini ti lakue lakue. Zia si mo duti na popo ti azo so ayeke na ngia na so ayeda na tisango ndo so. Zia mo duti na yâ ti tâ bungbi ti vorongo Nzapa na mo wara tufa ti Jéhovah teti lakue lakue!—Matthieu 7:13, 14.