MO DABE mo ngbanga ti nyen mbeni ange ti Nzapa aga Satan Zabolo?— A yeke sioni nzara so lo yeke na ni ti tene azo avoro gi lo si apusu lo ti ke Nzapa. Ambeni ange amû lani peko ti Satan?— Biani, ala mû peko ti lo. Bible ahiri ala ‘a-ange ti Satan’, wala ayingo sioni.​—Apocalypse 12:9.

Asioni ange so, wala adémon, amä na bê na Nzapa?— Bible atene so ‘ayingo sioni amä na bê so Nzapa ayeke dä’. (Jacques 2:19). Me ti fadeso mbito asala ala, ngbanga ti so ala hinga so Nzapa ayeke fâ ande ngbanga na li ti ala ndali ti asioni ye so ala sala. Sioni wa ala sala?—

Bible atene so a-ange ni azia tâ ndo ti ala ti yayu ala ga aduti na ndo ti sese tongana azo. A yeke gi ngbanga ti so ala ye ti lango na apendere wali ti sese (Genèse 6:1, 2; Jude 6). Ye nyen mo hinga na ndo tënë ti lango na koli wala na wali?—

Koli ayeke lango na wali na mbeni lege so ayeke nde  mingi. Na pekoni, wali ni alingbi ti mû ngo. Me a yeke sioni ti tene a-ange alango na awali. Nzapa aleke ti tene gi koli na wali so asala mariage awe si abungbi. Tongaso, tongana ala dü mbeni molenge, koli ni na wali ti lo alingbi ti bata molenge ni.

Tongana a-ange ni ayü tele ti zo na ala lango na awali ti sese ge, amolenge ti ala akono ala yo na nduzu mingi. Ala yeke lani sioni mingi, na ala yeke sala sioni na azo. Tongaso, Nzapa asala si kota ngu apika ti fâ amolenge so na azo ti sioni kue. Me kozoni na so, lo tene na Noé ti leke mbeni arche, wala kota bato, ti sö azo so asala ye so ayeke nzoni. Wungo ti ala ayeke gi kete. Kota Wafango ye atene so a yeke kota ye ti dabe ti e na ye so asi lani na ngoi ti Moa.​—Genèse 6:3, 4, 13, 14; Luc 17:26, 27.

Tongana Moa asi, mo hinga ye so asi na asioni ange so?— Ala zia ti yü tele ti azo so ala sala ni ndali ti ala mveni, na ala kiri na yayu. Me ala lingbi ti duti a-ange ti Nzapa mbeni pëpe, tongaso ala ga a-ange ti Satan, wala ayingo sioni. Ye nyen asi na amolenge ti ala, ayongoro zo  so?— Ala na azo kue so ake ti mä yanga ti Nzapa, akui na yâ Moa ni.

Ngbele ye na ngoi ti Moa ni, Nzapa amû lege mbeni pëpe na ayingo sioni ti yü tele ti zo. Me atâa so e lingbi ti bâ ala pëpe, ayingo sioni ayeke gi lakue lege ti pusu azo ti sala aye ti sioni mingi. Ala yeke ga gi na gbâ ti akpale, ngbanga ti so a bi ala na sese ge.

Mo hinga ngbanga ti nyen e lingbi ti bâ ayingo sioni pëpe?— A yeke ngbanga ti so ala yeke na tele tongana ti e azo pëpe. Me e lingbi ti hinga biani so ala yeke dä. Bible atene so Satan ayeke ‘handa azo na ndo sese kue,’ na so ayingo sioni ti lo ayeke mû maboko na lo.​—Apocalypse 12:9, 12.

Zabolo na ayingo sioni ti lo alingbi ti handa e nga?— Tongana e sala hange pëpe, ala lingbi ti handa e. Me zia mbito asala e pëpe. Kota Wafango ye atene: ‘Zabolo ayeke na ngangu na ndo ti mbi pëpe.’ Tongana e ngbâ ndulu na Nzapa, lo yeke bata e yongoro na Zabolo nga na ayingo sioni ti lo.​—Jean 14:30.

