MO BÂ so a yeke ngangu na mo pëpe ti sala kusala ti Jéhovah?— Kota Wafango ye atene lani pëpe so a yeke duti ande kete ye ti sala ni. Na bï ni kozoni si a fâ Jésus, lo tene na adisciple ti lo: “Tongana sese so ake i, i hinga sese ni ake Mbi kozoni si a ke i.”​—Jean 15:18.

Pierre apika lani kate ti lo so lo yeke zia ande Jésus lâ oko pëpe, me Jésus atene na lo so tâ gi na bï ni so lo yeke bele tënë ti lo lege ota. A yeke tâ gi ye so Pierre asala la! (Matthieu 26:31-35, 69-75). Mara ti ye tongaso alingbi ti si tongana nyen?— A yeke ngbanga ti so mbito asala Pierre, nga na tanga ti abazengele ni kue.

Mo hinga ngbanga ti nyen mbito asala lani abazengele ni?— Ala girisa ti sala mbeni ye so ayeke kota mingi. Mandango ye na ndo ye so alingbi ti mû maboko na e ti sala kusala ti Jéhovah, atâa tënë so zo alingbi ti tene na e wala ye so lo lingbi ti sala. Me kozoni kue, zia e kiri e bâ ye so asi na ndangba bï so Jésus asala na abazengele ti lo.

Kozoni, ala bungbi ala sala matanga ti Pâque. Pâque ayeke mbeni ngoi ti tengo kobe so ayeke nde, so a sala ni ngu oko oko. A yeke ti dabe azo ti Nzapa so a zi lani ala na gbe ti ngbâa na Egypte. Na pekoni, Jésus asala mbeni matanga nde na abazengele ti lo. Na yâ mbeni chapitre ande, e yeke sala tënë dä mingi, na e yeke fa ande tongana nyen kobe so amû maboko na e ti girisa Jésus pëpe. Ala te kobe ni ahunzi awe na Jésus atene atënë ti kpengba ala. Na pekoni, ala sigigi ala gue na yaka ti Gethsémané. A yeke mbeni ndo so ala ye lani ti gue dä mingi.

 Kâ, Jésus ague gi lo oko ti sambela. Lo tene nga na Pierre, Jacques na Jean ti sambela. Me lango ahon na ala. Lege ota, Jésus ague lo oko ti sambela, na lege ota lo kiri lo wara Pierre na atanga ni na lango! (Matthieu 26:36-47). Mo hinga ngbanga ti nyen a lingbi ala lango pëpe, me ala sambela?— Zia e bâ ni.

Judas Iscariote ayeke lani na tele ti Jésus na tanga ti abazengele ni na ngoi ti matanga ti Pâque ni. Tongana mo dabe ti mo na ni, Judas aga mbeni zo ti nzi. Fadeso lo ga nga zo ti kango zo. Lo hinga ndo so Jésus ayeke bungbi ka dä lakue na abazengele ti lo na yaka ti Gethsémané. Tongaso, Judas ague na aturugu kâ ti gbu Jésus. Tongana ala si, Jésus ahunda ala: ‘I yeke gi zo wa?’

Aturugu ni akiri tënë: “Jésus.” Na mbito pëpe, Jésus atene na ala: ‘Mbi la.’ Na bango so mbito agbu Jésus pëpe, bê ti aturugu ni adö, ala kiri na peko na ala tï na sese. Jésus atene na ala: ‘Tongana mbi la si i yeke gi mbi so, i zia abazengele ti mbi ala gue.’​—Jean 18:1-9.

Tongana aturugu ni agbu Jésus na ala kanga amaboko ti lo, mbito agbu abazengele ni na ala kpe. Me Pierre na Jean aye ti bâ ye so ayeke si, tongaso ala mû peko ti Jésus na hondengo ni. Na nda ni, a gue na Jésus na da ti Caïphe, kota prêtre. Kota prêtre ni ahinga Jean nzoni, tongaso zo ti batango gbagba ni azia lo na Pierre alï.

Andâ aprêtre asi ti ala awe na da ti Caïphe ti fâ ngbanga. Ala ye si a fâ Jésus. Tongaso, ala ga na azo ti bi tënë ti mvene na li ti lo. Azo apika ngbangba ti Jésus na ala gu lo na maboko ti ala. Na ngoi so aye so kue ayeke si, Pierre ayeke ndulu na ni.

