MBENI zo ahunda mo awe ti sala mbeni ye ti sioni?— Lo tene na mo so koli wala wali ayeke sala ye tongaso? Wala lo tene so gi ngia la na a sala ye oko pëpe?— Tongana mbeni zo asala ye so na e, lo yeke gi ti handa e la.

Tongana ye atara e, a lingbi e sala nyen? A lingbi e tï dä na e sala ye ti sioni?— A yeke nzere ande na Jéhovah Nzapa pëpe. Me mo hinga zo so ayeke duti ande na ngia?— A yeke Satan Zabolo.

Satan ayeke wato ti Nzapa na ti e nga. E lingbi ti bâ lo pëpe ngbanga ti so lo yeke yingo. Me lo lingbi ti bâ e. Mbeni lâ Zabolo asala tënë na Jésus, Kota Wafango ye, na lo gi ti handa lo. Zia e b ye so Jésus asala. Na pekoni e yeke hinga mbilimbili ye so a lingbi e sala tongana ye atara e.

Jésus aye lakue ti sala ye so bê ti Nzapa aye. Lo fa ni polele na warango batême na yâ Ngu ti Jourdain. Tâ gi na pekoni, Satan agi lege ti handa lo. Bible atene so ‘yayu azi’ na Jésus (Matthieu 3:16). A ye peut-être ti tene so Jésus akomanse fadeso ti dabe ti lo na aye kue so andu fini ti lo tongana lo yeke ândö na yayu kâ na tele ti Nzapa.

Na peko ti batême ti lo, Jésus ague na mbeni ndo so ahule hulengo ti gbu li na ndo aye so lo komanse ti dabe ti lo na ni. Lo sala lango bale-osio na bï bale-osio. Na yâ ti alango ni so kue, Jésus ate  ye oko pëpe; ni la, nzara asala lo fadeso mingi. A yeke na ngoi so la si Satan agi lege ti handa Jésus.

Zabolo atene: “Tongana Mo yeke Molenge Ti Nzapa, Mo komande tênë so ti ga mapa.” Ti te mbeni nzerengo mapa ayeke duti ande tâ nzoni mingi! Me Jésus alingbi lani ti sala si atênë so aga mapa?— Lo lingbi ti sala ni. Ngbanga ti nyen? Ngbanga ti so Jésus, Molenge ti Nzapa, ayeke na ngangu so ayeke nde mingi.

Tongana Zabolo ahunda mo ti sala ni, mo yeke sala si mbeni tênë aga mapa?— Nzara agbu lani Jésus. Na ti sala ni gi lege oko ayeke duti ande sioni pëpe, a yeke tongaso?— Jésus ahinga lani so ti mû ngangu ti lo ti sala na aye tongaso ayeke duti ande na lege ni oko pëpe. Jéhovah amû ngangu so na lo ti gboto azo na mbage ti Nzapa, me pëpe ti tene lo sala na ye ndali ti lo mveni.

Tongaso, Jésus atene na Satan ye so ayeke na yâ Bible: “Fade zo angbâ na fini gi na lege ti mapa pëpe, me na lege ti tënë kue so asigigi na yanga ti Nzapa.” Jésus ahinga so salango ye so anzere na Jéhovah ayeke même kota ahon tengo ye.

Me Zabolo akiri ahanda lo. Lo mû Jésus lo gue na lo na Jérusalem, lo zia lo na li ti mbeni temple, na lo tene: ‘Tongana mo yeke Molenge ti Nzapa, bi tele ti mo na  sese. Teti a tene so a-ange ti Nzapa ayeke bata mo si mo wara sioni pëpe.’

Satan atene tënë so ngbanga ti nyen?— Lo ye ti pusu Jésus ti sala mbeni ye ti buba. Me Jésus akiri ake ti mä Satan. Lo tene na lo: “Mbeti ti Nzapa atene nga, A lingbi mo handa Seigneur Nzapa ti mo pëpe.” Jésus ahinga so a yeke nzoni pëpe ti tara Jéhovah na salango mbeni ye so alingbi ti ga na sioni na lo.

