ZO WA ayeke tâ nzoni wakua ahon awakua kue ti Nzapa?— Ni la, a yeke Jésus Christ. Ti mo, e lingbi ti ga tongana lo?— Biani, Bible atene so lo zia tapande ti tene e mû pekoni. Lo hunda nga na e ti ga adisciple ti lo.

Ti ga disciple ti Jésus aye ti tene nyen? Mo hinga ni?— A ye ti tene ye mingi. Kozoni kue, a lingbi e mä lo. Me a ngbâ gi ge pëpe. A lingbi nga e mä na bê biani na atënë ti lo. Tongana e mä na bê na ni, e yeke sala ande ye so lo tene na e ti sala.

Azo mingi atene so ala mä na bê na Jésus. Ti mo, ala kue ayeke biani adisciple ti lo?— Oko pëpe, mingi ti ala ayeke adisciple ti lo pëpe. Ala yeke gue peut-être na église. Me mingi ti ala amû ngoi lâ oko pëpe ti manda ye so Jésus afa. Biani, gi azo so amû peko ti tapande ti Jésus si ayeke adisciple ti lo.

Zia e sala tënë na ndo ti ambeni zo so ayeke adisciple ti Jésus tongana lo yeke lani na ndo ti sese ge. Oko ti akozo zo so aga adisciple ti Jésus ayeke Philippe. Philippe ague awara kamarade ti lo Nathanaël (so a hiri nga lo Barthélemy). Bâ, lo la ayeke duti na gbe ti keke so. Tongana Nathanaël aga na tele ti Jésus, Jésus atene: “Bâ! tâ zo ti Israël so tënë ti handa ayeke na yâ lo pëpe!” Li ti Nathanaël akpe kue, lo tene: “Mo hinga mbi na ndo wa?”

 Jésus atene: ‘Na ngoi so mo yeke fade na gbe ti keke ti figue, kozoni si Philippe ahiri mo, mbi bâ mo.’ Bê ti Nathanaël adö na mango so Jésus ahinga tâ ndo so lo yeke fade dä, tongaso lo tene: “Mo yeke Molenge Ti Nzapa! Mo yeke Gbia ti Israël!”​—Jean 1:49.

Me kozoni si Philippe na Nathanaël aga adisciple ti Jésus, ambeni zo aga ni awe. A yeke azo tongana André na ita ti lo Pierre, nga Jean na peut-être Jacques, ita ti Jean (Jean 1:35-51). Ye oko, kete na pekoni, ala osio so kue akiri na yâ kua ti ala ti gingo susu. Mbeni lâ, tongana Jésus ayeke tambela na yanga ti Ngu ti Galilée, lo bâ Pierre na André na bingo gbanda ti ala na yâ ti ngu. Jésus adekongo na mbage ti ala: ‘I mû peko ti mbi.’

Yongoro kete, Jésus abâ Jacques na Jean. Ala yeke na yâ ti mbeni ngö na tele ti babâ ti ala. Ala yeke leke agbanda ti ala. Jésus ahiri ala  ti mû peko ti lo nga. Tongana fade mo la si Jésus ahiri mo, mo yeke sala nyen? Mo yeke gue na peko ti lo gi na ngoi ni so?— Akoli so ahinga Jésus nzoni. Ala hinga so Nzapa la atokua lo. Ni la, gi na ngoi ni so lo hiri ala, ala zia kua ti ala ti gingo susu na ala mû peko ti Jésus.​—Matthieu 4:18-22.

Tongana akoli so aga adisciple ti Jésus, ala sala lakue gi ye so ayeke nzoni?— Oko pëpe. Mo dabe ti mo peut-être so akoli so apapa même na popo ti ala ti hinga zo wa si ayeke kota ahon atanga ni kue. Me ala mä Jésus, na ala duti lani ndulu ti changé. Tongana e yeke ndulu ti changé, e nga kue e lingbi ti ga adisciple ti Jésus.

Jésus ahiri azo nde nde ti ga adisciple ti lo. Mbeni lâ, mbeni mokonzi, zo ti nginza, aga na tele ti Jésus, lo hunda lo tongana nyen ti wara fini ti lakue lakue. Tongana zo ti nginza ni atene so ngbele ye so lo de kete molenge lo yeke bata akomandema ti Nzapa, Jésus atene na lo: ‘Ga, mû peko ti mbi.’ Mo hinga ye so koli ni asala?—

Tongana koli ni amä so ti ga disciple ti Jésus ayeke kota ahon dutingo na nginza mingi, mawa ahon ndo ti lo. Lo ga disciple ti Jésus pëpe, ngbanga ti so lo ye nginza ti lo mingi ahon Nzapa.​—Luc 18:18-25.

Tongana Jésus afa tënë a sala ngu oko na ndambo tongaso awe, lo soro azo 12 na popo ti adisciple ti lo ti ga abazengele. Abazengele ayeke azo so Jésus atokua ala ti sala mbeni kua so ayeke nde. Mo hinga iri ti ala?— Zia e bâ wala e lingbi ti manda ni. Bâ afoto ti ala ge, na bâ wala mo lingbi ti di iri ti ala. Na pekoni, tara ti di iri ti ala na li ti mo.

Na nda ni, mbeni oko ti abazengele 12 so aga sioni. A yeke Judas Iscariote. Na pekoni, a soro mbeni disciple ti Jésus  ti ga bazengele. Iri ti lo ayeke nyen?— A yeke Matthias. Na pekoni, Paul na Barnabas nga kue aga abazengele, me ala yeke na yâ bungbi ti abazengele 12 so pëpe.​—Kusala 1:23-26; 14:14.

Tongana ti so e manda na chapitre 1 ti buku so awe, bê ti Jésus ayeke nga mingi na ndo ti akete molenge. Ngbanga ti nyen?— Ngbanga ti so lo hinga lo tene ala nga kue alingbi ti ga adisciple ti lo. Mingi ni, amolenge alingbi ti tene ambeni tënë so ayeke pusu akota zo so amä ni ti duti na nzara ti manda ye mingi na ndo Kota Wafango ye.

Gbâ ti awali aga nga lani adisciple ti Jésus. Ambeni atambela legeoko na lo tongana lo yeke  gue na ambeni kodoro ti fa tënë kâ. Na popo ti ala, a wara Marie ti Magdala, Jeanne, na Susanne. Peut-être ala mû nga maboko ti tö kobe na ti sukula abongo ti lo.​—Luc 8:1-3.

Mo ye ti ga mbeni disciple ti Jésus?— Girisa pëpe, gi tenengo na yanga senge so e yeke mbeni disciple ti lo asala si e ga disciple ni pëpe. A lingbi e sala ye tongana disciple ti lo na ndo kue so e yeke dä, gi pëpe tongana e gue na abungbi. Mo lingbi ti fa ambeni ndo so a yeke kota mingi ndali ti e ti sala ye tongana disciple ti Jésus dä?—

A lingbi e sala ni na kodoro. Me na ekole nga. Mbeni ye so a yeke nzoni mbi na mo e girisa ni lâ oko pëpe a yeke so ti duti tâ disciple ti Jésus, a lingbi e sala ye tongana lo na yâ lango ni kue, lâ na lâ, atâa ndo so e yeke dä.