E KUE e ye ti duti na ngia. A yeke tongaso ape?— Me azo mingi ayeke biani na ngia pëpe. Mo hinga ngbanga ti nyen?— A yeke ngbanga ti so ala hinga pëpe tongana nyen ti wara ngia. Ala bâ ti ala atene warango gbâ ti ye ayeke ga na ngia. Me tongana ala wara aye ni so awe, ngia ti ala ni aninga pëpe.

Bâ ye so alingbi ti sala biani si e duti na ngia. Kota Wafango ye atene: “Ngia ayeke na zo so amû ye, ahon ngia ti lo so akamata ye.” (Kusala 20:35). Tongaso, zo ayeke duti na ngia tongana nyen?— A yeke na mungo aye na azo nga na salango ye na ala. Mo hinga tongaso?—

Zia e bâ tënë na ndo ni nzoni. Jésus atene so zo so awara ye ayeke duti ande na ngia pëpe?— Lo tene tongaso ape. Mo ye ka ti tene a mû ye na mo?— Azo kue aye  ni. Tongana a mû na e apendere ye, tele ti e ayeke nzere.

Me Jésus atene so ngia ti e ayeke tâ mingi mingi tongana e mû ye na zo. Tongaso, zo wa la amû aye mingi na azo ahon tanga ti azo kue?— A yeke Jéhovah Nzapa.

Bible atene so Nzapa ‘amû fini, pupu, na aye kue na azo kue’. Lo mû na e ngu-nzapa nga na lâ, si akobe alingbi ti kono si e te ni (Kusala 14:17; 17:25). A yeke ye ti dongo bê pëpe so Bible ahiri Jéhovah, Nzapa so ayeke na ngia! Mungo ye na zo ayeke mbeni oko ti aye so asala si Nzapa ayeke na ngia. Na tongana e mû ye na zo, a lingbi ti sala si e yeke na ngia nga.

E lingbi ti mû nyen na azo? Mo tene ti mo nyen?— Na ambeni ngoi, ti mû ye na zo ahunda pata. Tongana a yeke mbeni ye so a kä ni kango, a lingbi mo vo ni. Tongana mo ye ti mû mara ti ye tongaso na zo, a hunda na mo peut-être ti bata nginza ngbii alingbi na ni.

Me aye kue si a hunda ti vo ni vongo pëpe. Na tapande, tongana ndowa asala, dede ngu ayeke dë tâ bê ti zo. Tongaso, tongana mo mû dede ngu na zo so nzara ti ngu asala lo, mo lingbi ti wara ngia so aga na lege ti mungo ye.

A lingbi ti si so mo na mama ti mo ayôro babolo. Tele ti mo alingbi ti nzere. Me ahon ti te ni kue gi mo oko, mo lingbi ti sala nyen na ambeni yorongo babolo ni, so alingbi ti zia ngia na bê ti mo?— Mo lingbi ti mû ambeni na mbeni kamarade ti mo. A yeke nzere ande na mo ti sala tongaso mbeni lâ?—

Kota Wafango ye na abazengele ti lo kue ahinga ngia ti mungo  ye na zo. Mo hinga ye so ala mû na azo?— A yeke mbeni ye so ayeke nzoni mingi ahon aye kue! Ala hinga tâ tënë na ndo Nzapa, tongaso, ala fa ni na azo na ngia. Ala sala ni na ziango pëpe si zo amû nginza na ala ndali ti ye so ala mû na ala.

Mbeni lâ, bazengele Paul na kota kamarade ti lo disciple Luc atingbi na mbeni wali so aye ti wara ngia ti mungo ye na zo. Ala tingbi na lo na yanga ti mbeni ngu. Paul na Luc ague kâ ngbanga ti so ala mä atene a yeke mbeni ndo ti sambela. Na a yeke tâ tënë, teti tongana ala si kâ, ala wara ambeni wali na sambelango ni.

Paul akomanse ti fa na awali so nzo tënë na ndo Jéhovah Nzapa nga na Royaume ti lo. Iri ti mbeni oko ti awali so ayeke Lydie. Lo dengi mê mingi na tënë ni. Na pekoni, Lydie aye ti sala mbeni ye ti fa biani so nzo tënë so lo mä ni anzere na bê ti lo mingi. Tongaso, lo tene na Paul nga na Luc: “Tongana i bâ mbi mä na bê na Seigneur biani, i ga na da ti mbi, na i duti kâ.” Lo hunda ala ngbii na ndani ala yeda ti gue na da ti lo.​—Kusala 16:13-15.

Tele ti Lydie anzere ti wara awakua ti Nzapa so na da ti lo. Lo ye ala ngbanga ti so ala mû maboko na lo ti manda ye na ndo Jéhovah na Jésus, nga na ndo lege so zo alingbi ti duti na fini lakue lakue. Tele ti lo anzere ti wara lani lege ti mû kobe nga na mbeni ndo ti hu tele na Paul nga na Luc. Tongaso, mungo ye na zo azia ngia na bê ti Lydie ngbanga ti so a yeke biani ye so lo ye na bê ti lo. A yeke mbeni ye so a lingbi e girisa ni pëpe. Mbeni zo alingbi ti tene na e so a lingbi e mû ye na zo. Me tongana a londo biani na bê ti e pëpe, mungo ye na zo ni ayeke zia ande ngia na bê ti e pëpe.

Na tapande, mo yeke sala nyen tongana mo yeke na ambeni bonbon ti sungo ni? Tongana mbi tene na mo a lingbi mo mû mbage ni na mbeni molenge, mo yeke duti ande na ngia ti mû ni na lo?— Me, mo yeke sala nyen tongana mo yeke na ambeni bonbon na mo wara mbeni kamarade ti mo so mo ye tënë ti lo mingi? Tongana a  yeke na bê ti mo mveni si mo mû ambeni bonbon na kamarade ti mo ni, mo yeke duti na ngia ape?—

Tongana e ye mbeni zo mingi, e ye ti mû ye kue na lo na ti bata mbeni teti e mveni pëpe. Tongana ndoye ti e teti Nzapa ayeke kono, a lingbi a duti tongaso nga.

Kota Wafango ye ahinga lani mbeni wali so ye oko ayeke na lo pëpe, so asala ye tongaso. Lo bâ lo na yâ temple na Jérusalem. Ye kue so lo yeke lani na ni ayeke gi akete lê ti nginza use. Me lo zia alê ti nginza so kue na yâ boîte ti offrande ndali ti temple ni. Zo oko apusu lo ti sala ni pëpe. Mingi ti azo ni kâ ahinga même pëpe ye so lo londo ti sala. Lo sala ni ngbanga ti so a londo na bê ti lo, nga ngbanga ti so lo ye biani Jéhovah. Tele ti lo anzere ti wara lege ti mû ye.​—Luc 21:1-4.

Alege ayeke mingi so e lingbi ti mû ye na zo. Mo hinga ambeni?— Tongana e mû ye na zo ngbanga ti so a londo biani na bê ti e, e yeke duti ande na ngia. A yeke nda ni la si Kota Wafango ye atene na e ti ‘ngbâ ti mû ye’ na azo (Luc 6:38). Tongana e mû ye na azo, e yeke sala ande si ala duti na ngia. Na e yeke duti ande na ngia ahon tanga ti azo kue!