TONGANA kamarade ti lo Lazare akui, Jésus atoto na ngu ti lê. Ti mo, bê ti Jéhovah aso lani tongana Jésus abâ pasi na lo kui?— Bible atene so aye so asi alingbi ti zia “vundu” na bê ti Nzapa.​—Psaume 78:40, 41; Jean 11:35.

Na ngoi so lo yeke bâ Molenge ti Lo so Lo ye lo mingi na kuingo ni, mo hinga so vundu asala lani Jéhovah?— Jésus ahinga lani biani so Nzapa ayeke girisa lo pëpe. A yeke ndani la si kozoni si lo kui, ndangba tënë ti lo ni aduti so: “Babâ, Mbi zia [fini] ti Mbi na tïtî Mo.”​—Luc 23:46.

Jésus ahinga lani na bê ti lo kue so Nzapa ayeke zingo ande lo na kuâ, so Lo yeke zia ande lo pëpe na ‘ndo ti akuâ’ wala na dû ti kuâ. Na peko ti so Jésus azingo na kuâ, bazengele Pierre afa peko ti ye so a tene kozoni awe na yâ Bible na ndo Jésus, lo tene: ‘A zia Lo ngbâ na ndo ti akuâ pëpe, na  mitele ti Lo angbâ pëpe na ndo so ye afuti dä.’ (Kusala 2:31; Psaume 16:10). Tele ti Jésus awara ngoi lâ oko pëpe ti buba na yâ ti dû ti kuâ wala ti fun.

Lani so Jésus ayeke na ndo ti sese ge, lo tene même na adisciple ti lo so lo yeke ninga ande na yâ kuâ pëpe. Lo fa na ala so a yeke ‘fâ lo, nga na lango ota ni, lo yeke zingo na kuâ.’ (Luc 9:22). Ni la, tongana Jésus azingo na kuâ, a lingbi li ti adisciple ti lo akpe pëpe. Me a yeke lani tongaso?— Zia e bâ.

Kota Wafango ye akui na ndo keke ti pasi na vendredi, ndulu na ngbonga ota ti peko ti midi. Joseph, mbeni zo ti Sanhédrin so ayeke na nginza mingi, aga lani mbeni disciple ti Jésus na hondengo ni. Tongana lo mä atene Jésus akui, lo gue lo bâ Pilate zo ti Rome so ayeke gouverneur. Lo hunda wala lo lingbi ti zi kuâ ti Jésus na ndo ti keke ni na ti lu ni. Na pekoni, Joseph ague na kuâ ti Jésus na yâ ti mbeni yaka so mbeni dû ti kuâ ayeke dä.

Tongana a zia kuâ ti Jésus na yâ dû ti kuâ ni awe, a kanga dû ni na mbeni kota tênë. Tongaso, yanga ti dû ni angbâ na kangango ni. A yeke fadeso lango ota ni, so ayeke dimanche. Ndo angbâ ti vuko. Ambeni zo ayeke bata yanga ti dû ni. Aprêtre la si atokua ala ti bata ni. Mo hinga nda ni?—

Aprêtre ni nga kue amä lani so Jésus atene lo yeke zingo ande na kuâ. Ti tene adisciple ni anzi kuâ ti Jésus pëpe, si ala tene na pekoni so Jésus azingo na kuâ, aprêtre ni azia azo ti bata yanga ti dû ni. Me mo ye ti bâ, sese akomanse ti yengi. Wâ aza na yâ ti vukongo ndo ni. A yeke mbeni ange ti Jéhovah la! Mbito agbu aturugu ni ngangu si ala lingbi même ti sala mbeni ye pëpe. Ange ni ague na mbage ti dû ti kuâ ni, na lo zi tênë ni. Yâ ni ayeke senge, zo oko ayeke dä pëpe!

Biani, a yeke tongana ti so bazengele Pierre atene na pekoni: ‘Jésus so, Nzapa azingo lo na kuâ.’ (Kusala 2:32). Jéhovah azingo Jésus  na kuâ na mbeni tele so ayeke tongana ti ândö so lo de lo ga na ndo ti sese pëpe. Lo zingo lo na tele ti yingo, tongana ti a-ange (1 Pierre 3:18). Ni la, ti tene azo abâ Jésus, a lingbi lo yü tele ti zo. A yeke ye so lo sala la?— Zia e bâ.

Lâ akomanse ti sigigi. Aturugu ni ahon ti ala awe. Marie ti Magdala na ambeni wali so ayeke adisciple ti Jésus ayeke gue na mbage ti dû ti kuâ ni. Ala yeke tene na popo ti ala: ‘Zo wa la ayeke zi ande na e nene tênë ti yanga ti dû ti kuâ ni?’ (Marc 16:3). Me tongana ala si ndulu na dû ti kuâ ni, a zi tênë ni awe. Yâ ni ayeke senge! Kuâ ti Jésus ayeke dä mbeni pëpe! Fade fade, Marie ti Magdala akpe ti wara ambeni bazengele ti Jésus.