A yeke kota ye ti tene e hinga asioni ye so ayingo sioni ayeke tara ti pusu e ti sala ni. Tongaso, gbu li ti mo na ndo ni. Asioni ye wa ayingo sioni asala tongana ala ga na ndo ti sese?— Kozoni si Moa aga, ala lango na awali. A yeke mbeni ye so a lingbi a-ange asala ni pëpe. Laso ayingo sioni aye ti tene azo abata ndia ti Nzapa pëpe na ndo tënë ti dutingo koli na wali. Mbi ye ti hunda mbeni tënë na mo, Azo wa la alingbi ti duti koli na wali?— Tâ tënë, gi azo so asala mariage awe.

Laso ambeni maseka-koli ayeke lango na amaseka-wali, me so ayeke na lege ni oko pëpe. Bible asala tënë ti “tele” ti koli na ti wali (Lévitique 15:1-3). Jéhovah aleke ambage ti tele so ndali ti mbeni ye so a lingbi gi azo so asala mariage awe si asala kusala na ni.  Tongana azo asala aye so Jéhovah ake, a yeke nzere mingi na bê ti ayingo sioni. Na tapande, ayingo sioni aye ka ti tene amolenge asala ngia na ndungo amba ti ala na tele ti ala ti koli wala ti wali. E ye ti e ti zia ngia na bê ti ayingo sioni pëpe, ni la ape?—

Mbeni ye nde ayeke dä so ayingo sioni aye tënë ni me so Jéhovah ake. A yeke nyen?— Salango ngangu na zo (Psaume 11:5). Salango ngangu na zo ayeke so azo asala sioni na amba ti ala azo. Bâ, a yeke ye so ayongoro molenge ti ayingo sioni asala lani la.

Ayingo sioni aye nga ti zia mbito na bê ti azo. Ngoi na ngoi, ala yeke tene so ala yeke azo so akui awe. Ala lingbi même ti haka peko ti salango tënë ti azo so akui awe. Na salango tongaso, ayingo sioni apusu azo mingi ti mä na bê so azo so akui awe ayeke na fini, na so ala lingbi ti sala tënë na azo so ade na fini. Biani, ayingo sioni asala si azo mingi amä na bê na tënë ti atoro.

 Tongaso, zia e sala hange si Satan na ayingo sioni ti lo ahanda e pëpe. Bible agboto mê ti e tongaso: ‘Satan na awakua ti lo ayeke gi ti sala tele ti ala tongana anzoni ange.’ (2 aCorinthien 11:14, 15). Me ti tâ tënë ni, adémon ayeke sioni. Zia e bâ tongana nyen ala lingbi ti pusu e ti sala ye tongana ala.

Na ndo wa si azo ayeke manda ye mingi na ndo salango ngangu na zo, langongo na koli wala na wali so ayeke na lege ni pëpe, nga na ndo atoro?— A yeke na bango ambeni limon na télévizion, ada ti vidéo, wala na lege ti asioni kamarade pëpe? Salango aye so ayeke gue na e ndulu na Nzapa wala ndulu na Zabolo nga na ayingo sioni? Mo tene ti mo nyen?—

Ti mo, zo wa la aye si e mä na e bâ asioni ye?— A yeke Satan na ayingo sioni ti lo. Tongaso, a lingbi mbi na mo e sala nyen?— A lingbi e diko, e mä, na e bâ aye so ayeke nzoni ndali ti e, na so ayeke mû ande maboko na e ti sala kusala na Jéhovah. Mo hinga ambeni nzoni ye so e lingbi ti sala?—

Tongana e sala ye so ayeke nzoni, e yeke sala mbito ti ayingo sioni pëpe. Jésus ayeke ngangu ahon ala, na ala yeke na mbito ti lo mingi. Mbeni lâ, ayingo sioni adekongo na Jésus: “Mo ga ti fâ e?” (Marc 1:24). Tongana ngoi ti tene Jésus afâ Satan na ayingo sioni ti lo asi, tele ti e ayeke nzere ande ape?— Me ti ku na ngoi ni so, e lingbi ti hinga biani so Jésus ayeke bata e yongoro na ayingo sioni tongana e ngbâ ndulu na lo nga na Babâ ti lo ti yayu.