TONGANA Jésus akono na lo mä tongana nyen Nzapa abata lani lo tongana lo de kete molenge, ti mo, lo sambela Jéhovah ti mû merci na lo?— Na peko ti so lo mä ye so Marie na Joseph asala ti bata lo na fini na guengo na lo na Egypte, Jésus atene lani nyen na ala?—

Biani, Jésus ayeke kete molenge mbeni pëpe. Lo yeke nga na ndo ti sese mbeni pëpe. Me na li ti ambeni zo, Jésus ayeke gi mbeni kete molenge so a zia lo na yâ ti mbeni caisse ti tengo na kobe ti anyama, mo bâ tongaso ape?— A yeke ye so e yeke bâ na ngoi ti Noël, so na ando mingi, a yeke bâ adessin so a sala Jésus dä tongana mbeni bébé.

Atâa so Jésus ayeke na ndo ti sese mbeni pëpe, lo yeke lakue na fini?— Biani, a zingo lo na kuâ, na fadeso lo yeke mbeni ngangu Gbia na yayu kâ. Ti mo, lo lingbi ti sala nyen ti bata azo so ayeke sala kusala ti lo?— Tongana Jésus ayeke lani na sese ge, lo fa tongana nyen lo lingbi ti bata azo so aye lo. Zia e bâ tongana nyen lo fa ni na ngoi so lo na adisciple ti lo ayeke lani na yâ ti mbeni ngö.

 Jésus afa ye na azo na tele ti Ngu ti Galilée. Yongo ti ngu ni asi ndulu na kilomètre 20, nga konongo ti lê ni asi kilomètre 12. Ndo avuko awe, tongaso lo tene na adisciple ti lo: ‘Zia e gue na mbage ti ngu ni.’ Ala mû ngö na ala komanse ti fâ ngu ni. Jésus awoko kue, lo gue lo lango na ngbonda ti ngö ni na ndo ti mbeni ye. A ninga pëpe, lango ahon na lo.

Adisciple ni alango ti ala pëpe si ala fa lege na ngö ni. Ye kue atambela nzoni. Me a ninga pëpe, mbeni kota pupu akomanse ti sala. Pupu ni asala ngangu mingi, na lê ti ngu ni akomanse ti ga kota kota. Yeke yeke angu ni ayeke pika tele ti ngö ni, na ala komanse ti tï na yâ ni.

Mbito asala adisciple ni, ala bâ ti ala atene ala yeke gue ti lï ngu. Me mbito asala ti lo Jésus pëpe. Lo ngbâ ti lango gi na ngbonda ti ngö ni. Adisciple ni abâ gbä ala gue azingo lo, ala tene: ‘Wafango ye, Wafango ye, sö e; kota pupu so aye ti fâ e.’ Tongaso, Jésus alondo na lo sala tënë na pupu nga na angu ni, lo tene: ‘Kaï! Duti kpô!’

 Mo ye ti bâ, pupu ni akaï, na ngu ni aduti kpô. Li ti adisciple ni kue akpe. Ala de ti bâ mara ti ye tongaso lâ oko pëpe. Ala komanse ti tene na popo ti ala: ‘So zo wa si asuku na pupu na ngu si ala kue amä yanga ti lo so?’​—Luc 8:22-25; Marc 4:35-41.

Jésus ayeke zo wa? Mo hinga?— Lo wara kota ngangu ti lo ni na ndo wa?— A lingbi adisciple ti lo asala mbito pëpe tongana Jésus ayeke na tele ti ala, teti lo yeke tongana tanga ti azo pëpe. Lo lingbi ti sala apendere ye so zo oko alingbi ti sala ni pëpe. Zia mbi fa na mo mbeni ye nde so lo sala na gbele mbeni ngu so pupu asala dä ngangu.

