Zia e kiri fadeso angu kete na peko, kozo si a hunzi ti leke agbagba ti Jérusalem. Néhémie, so ayeke mbeni zo ti kua ti Gbia Artaxerxès, ayeke lani mbeni zo ti Israël so asara kodro na Perse na gbata ti Suse. Mbeni ita ti Néhémie alondo na Juda lo ga na mbeni sioni sango, lo tene: ‘Azo so si akiri lani na Jérusalem so ayeke na yâ ti kpale. Ade a leke agbagba nga na ayanga ti gbagba so azo ti Babylone abuba ni lani so ape.’ Bê ti Néhémie agi lo. Lo ye ti gue na Jérusalem ti gue ti mû maboko, tongaso lo sambela ti tene gbia azia lege na lo lo gue.

Na pekoni, Gbia ni abâ so lê ti Néhémie akpa lê ti zo so ayeke na mawa. Lo tene: ‘Mbi bâ mo tongaso lâ oko ape. Nyen la apassé?’ Néhémie atene: ‘Mawa asara mbi ape tongana nyen, so a buba gbata ti mbi Jérusalem so?’ Gbia ni ahunda lo, atene: ‘Nyen la mo ye mbi sara na mo nyen?’ Droit, Néhémie asambela na yâ ti bê ti lo. Na pekoni lo tene: ‘Pardon, zia mbi gue na Jérusalem ti leke agbagba ni.’ Gbia Artaxerxès atene na Néhémie so lo peut ti gue, na gbia aleke aye kue ti tene yongoro voyage ti Néhémie ni apassé nzoni. Lo zia nga Néhémie gouverneur ti Juda na lo mû na lo akeke ti leke na agbagba ti gbata ni.

Na ngoi so Néhémie asi na Jérusalem, lo fono lo bâ agbagba ti gbata ni. Na pekoni, lo bungbi aprêtre nga na amokonzi na lo tene na ala, lo tene: ‘Ye so ayeke ngangu-ein. A lingbi e londo e sara kua.’ Azo ni ayeda na ala komanse ti leke agbagba ni.

Me ambeni wato ti azo ti Israël ahe ala hengo, na ala tene: ‘Gbagba so ala ngbâ ti leke so, même mbeni mbo ti ngonda alingbi ti tuku ni na sese.’ Azo ti lekengo agbagba ni asara sanka ti azonga ti ala ni na ala ngbâ ti leke ni. Gbagba ni ayeke monté na nduzu mingi na akpengba ngangu.

Awato ni aleke fadeso ti ga na alege nde nde na ti ga na ndö ti azo ti Jérusalem gï gbagburu tongaso. Tongana aJuif amä tënë ti ye ni so, mbeto asara ala. Me Néhémie atene na ala: ‘Ala sara mbeto ape. Jéhovah ayeke na e.’ Lo zia aturugu ti tene a bata azo ti kua ni, na awato awara lege ti ga na ndö ti ala ape.

 Gï na yâ ti lango 52, a hunzi ti leke agbagba ni nga na ayanga ni. Néhémie aga na azo ti mara ti Lévi kue na Jérusalem ti tene a sara matanga ti zingo yanga ni. Lo kangbi yâ ti ala na groupe ti azo ti hengo bia use. Ala tambela na ndö ti agbagba ni; mbeni groupe ni ahon na mbage ti koli, mbeni ahon na mbage ti wali; ala ngoro gbata ni. Ala huru trompette, ala pika acymbale, harpe nga ala he bia na Jéhovah. Esdras ague na mbeni groupe ni, Néhémie ague nga na mbeni groupe ni, ala gue ala wara terê na temple. Azo kue, akoli, awali nga na amolenge asara asacrifice na Jéhovah na ala sara mbeni matanga. Zo angbâ ayo alingbi ti mä go ti ngia ti ala.