MO YEKE sala ka tënë na Jéhovah Nzapa?— Lo ye si mo sala tënë na lo. Tongana mo sala tënë na Nzapa, so ayeke sambela la. Lani, Jésus ayeke sala lakue tënë na Babâ ti lo ti yayu. Ngoi na ngoi tongana lo yeke sala tënë na Nzapa, lo ye ti ngbâ gi lo oko. Bible atene so mbeni lâ, ‘Lo gue na li ti hoto ti sambela. Atâa so ndo avuko awe, lo ngbâ kâ gi lo oko.’​—Matthieu 14:23.

Mo lingbi ti sambela Jéhovah gi mo oko na ndo wa?— Peut-être mo lingbi ti sala tënë mo oko na Jéhovah na bï kozoni si mo lango. Jésus atene: “Tongana mo sambela, mo gue na yâ da ti mo, mo kanga yanga ti da ti mo si mo sambela Babâ ti mo.” (Matthieu 6:6). Mo yeke sambela lakue Jéhovah na bï kozoni si mo lango?— A yeke nzoni mo sala tongaso.

Jésus asambela nga tongana azo ayeke na tele ti lo. Tongana  kamarade ti lo Lazare akui, Jésus asambela na azo so ayeke na tele ti lo na ndo so a lu Lazare dä (Jean 11:41, 42). Jésus ayeke sambela nga tongana lo bungbi na adisciple ti lo. Mo yeke gue na abungbi so a yeke tene sambela dä?— Kâ mbeni kota zo ayeke sambela lakue. Dengi mê nzoni ti mä ye so lo tene, ngbanga ti so lo yeke sala tënë na Nzapa ndali ti mo. Na pekoni, mo lingbi ti tene “Amen” na hunzingo ti sambela ni. Mo hinga nda ti tenengo “Amen” na peko ti mbeni sambela?— A ye ti tene so sambela ni anzere na bê ti mo. Aye ti tene so mo yeda na ni, na mo ye si a duti nga sambela ti mo.

Jésus asambela nga na ngoi ti tengo kobe. Lo mû merci na Jéhovah ndali ti kobe so lo wara. Mo yeke sambela lakue kozoni si mo te kobe?— Kozoni si e te kobe, a yeke nzoni ti tene e mû merci na Jéhovah ndali ni. Mbeni zo alingbi ti tene mbeni sambela tongana mo na lo ayeke te kobe legeoko. Ka tongana mo oko si mo yeke te kobe, wala mo yeke te kobe na azo so amû merci na Jéhovah pëpe, mo yeke sala nyen?— A lingbi mo tene sambela ti mo, mo mveni.

A lingbi mo sambela lakue na kota go? Jéhovah alingbi ti mä mo tongana mo sambela na yâ bê ti mo?— E lingbi ti hinga ni  na lege ti ye so asi lani na Néhémie. Lo yeke mbeni wakua ti Jéhovah. Lo sala kua na yâ da ti Artaxerxès, gbia ti Perse. Mbeni lâ, tongana Néhémie amä so a kungbi kue na sese gbagba ti Jérusalem, kota kodoro ti azo ti mara ti lo, vundu ahon ndo ti lo.

Tongana gbia ni ahunda na Néhémie ngbanga ti nyen vundu ahon ndo ti lo tongaso, Néhémie atene kozoni mbeni sambela na yâ bê ti lo. Na pekoni, lo fa nda ti vundu ti lo na gbia ni, na lo hunda lo wala lo lingbi ti gue na Jérusalem ti leke gbagba ni. Ye nyen asi?—

Nzapa akiri tënë na sambela ti Néhémie. Gbia ni atene so lo lingbi ti gue! Gbia ni amû même na Néhémie gbâ ti akeke ti leke na gbagba ni. Biani, Nzapa alingbi ti kiri tënë na sambela ti e,  même tongana e tene ni na yâ bê ti e.​—Néhémie 1:2, 3; 2:4-8.