Tanga ti awali ni angbâ na tele ti dû ti kuâ ni. Ala yeke hunda tele ti ala: ‘Kuâ ti Jésus alingbi ti duti na ndo wa?’ Me mo ye ti bâ, akoli use asi. Bongo ti ala aza ngangu. A yeke a-ange! Ala tene na awali ni: ‘Teti nyen i yeke gi Jésus na ndo so? A zingo lo na kuâ awe. I kpe hio i gue i tene tënë ni na adisciple ti lo.’ So tâ loro si awali ni amû! Na lege, ala tingbi na mbeni koli. Zo wa la? Mo hinga lo?—

A yeke Jésus, so ayü tele ti zo! Lo tene nga na awali ni: ‘I gue i tene tënë ni na adisciple ti mbi.’ Tele ti awali ni anzere mingi. Ala gue awara adisciple ni na ala tene na ala: ‘Jésus ayeke na fini! E bâ lo!’ Marie atene ti lo awe na Pierre nga na Jean so yâ ti dû ti kuâ ni ayeke senge. Pierre na Jean ague abâ ni, tongana ti so mo yeke bâ ge. Ala bâ bongo ti lin so a kanga na Jésus, me ala hinga tënë so ala lingbi ti tene pëpe. Ala ye ti yeda so Jésus ayeke na fini, me tënë ni ayeke tâ pendere mingi ti duti tâ tënë.

A ninga pëpe na dimanche ni so, Jésus asi na adisciple ti lo use so ayeke tambela ti gue na kete kodoro ti Emmaüs. Jésus ayeke tambela na tele ti ala na lo yeke sala tënë na ala, me ala hinga pëpe so a yeke lo, ngbanga ti so tele ti lo ti zo ayeke nde na ti kozo. A yeke  gi na ngoi so ala te kobe legeoko na lo, na lo tene mbeni sambela si ala ga ti hinga so a yeke lo la. Tele ti adisciple ni anzere mingi si ala tambela hio akilomètre mingi ti kiri na Jérusalem! Peut-être a yeke kete na pekoni si Jésus asi na Pierre ti fa na lo so Lo yeke na fini.

Gi na dimanche ni so, na lakui, gbâ ti adisciple ti Jésus abungbi na yâ ti mbeni da. Yanga ti da ni akanga na clé. Mo ye ti bâ, Jésus ayeke na popo ti ala na yâ ti da ni! Ti so, ala hinga awe so Kota Wafango ye ayeke tâ na fini biani. So tâ ngia si ala duti na ni!​—Matthieu 28:1-15; Luc 24:1-49; Jean 19:38–20:21.

Teti alango 40, Jésus asi na adisciple ti lo na tele nde nde ti fa so lo yeke na fini. Na pekoni, lo zia sese na lo kiri na tele ti Babâ ti lo  na yayu (Kusala 1:9-11). Hio, adisciple ti lo akomanse ti fa na azo kue so Nzapa azingo Jésus na popo ti akuâ. Même tongana aprêtre ni apika ala na ala sala si a fâ ambeni, ala ngbâ lakue ti fa tënë. Ala hinga so atâa ala kui, Nzapa ayeke girisa ala pëpe tongana ti so lo girisa lani Molenge ti lo pëpe.

Bâ tâ tongana nyen akozo disciple ti Jésus so ayeke tâ nde na mingi ti azo laso! Na yâ ti ambeni kodoro, tongana a yeke lango ti zingongo ti Jésus na kuâ, ti azo ni so, gi tënë ti andaramba nga na ti apara-kondo so asala ni ndali ti matanga ti Pâques si ayeke na li ti ala. Me Bible asala ti lo tënë oko pëpe na ndo andaramba wala apara-kondo ni. Lo sala ti lo gi tënë na ndo salango kusala ti Nzapa.

E lingbi ti sala ye tongana adisciple ti Jésus na fango na azo so Nzapa asala mbeni pendere ye tongana lo zingo Molenge ti lo na kuâ. Zia mbito asala e lâ oko pëpe, atâa azo atene ala yeke fâ e. Même tongana a hunda ti tene e kui, Jéhovah ayeke girisa e pëpe na lo yeke zingo ande e na kuâ, tongana ti so lo sala lani na Jésus.

Ti hinga so Nzapa agirisa pëpe azo so asala kusala ti lo na lo yeke zingo même ande ala na kuâ, anzere na e ape?— Hingango ye so ayeke pusu e ti gi ti bâ tongana nyen e lingbi ti zia ngia na bê ti Nzapa. Mo hinga so e lingbi ti zia biani ngia na bê ti Nzapa?— Zia e bâ ni na chapitre ti peko.