MBAGE 5
Na ngoi ti Noé, azo wa la amä yanga ti Nzapa? Azo wa la amä yanga ti lo pëpe?
Na ngoi ti Noé, mingi ti azo asara ye ti sioni. Genèse 6:5
Adam na Ève adü amolenge na azo awu na ndö ti sese. Ambeni ange atï nga na peko ti Satan ti ke yanga ti Nzapa.
Ala ga na sese na ala mû terê ti zo na ala mû awali. Awali ni adü na ala amolenge so ayeke nde na tanga ti azo. Amolenge ni ayeke sioni mingi nga ngangu mingi.
Azo ti sioni awu na ndö ti sese ni. Bible atene: “Ye ti peko ni ayeke so Jéhovah abâ so sioni ti zo ayeke mingi na ndö ti sese nga so abibe ti lo na bê ti lo ayeke gï na ndö ti ye ti sioni na ngoi kue.”
Noé amä yanga ti Nzapa na lo sara arche. Genèse 6:13, 14, 18, 19, 22
Noé ayeke nzoni zo. Jéhovah atene na Noé so ni yeke sara si kota ngu apika ti futi asioni zo.
Nzapa ahunda nga na Noé ti sara mbeni arche na lo mû asewa ti lo nga mara ti anyama nde nde kue na yâ ni.
Noé asara tënë ti kota ngu ni na azo me ala mä lo pëpe. Ambeni ahe lo nga ambeni ake lo bê oko.
Tongana Noé ahunzi ti sara arche ni awe, lo mû anyama ni na yâ ni.
