Tongana Nébucadnezzar amû amokonzi ti Juda ague na ala na Babylone, lo zia ala na gbe ti mbeni kota zo ti yangbo ti lo, so iri ti lo ayeke Ashpénaz, ti bâ lege ti ala. Nébucadnezzar atene na Ashpénaz ti gi na popo ti amokonzi ni amaseka-koli so ayeke na nzoni seni nga so ahinga ndo ahon amba ti ala. A yeke fa ye na amaseka-koli ni teti ngu ota. Fango ye ni so ayeke sara si ala ga ande akota zo na Babylone. A fa na amaseka-koli ni ti diko mbeti na yanga ti kodro ti azo ti Babylone, ti sû ni nga ti tene ni. A hunda nga na ala ti te oko kobe so gbia nga na azo ti yangbo ti lo ayeke te. Na milieu ti amaseka-koli ni so a yeke wara Daniel, Hananiah, Mishaël na Azariah. Ashpénaz amû na ala iri ti azo ti Babylone: Belteshazzar, Shadrak, Méshak na Abednégo. Eskê afango  ye ni so ayeke sara si ala zia lege ti vorongo Jéhovah?

Amaseka-koli osio so aleke na bê ti ala ti mä yanga ti Jéhovah. Ala hinga so a lingbi ala te kobe ti gbia ape ngbanga ti so ambeni kobe ni na milieu ni, Ndia ti Jéhovah ake ni. Tongaso ala tene na Ashpénaz, atene: ‘Pardon, mû na e kobe ti gbia ape.’ Ashpénaz atene na ala, lo tene: ‘Tongana ala ke ti te ye ni si gbia abâ so ala kpa azo so ayeke na kobela, lo yeke fâ mbi!’

Daniel awara mbeni idée. Lo tene na zo ti batango ala ni, lo tene: ‘Pardon, mû gï na e kugbe ti kasa nga na ngu teti lango bale-oko. Na pekoni, haka e na amaseka-koli so ayeke te kobe ti gbia.’ Zo ti batango ala ni ayeda.

Na peko ti lango bale-oko ni, Daniel na akamarade ti lo ota so ayeke na nzoni seni ahon tanga ti amaseka-koli ni kue. A nzere na Jéhovah so ala mä yanga ti lo so. Lo mû même na Daniel ndara ti fango peko ti avision nga na abango li.

Na ngoi so fango ye na ala ni ahunzi, Ashpénaz ague na ala na Nébucadnezzar. Gbia ni asara lisoro na ala na lo bâ so Daniel, Hananiah, Mishaël na Azariah la ahinga ndo mingi nga ayeke sara ye na hange ahon amaseka-koli ni kue. Lo soro amaseka-koli osio so ti sara kua na yâ ti yangbo ti lo. Ngoi na ngoi gbia ni alingbi ti hunda na ala ti mû na lo wango na ndö ti ambeni kota tënë. Jéhovah asara si ala yeke na ndara ahon azo ti gbia ni kue so ayeke na ndara nga na ala so ayeke sara magie.

Atâa so ala yeke lani na kodro-wande, Daniel, Hananiah, Mishaël na Azariah agirisa ape so ala yeke azo ti Jéhovah. Eskê mo kue mo yeke girisa Jéhovah ape, même si babâ na mama ti mo ayeke na terê ti mo ape?