MBENI zo anzi ye na tïtî mo awe?— A sala nyen na ndo ti mo?— Zo so anzi ye ni so ayeke mbeni zo ti nzi, na zo oko aye tënë ti zo ti nzi pëpe. Ti mo, zo ayeke ga zo ti nzi tongana nyen? A dü lo dungo tongaso?—

E manda fade awe so a dü azo na yâ ti siokpari. Tongaso e kue e yeke mbilimbili-kue pëpe. Me a dü zo lâ oko pëpe zo ti nzi. Zo ti nzi alingbi ti londo na yâ ti mbeni nzoni sewa. Babâ na mama ti lo, na aita ti lo kue alingbi ti duti anzoni zo. Me nzara ti warango aye tongana nginza na ye so nginza alingbi ti vo alingbi ti sala si lo ga mbeni zo ti nzi.

Na bê ti mo, zo wa la ayeke kozo zo ti nzi?— Zia e bâ. Kota Wafango ye ahinga zo so tongana lo yeke lani na yayu. Zo ti nzi so ayeke ândö mbeni ange. Me teti so a-ange kue so Nzapa asala ayeke mbilimbili-kue, a sala tongana nyen si ange so aga zo ti nzi?— Tongana ti so e manda na chapitre 8 ti buku so awe, lo sala nzara ti mbeni ye so ayeke ti lo pëpe. Mo dabe mo na ye ni so?—

Na peko ti so Nzapa aleke kozo koli na kozo wali, ange so aye si ala voro lo. Nzapa aleke zo ti tene lo voro ange ni so pëpe. Me a yeke ti voro lo Nzapa. Me ange so anzi vorongo so! Na pusungo Adam na Eve ti voro lo, ange ni aga zo ti nzi. Lo ga Satan Zabolo.

Nyen la ayeke pusu zo ti ga zo ti nzi?— A yeke nzara ti wara ye so ayeke ti lo pëpe. Nzara so alingbi ti duti tâ ngangu mingi si  même zo ti nzoni ayeke sala aye ti sioni. Na ambeni ngoi, azo so aga azo ti nzi ayeke changé bê ti ala lâ oko pëpe ti sala ye so ayeke nzoni. Mbeni oko ti ala ayeke lani mbeni bazengele ti Jésus. Iri ti lo ayeke Judas Iscariote.

Judas ahinga lani so a yeke sioni ti nzi, ngbanga ti so a fa Ndia ti Nzapa na lo na ngoi so lo de kete molenge. Lo hinga so na yayu kâ, Nzapa asala lani tënë na azo ti lo ge na sese, lo tene: ‘A lingbi mo nzi pëpe.’ (Exode 20:15). Tongana Judas akono awe, lo tingbi na Kota Wafango ye na lo ga mbeni disciple ti lo. Na pekoni, Jésus asoro lo ti ga mbeni oko ti abazengele ti lo 12.

Jésus na abazengele ti lo ayeke tambela lani legeoko. Ala yeke te ye legeoko. Na ala bata nginza ti ala kue na yâ ti caisse oko. Jésus amû caisse so na Judas ti bata ni. Nginza so ayeke ti Judas pëpe. Me mo hinga ye so lo sala ngoi kete na pekoni?—

Atâa so a hunda lo ti sala ni pëpe, lo komanse ti mû nginza ti yâ ti caisse ni. A yeke na ngoi so zo oko abâ lo pëpe, na lo yeke gi même lege ti mû gbâ ni. Lo komanse ti bi bê ti lo gi na ndo ti nginza. Zia e bâ ye so sioni nzara so ague na lo ti sala ngoi kete kozoni si a fâ Kota Wafango ye.

Marie, ita ti Lazare so ayeke kamarade ti Jésus, amû mbeni mafuta so lo vo na kota nginza, lo tuku ni na gere ti Jésus. Me ye so aso bê ti Judas. Ngbanga ti nyen?— Lo tene so a lingbi a kä mafuta so na a mû pata ni na azo ti mawa. Me ti tâ tënë ni, lo ye lani ti wara gbâ ti nginza na yâ caisse ni si lo lingbi ti nzi ni.​—Jean 12:1-6.

Jésus atene na Judas ti zia Marie kpô, teti lo sala ye na nzoni bê mingi. Tënë so anzere na Judas pëpe. Tongaso lo gue lo bâ amokonzi ti vorongo, so ayeke lani awato ti Jésus. Amokonzi ni  so ayeke gi lani lege ti gbu Jésus, me ala ye ti gbu lo na bï si azo abâ ala pëpe.