Mbeni lâ, tongana lâ ayeke gue ti kui, Jésus atene na adisciple ti lo ti mû ngö na ti gue na mbeni mbage ti ngu ni. Jésus angbâ ti lo na peko, tongaso lo gue na hoto lo oko. Kâ, ndo ni ayeke kpô mingi si lo lingbi ti sambela Babâ ti lo, Jéhovah Nzapa.

 Adisciple ni amû ngö ni na ala komanse ti fâ ngu ni. Me a ninga pëpe, pupu akomanse ti sala. Pupu ni asala ngangu ngangu. Me ndo avuko awe. Tongaso, akoli ni azi lê ti bongo ti ngö ni, ala komanse ti pusu ngö ni na kaï ti ala. Me ala gue yongoro pëpe teti pupu ni ayeke ga gango na lê ti ala. Ngu ni alondo na nduzu ngangu, ayengi ngö ni kirikiri na atuku nga na yâ ti ngö ni. Akoli ni asala ngangu ti si na yanga ti sese ni, me kue gbä.

Jésus ade gi na hoto kâ. A sala ngoi mingi awe si lo yeke kâ. Me fadeso lo yeke bâ so adisciple ti lo ayeke na yâ ti kota kpale. Tongaso, lo gue na yanga ti ngu ni. Jésus aye ti mû maboko na adisciple ti lo, ndali ni lo komanse ti tambela na ndo lê ti ngu ni so ayeke kirikiri, lo yeke gue na mbage ti ala!

Tongana mo tara ti tambela na lê ti ngu, nyen la ayeke si na mo?— Mo yeke linda, na mo yeke nyon ngu. Me Jésus ayeke ti lo nde. Ngangu ti lo ayeke nde. Lege ti tene Jésus asi na ngö ni ayo mingi. Ni la, a yeke ndulu na yanga ti ndapelele si adisciple ti lo abâ lo na gango ni na mbage ti ala. Me li ti ala kue akpe na ye so ala yeke bâ. Mbito ahon ndo ti ala, na ala dekongo. Me Jésus atene na ala: ‘Ala sala mbito pëpe, mbi la.’

Gi na ngoi so Jésus ague na yâ ti ngö ni, pupu ni akaï. Li ti adisciple ni akiri akpe kue. Ala tï na gere ti Jésus na ala tene: “Biani, Mo yeke Molenge Ti Nzapa.”​—Matthieu 14:22-33; Jean 6:16-21.

Ti duti na ngoi ni kâ na ti bâ Jésus na salango aye tongaso ayeke duti nzoni ape?— Mo hinga ngbanga ti nyen Jésus asala amiracle so?— Lo sala ni ngbanga ti so lo ye tënë ti adisciple ti lo na lo ye ti mû maboko na ala. Me lo sala nga aye so ti fa kota ngangu so lo yeke na ni, na so lo yeke sala ande na kusala tongana lo ga Mokonzi ti Royaume ti Nzapa.

 Même laso Jésus ayeke mû ka ngangu ti lo ti bata na adisciple ti lo yongoro na ngangu ti Satan ti kanga lege na ala ti fa tënë ti Royaume ti Nzapa na azo. Me Jésus ayeke mû ngangu ti lo pëpe ti bata na adisciple ti lo si ala tï kobela pëpe wala ti zi kobela ti ala. Même abazengele ti Jésus akui kue na nda ni. A fâ lani Jacques, ita ti Jean, na a bi Jean lo mveni na da ti kanga.​—Kusala 12:2; Apocalypse 1:9.

A yeke nga oko tongaso laso. Atâa azo ni asala kusala ti Jéhovah wala pëpe, ala kue ayeke tï kobela na ala kui. Me na yâ ngoi kete, na gbe ti komandema ti Jésus tongana Gbia ti ngorogbia ti Nzapa, aye ayeke ga ande nde. Mbito ayeke gbu ande zo oko pëpe, ngbanga ti so Jésus ayeke mû ngangu ti lo ti hiri deba nzoni na ndo ala so amä yanga ti lo​.—Esaïe 9:5, 6.