So kue gbä, Satan azia lege ni pëpe. Lo kiri lo mû Jésus lo gue na lo na li ti mbeni hoto so ayo na nduzu mingi. Kâ, lo fa na lo akota ndo ti komande kue ti sese nga na gloire ti ala. Na pekoni, Satan atene na Jésus: ‘Mbi yeke mû na mo aye so kue tongana mo kuku na sese na mo voro mbi.’

Bâ aye so Zabolo amû na Jésus so kete si. Akota ndo ti komande ti azo so kue ayeke biani ti Satan?— Jésus ake pëpe so a yeke ti Satan. Tongana fade a yeke ti lo pëpe, ka Jésus ayeke tene ni. Tâ tënë, Satan ayeke biani mokonzi ti amara kue ti sese. Même Bible ahiri lo “mokonzi ti sese so.”​—Jean 12:31.

Mo yeke sala nyen tongana Zabolo atene so lo yeke mû mbeni ye na mo tongana mo voro lo?— Jésus ahinga so a yeke duti ande sioni ti voro Zabolo atâa ye so lo lingbi ti wara na pekoni. Tongaso Jésus atene: ‘Hon kâ, Satan! Teti Mbeti ti Nzapa atene a lingbi mo sambela Jéhovah Nzapa ti mo, na mo sala gi na lo oko.’​—Matthieu 4:1-10; Luc 4:1-13.

E nga kue tara ayeke si na e. Mo hinga ambeni tara ni?— Bâ mbeni tapande. Mama ti mo ayôro mbeni pendere makara wala gato. Lo tene na mo so a lingbi mo ndu ni pëpe juska ngoi ti tengo ni alingbi si. Me nzara ahon ndo ti mo, na mo ye ti te ni. Fade mo yeke mä yanga ti mama ti mo?— Satan aye si mo ke yanga ti mama ti mo.

 Dabe ti mo na Jésus. Lo nga kue nzara ahon ndo ti lo lani. Me lo hinga so ti nzere na lê ti Nzapa ayeke kota ye mingi ahon ti te ye. Tongana mo sala ye so mama ti mo atene na mo, mo yeke fa so mo yeke tongana Jésus.

Ye alingbi ti si so ambeni molenge ahunda mo ti nyon mbangi. Ala yeke tene peut-être na mo so a yeke sala ande nzoni na mo mingi. Me mbangi alingbi ti sala sioni na mo mingi.  Wala peut-être mbeni zo amû manga na mo, na lo hunda mo ti nyon ni. Mo yeke sala nyen?—

Dabe ti mo na Jésus. Satan aye lani si Jésus asala ye so alingbi ti ga na lo sioni na tenengo na lo ti hulu na li ti temple ti tï na sese. Me Jésus asala ni pëpe. Tongana mbeni zo ahunda mo ti sala mbeni ye ti sioni, mo yeke sala nyen?— Jésus amä lani Satan pëpe. A lingbi mo mä nga pëpe zo kue so aye ti pusu mo ti sala aye ti sioni.

Zo alingbi ti hunda na mo mbeni lâ ti voro mbeni yanda, mbeni ye so Bible atene a lingbi e sala ni pëpe (Exode 20:4, 5). A lingbi ti duti na ekole. Lo lingbi ti tene na mo so mo yeke gue na ekole mbeni pëpe tongana mo ke ti sala ni. Mo yeke sala ande nyen?—

Tongana azo kue ayeke sala ye ti nzoni, a yeke ngangu pëpe na e ti sala ye ti nzoni. Me tongana azo aye si e sala ye ti sioni, a lingbi ti duti ngangu na e ti sala ye so ayeke nzoni. Ala lingbi ti tene so ye so ala yeke sala ayeke ti lo sioni oko pëpe. Me kota tënë ni ayeke so, Nzapa atene ti lo nyen na ndo ni? Lo hinga ye mingi ahon tanga ti azo kue.

Ni la, atâa ye so azo atene, a lingbi e sala lâ oko pëpe ye so Nzapa atene ayeke sioni. Tongaso, e yeke zia lakue ngia na bê ti Nzapa, na e yeke nzere lâ oko pëpe na lê ti Zabolo.