Gbu li fadeso na ndo ye so. A lingbi mo ba li ti mo na sese tongana mo yeke sambela? A lingbi mo kuku na sese? Mo tene ti mo nyen?— Na ambeni ngoi, Jésus akuku na sese tongana lo yeke sambela. Na ambeni ngoi nde, lo luti. Nga, ambeni ngoi ayeke dä so lo mû lê ti lo na nduzu tongana lo yeke sambela, tongana ti so lo sala na ngoi so lo sambela ndali ti Lazare.

Tongaso, ye so afa nyen?— A fa so lutingo ti mo ayeke kota ye pëpe. Na ambeni ngoi a yeke nzoni ti ba li ti mo na ti kanga lê ti mo. Na ambeni ngoi nde, mo lingbi même ti kuku, tongana ti so Jésus asala lani. Me girisa pëpe, e lingbi ti sambela Nzapa na ngoi kue, atâa na kota lâ wala na bï, na lo yeke mä e. Kota ye ni ayeke so e mä na bê biani so Jéhovah ayeke mä e. Mo mä na bê so Jéhovah ayeke mä sambela ti mo?—

Atënë wa a lingbi e tene na yâ sambela ti e na Jéhovah?— Tene na mbi: Tongana mo sambela, mo yeke tene nyen na Nzapa?— Jéhovah amû na e gbâ ti anzoni ye, na a yeke na lege ni ti mû merci na lo ndali ni, ni la ape?— E lingbi ti mû merci na lo ndali ti kobe so e te. Me mo mû merci na lo awe ndali ti pendere lê ti nduzu, afini keke, nga na apendere fleur?— Lo nga la lo sala ala.

Mbeni lâ, adisciple ti Jésus ahunda lo ti fa na ala tongana nyen ti sambela. Tongaso, Kota Wafango ye afa ni na ala, lo fa na ala akota ye wa a lingbi ala sambela  ndali ni. Mo hinga aye ni so?— Mû Bible ti mo, na zi ni na Matthieu chapitre 6. Na versê 9 ti si na 13, e yeke diko ye so mingi ti azo ahiri ni sambela ti Babâ ti e so ayeke na yayu. Zia e diko ni.

Ge so, Jésus afa na e ti sambela teti iri ti Nzapa. Lo tene ti sambela si iri ti Nzapa aga nzoni-kue. Iri ti Nzapa ayeke nyen?— Ni la, a yeke Jéhovah, na a lingbi e ye iri so.

Use ni, Jésus afa na e ti sambela ti tene Royaume ti Nzapa aga. Royaume so ayeke kota ye ngbanga ti so a yeke ga ande na siriri nga na paradis na ndo ti sese.

Ota ni, Kota Wafango ye atene so a lingbi e sambela ti tene a sala ye so bê ti Nzapa aye na ndo ti sese legeoko tongana ti so a sala na yayu. Tongana e sambela ndali ni, a yeke nzoni e sala ye so Nzapa aye.

Na pekoni, Jésus afa na e ti sambela ndali ti kobe ti lâ oko oko. Lo tene nga so a yeke nzoni e hunda pardon na Nzapa ndali ti asioni ye so e sala, nga ti tene lo pardone e. Me kozoni si lo sala ni, a lingbi e pardone azo tongana ala sala ye ti sioni na e. Mo yeke pardone azo hio?—

Na nda ni, Jésus atene so a yeke nzoni e sambela ti tene Jéhovah Nzapa abata e na gbele wato-sioni, Satan Zabolo. Bâ, aye so kue ayeke anzoni ye so e lingbi ti sambela Nzapa ndali ni.

A lingbi e mä na bê so Jéhovah ayeke mä sambela ti e. E lingbi ti hunda lo ti mû maboko na e, me a yeke nga nzoni ti tene e ngbâ lakue ti mû merci na lo. Tongana e tene tâ tënë na yâ sambela, nga tongana e hunda na lo ti fa na e ye ti mbilimbili so a lingbi e sala, bê ti lo ayeke na ngia. Lo yeke mû na e aye so kue. Mo mä na bê na ni?—