Tongaso, Judas atene na aprêtre ni: ‘Tongana ala mû na mbi nginza, mbi yeke fa na ala tongana nyen ala lingbi ti gbu Jésus. Ala yeke mû na mbi oke?’

Aprêtre ni atene na lo: ‘E yeke mû na mo alê ti nginza ti argent bale-ota.’​—Matthieu 26:14-16.

Judas amû nginza ni. A yeke tâ gi tongana lo kä Kota Wafango ye na akoli so! Mo lingbi ti bâ mbeni zo na salango ye ti sioni tongaso?— A yeke ye so ayeke si ka na zo so aga zo ti nzi si lo nzi nginza. Lo ye nginza ahon azo wala même Nzapa.

Mo yeke tene peut-être, ‘Mbi ngbâ ti ye lakue Jéhovah Nzapa mingi ahon tanga ti aye kue.’ So nzoni. Tongana Jésus asoro lani Judas ti ga bazengele ti lo, Judas atene peut-être nga tongaso. Ambeni zo so aga azo ti nzi atene peut-être lani tongaso nga. Zia e bâ tapande ti ambeni.

Acan ayeke lani mbeni wakua ti Nzapa. Lo duti na fini ngu mingi kozoni si a dü Kota  Wafango ye. Acan abâ mbeni pendere bongo, lo bâ lor, na ambeni lê ti nginza ti argent. Ala yeke ti lo pëpe. Bible atene so ala yeke ti Jéhovah ngbanga ti so a mû ni na tïtî awato ti azo ti Nzapa. Me teti so Acan asala nzara ni mingi, lo nzi ni.​—Josué 6:19; 7:11, 20-22.

Bâ mbeni tapande ni nde. Giriri, Jéhovah asoro David ti ga gbia na ndo azo ti Israël. Mbeni lâ, David akomanse ti bâ Bath-Séba, mbeni pendere-wali. Lo bâ lo ngbii si lo ye ti mû lo na wali. Me lo yeke wali ti Urie. A yeke nzoni David asala lani nyen?—

A yeke nzoni lani lo zi na bê ti lo nzara ti mungo Bath-Séba. Me a yeke ye so lo sala pëpe. Tongaso, David amû lo na da ti lo. Na pekoni, lo sala si a fâ Urie. Ngbanga  ti nyen David asala mara ti sioni ye tongaso?— Ngbanga ti so lo ngbâ lani ti sala nzara ti wali ti mbeni koli nde.​—2 Samuel 11:2-27.

Mawa asala David na lo changé bê ti lo. Ndali ni, Jéhovah azia lo ngbâ na fini. Me na pekoni David awara gbâ ti akpale. Molenge ti lo Absalom aye ti ga gbia na place ti lo. Tongaso, tongana azo aga ti bâ David, Absalom ayeke gbu ala na kate na lo su ngbangba ti ala. Bible atene: “Absalom ahanda [wala anzi bê ti] azo ti Israël si bê ti ala kue aye lo.” Lo sala si azo so aye si lo duti gbia na place ti David.​—2 Samuel 15:1-12.

Nzara ti mbeni ye asala mo ngangu awe tongana Acan, David, na Absalom?— Tongana ye ni so ayeke ti mbeni zo nde, ti mû sân ti hunda ayeke nzingo ye la. Mo dabe ti mo na ye so kozo zo ti nzi, Satan, aye lani ti wara?— Lo ye lani ti tene azo avoro lo, me Nzapa pëpe. Tongaso Satan anzi ye tongana lo pusu Adam na Eve ti mä yanga ti lo.

Tongana mbeni zo ayeke na mbeni ye, a yeke na lo ti fa zo wa si alingbi ti mû ni. Na tapande, mo gue peut-être na da ti ambeni molenge na mo na ala ayeke sala ngia kâ. Ti mû mbeni ye kâ na ti ga na ni na da ti mo, a yeke na lege ni?— Oko pëpe, gi tongana babâ wala mama ti ala amû yanga na mo si. Tongana mo mû mbeni ye sân ti hunda ala, so ayeke nzingo ye la.

Nyen la alingbi ti sala si mo ye ti nzi?— A yeke nzara ti warango mbeni ye so ayeke ti mo pëpe. Même tongana zo oko abâ mo na mungo ni pëpe, zo wa la abâ mo?— Jéhovah Nzapa. A lingbi e girisa pëpe so Nzapa ake nzi. Tongaso, tongana mo ye Nzapa na mo ye amba ti mo zo, mo yeke ga ande zo ti nzi lâ oko pëpe.