MO YE si lege azi na mo ti sala ye kue so bê ti mo aye? A si na mo awe so mo ye si zo oko atene na mo pëpe ye so a lingbi mo sala? Tene na mbi tâ tënë, mo ye ti mo nyen?—

Me so wa si ayeke duti ande nzoni ndali ti mo? A yeke tâ nzoni ti sala gi ye so bê ti mo aye? Wala tongana mo mä yanga ti babâ na mama ti mo, mo yeke wara aye ti nzoni na pekoni?— Nzapa atene a lingbi mo mä yanga ti babâ na mama ti mo, na nda ni ayeke dä. Zia e gi ti hinga ni.

Mo yeke na ngu oke?— Mo hinga ngu ti babâ ti mo?— Mama ti mo, âta ti mo ti wali wala ti koli ayeke na ngu oke?— Ala duti na fini a ninga ahon mo. Na tongana zo aduti na fini a ninga, lo yeke manda ye mingi nga. Ngu oko oko, lo yeke mä tënë na ndo ti aye mingi, lo yeke bâ aye mingi, na lo yeke sala aye mingi. Tongaso, amaseka alingbi ti manda ye na mbage ti akota zo.

Mo hinga mbeni zo so ngu ti lo ayeke kete na ti mo?— Zo wa la ahinga ye mingi, mo wala lo?— Ngbanga ti nyen a yeke mo?— A yeke ngbanga ti so mo duti na fini a ninga ahon lo. Mo wara ngoi mingi ti manda aye ahon zo so ngu ti lo ayeke kete na ti mo.

 Zo wa la aduti na fini aninga ahon mbi na mo nga na tanga ti azo kue?— A yeke Jéhovah Nzapa. Lo hinga ye mingi ahon mbi na mo. Tongaso, tongana lo tene na e ti sala mbeni ye, e lingbi ti hinga biani so a yeke nzoni ti sala ni, atâa a lingbi ti duti ngangu. Mo hinga so même Kota Wafango ye abâ mbeni lâ so a yeke ngangu na lo ti mä yanga?—

Mbeni lâ, Nzapa ahunda na Jésus ti sala mbeni ye so ayeke ngangu mingi. Jésus asambela ngbanga ni, tongana ti so e yeke bâ ge. Lo tene: ‘Tongana Mo ye, Mo zi ngangu ye so yongoro na Mbi.’ Na sambelango tongaso, Jésus afa so a yeke lakue kete ye pëpe ti sala ye so bê ti Nzapa aye. Me Jésus ahunzi sambela ti lo ni tongana nyen? Mo hinga?—

Jésus ahunzi tongaso: “Mo sala tongana Mbi ye pëpe, me Mo sala tongana Mo ye.” (Luc 22:41, 42). Tâ tënë, lo ye ti sala ye so bê ti Nzapa aye, me pëpe ye so bê ti lo mveni aye. Tongaso, lo gue lo sala ye so Nzapa aye ahon ti sala ye so na lê ti lo ayeke nzoni.

E manda nyen na lege ti ye so?— E manda so a yeke lakue nzoni ti sala ye so Nzapa atene, atâa so a lingbi ti duti ngangu. Me e manda nga mbeni ye nde. Mo hinga ni?— E manda so Nzapa na Jésus ayeke azo so ayeke nde nde, pëpe oko tongana ti so ambeni zo ayeke tene ka. Jéhovah Nzapa ayeke kota ahon Molenge ti lo Jésus, na Lo hinga ye mingi ahon lo.

Tongana e mä yanga ti Nzapa, e yeke fa so e ye lo.Bible atene: “So ayeke ndoye ti Nzapa; e bata komandema ti Lo.” (1 Jean 5:3). Mo bâ awe, a yeke ngbanga ti e kue ti mä yanga ti Nzapa. Mo nga mo ye ti mä yanga ti lo?—

 Tongaso, zia e zi Bible ti e na e bâ ye so Nzapa atene na amolenge ti sala. E yeke diko ye so Bible atene na aEphésien chapitre 6, aversê 1, 2, na 3. A tene: “Amolenge, i mä tënë ti ababâ na amama ti i na yâ Seigneur, teti so ayeke lege ni. A lingbi mo yekia babâ na mama ti mo, so ayeke kozo komandema so zendo ayeke dä, si mo lingbi duti nzoni, na lâ ti mo awu mingi na ndo sese.”