Mbeni wali so ayeke bata yanga ti gbagba ni, lo so azia si Pierre na Jean alï, abâ Pierre. Lo tene: ‘Mo kue mo yeke lani na tele ti Jésus.’  Me Pierre abele, lo tene so lo hinga Jésus pëpe. Kete na pekoni, mbeni wali nde abâ Pierre na lo tene na azo so ayeke duti na tele ti lo: ‘Zo so ayeke nga lani na tele ti Jésus.’ Pierre akiri abele, lo tene so lo hinga Jésus pëpe. Ngoi kete na pekoni, ambeni zo abâ Pierre si ala tene na lo: ‘Ti tâ tënë ni, mo yeke oko ti ala nga.’ Ti ota ni Pierre abele, lo tene: “Mbi hinga Zo so pëpe.” Pierre adeba même so lo yeke tene tâ tënë, na Jésus aturne, Lo bâ lo.​—Matthieu 26:57-75; Luc 22:54-62; Jean 18:15-27.

Mo hinga ngbanga ti nyen Pierre atene mvene?— Ngbanga ti so mbito asala lo. Me nda ni nyen si mbito asala lo? Lo girisa ti sala nyen ti tene mbito asala lo pëpe? Gbu li ti mo dä kete. Jésus asala nyen fade ti duti na mbito pëpe?— Lo sambela Nzapa, na Nzapa amû maboko na lo ti duti na mbito pëpe. Girisa pëpe, Jésus atene fade na Pierre lege ota ti sambela, na ti lango pëpe. Me ye nyen asi?—

Lakue, lango ahon na Pierre. Lo sambela pëpe, na lo zi lê ti lo ngangu pëpe. Tongaso, tongana a ga ti gbu Jésus, lo ku tele ti lo  na ni pëpe. Na pekoni, na ndo ti fango ngbanga, tongana ala pika Jésus na ala mä tele ti fâ lo, mbito ahon ndo ti Pierre. Ye oko, angoi kete kozoni, Jésus atene na adisciple ti lo ti ku ti wara nyen?— Jésus atene na ala so legeoko tongana ti so sese so ake lo, a yeke ke ala nga.

Zia e bâ fadeso mbeni ye so alingbi ti si na e, so alingbi ti kpa ye so asi lani na Pierre. Bâ so mo yeke na yâ ti klase, akamarade ti mo akomanse ti tene asioni tënë na ndo azo so ayeke bala drapeau pëpe wala ayeke sala matanga ti Noël pëpe. Na mo ye ti bâ mbeni oko aturne na mbage ti mo na lo hunda: “A yeke tâ tënë so mo  yeke bala ka drapeau ape?” Wala ambeni atene: “E mä atene mo yeke sala même matanga ti Noël ape!” Mbito ti tene tâ tënë ayeke sala mo?— Mo ye ande ti tene mvene, tongana ti so Pierre asala lani?—

Na pekoni, mawa asala Pierre mingi, ndali ti so lo bele tënë ti Jésus. Tongana lo bâ ye so lo sala, lo sigigi na lo toto. Lo ke biani Jésus pëpe (Luc 22:32). Fadeso gbu li ti mo na ndo ni. Ti sala si mbito ahon ndo ti e pëpe si e tene mbeni tënë tongana Pierre, nyen la alingbi ti mû maboko na e?— Girisa pëpe, Pierre asambela kozo lani pëpe na lo zi lê ti lo ngangu pëpe. Tongaso, mo yeke tene nyen, ti ga mbeni disciple ti Kota Wafango ye ahunda nyen?—

A lingbi e sambela Jéhovah ti mû maboko na e. Tongana Jésus asambela lani, mo hinga ye so Nzapa asala na lo?— Lo tokua mbeni ange ti kpengba lo (Luc 22:43). A-ange ti Nzapa alingbi ti mû maboko na e?— Bible atene: ‘Ange ti L’Eternel angoro ala so akpe mbito ti Lo, na Lo zi ala.’ (Psaume 34:8). Me ti wara mungo maboko ti Nzapa, a lingbi e sambela. Me a ngbâ gi ge pëpe. Mo hinga ye so a lingbi e sala nga?— Jésus atene na adisciple ti lo ti lango pëpe na ti zi lê ti ala ngangu. Ti mo, e lingbi ti sala tongaso tongana nyen?—

A lingbi e dengi mê nzoni na ye so a yeke tene na abungbi ti e nga na ye so e yeke diko na yâ ti Bible. Me a lingbi e sambela nga Jéhovah lakue na e hunda lo ti mû maboko na e ti sala kusala ti lo. Tongana e sala tongaso, lo yeke mû maboko na e ti hon ndo ti mbito ti e. Na pekoni, tongana lege azi na e ti fa na azo tënë na ndo Kota Wafango ye nga na Babâ ti lo, e yeke duti na ngia.