Mo bâ ni, a yeke Jéhovah Nzapa mveni si ahunda na mo ti mä yanga ti babâ na mama ti mo. Ti “yekia” ala aye ti tene nyen? A ye ti tene so a lingbi mo kpe ala. Na tongana mo mä yanga ti babâ na mama ti mo, Nzapa atene so mo yeke ‘duti ande nzoni’.

Zia mbi tene na mo mbeni ye so asi na ndo azo so asö kuâ lani ngbanga ti so ala mä yanga. Azo so ayeke lango lani na yâ kota kodoro ti Jérusalem a sala angu mingi awe. Mingi ti azo ti yâ ti kodoro ni amä lani Nzapa pëpe, tongaso Jésus agboto mê ti ala so Nzapa ayeke futi ande kodoro ti ala ni. Jésus afa nga na ala tongana nyen ala lingbi ti kpe tongana ala ye ye so ayeke nzoni. Lo tene: ‘Tongana i bâ aturugu angoro tele ti Jérusalem kue, i hinga so futingo ti lo aga ndulu awe. Tongaso, a yeke ngoi ti sigigi na yâ Jérusalem na ti kpe na yâ ti ahoto.’​—Luc 21:20-22.

Tâ gi tongana ti so Jésus atene, aturugu ti Rome aga ti sala bira na Jérusalem. Ala ngoro tele ni kue. Me, ndali ti mbeni ye so zo ahinga nda ni pëpe, ala hon. Mingi ti azo ni abâ ti ala lani atene sioni ni ahon awe. Tongaso, ala ngbâ na yâ Jérusalem. Me Jésus atene lani so a lingbi ala sala nyen?— Tongana mo yeke lani na Jérusalem kâ, mo yeke sala nyen?— Ala so amä na bê biani na Jésus adö ada ti ala azia na ala kpe na yâ ti ahoto yongoro na Jérusalem.

Ngu oko ahon, ye oko asi na Jérusalem pëpe. Ngu use ahon, ye oko asi pëpe. Ngu ota ahon nga, ye oko asi pëpe. Ambeni zo atene  ti ala peut-être so azo so akpe Jérusalem ni so ayeke abuba zo. Me na ngu osio ni, aturugu ti Rome akiri aga. Ala kiri angoro tele ti Jérusalem kue. Fadeso, lege ti kpe ayeke dä mbeni pëpe. Ti so, aturugu ni afuti kodoro ni. Mingi ti azo so angbâ na yâ ni akui, na a gbu atanga ni a gue na ala.

Ye nyen asi na ala so amä yanga ti Jésus?— Ala sö kuâ. Ala kpe yongoro mingi na Jérusalem. Ni la, sioni asi na ala pëpe. Biani, mango yanga abata ala.

Tongana mo mä yanga, a yeke bata ande mo nga kue?— Babâ na mama ti mo alingbi ti tene na mo ti sala ngia lâ oko pëpe na lege wala ti gue na bale. Ala tene tënë so ngbanga ti nyen?— Ngbanga ti so mbeni oto alingbi ti kpo mo wala mo lingbi ti nyon ngu na mo kui. Me peut-être mbeni lâ mo lingbi ti tene na bê ti  mo: ‘Me ti fadeso, a-oto ayeke hon pëpe. Mbi yeke wara sioni pëpe. Ambeni molenge ayeke sala ngia na lege wala na bale, na mbi bâ so ala wara sioni lâ oko pëpe.’

Bâ, mingi ti azo ti Jérusalem atene lani tongaso. Na peko ti so aturugu ti Rome azia Jérusalem ala kiri, ala bâ ti ala lani atene ala sö kuâ awe. Tongana ala bâ so ambeni zo angbâ na yâ Jérusalem, ala nga kue angbâ. A gboto lani mê ti ala, me ala mä ndo pëpe. Ye so asala si ala kui.

Bâ mbeni tapande ni nde. Mo sala ngia na allumette awe?— Ti bâ wâ na zango ni tongana mo yeke pika allumette akpa tâ ye ti ngia. Me salango ngia na allumette alingbi ti ga na sioni. Da ni kue alingbi ti gbi, na mo lingbi ti kui!

Girisa pëpe, mango yanga gi ngoi na ngoi alingbi pëpe. Me tongana mo yeke mä yanga lakue, a yeke bata mo biani. Na zo wa si atene na mo, “Amolenge, i mä tënë ti ababâ na mama ti i”?— A yeke Nzapa. Girisa pëpe so a yeke ndali ti so lo ye mo si lo tene tënë so.