Kete na peko ti so Jésus awara batême, lo komanse ti fa tënë, lo tene: ‘Royaume ti Nzapa aga nduru awe.’ Adisciple ti lo ayeke mû peko ti lo na ngoi so lo yeke voyagé na yâ ti Galilée kue nga na yâ ti Judée. Na ngoi so Jésus akiri na gbata ti lo na Nazareth, lo gue na yâ ti synagogue, lo zi rouleau ti Ésaïe na lo diko ni na kota go, lo tene: ‘Jéhovah amû na mbi yingo vulu ti lo, tongaso si mbi lingbi ti fa nzoni tënë.’ Tënë so aye ti tene nyen? A ye ti tene so même si azo aye ti bâ Jésus na sarango amiracle, kota raison so a mû na lo yingo vulu ayeke ti fa nzoni tënë. Ni la lo tene na azo so ayeke mä lo, lo tene: ‘Laso, prophétie so aga tâ tënë awe.’

Na pekoni, Jésus ague na Kota ngu ti Galilée, kâ lo wara ambeni zo ti gbungo susu osio so na pekoni ala ga adisciple ti lo. Lo tene na ala: ‘Ala ga, mbi yeke sara si ala ga azo ti gingo azo.’ Azo ni so ayeke Pierre, André, Jacques nga na Jean. Hio, ala dö kua ti ala ti gbungo susu ni ala zia na ala mû peko ti lo. Ala tambela na yâ ti Galilée kue, ala fa tënë ti Royaume ti Jéhovah. Ala fa tënë na yâ ti asynagogue, agara, nga na ndö ti alege. Gbâ ti azo amû peko ti ala na ndo kue so ala yeke gue dä. Sango na ndö ti Jésus amû ndo kue, même juska na Syrie kâ.

Ambeni ngoi na pekoni, Jésus amû ngangu na ambeni disciple ti lo ti sava kobela ti azo nga ti tomba asioni yingo na yâ ti ala. Ambeni ayeke tambela legeoko na lo tongana lo yeke fa tënë na yâ ti agbata nga na yâ ti akete kodro oko oko. Ambeni wali so ayeke be-ta-zo ayeke bâ lege ti Jésus nga na abazengele ti lo. Na popo ti awali ni a yeke wara Marie zo ti Magdala, Jeanne, Suzanne nga na ambeni.

Na peko ti so Jésus afa ye na adisciple ti lo awe, lo tokua ala ti gue ti fa tënë. So ala tambela afa tënë na yâ ti Galilée kue, gbâ ti azo aga adisciple na ala wara batême. So gbâ ti azo aye ti ga adisciple so, a sara si Jésus ahaka ala na mbeni yaka so alê ti kobe ni abe awe. Lo tene: ‘Ala sambela Jéhovah ti tene lo tokua na ala ambeni zo ti kua ti fâ akobe ti yaka ni.’ Na pekoni, lo soro azo 70 na popo ti adisciple ti lo na lo tokua ala use use ti gue ti fa tënë na yâ ti Judée  kue. Ala fa tënë ti Royaume na mara ti azo nde nde kue. Tongana adisciple ni akiri, terê ti ala anzere nzerengo ti fa na Jésus peko ti aye so asi. Mbeni ye so Zabolo alingbi ti sara ti kanga lege na kua ti fango tënë ayeke dä ape.

Jésus aleke kue si adisciple ti lo angbâ lakue ti sara kota kua ni so tongana lo kiri ande na yayu. Lo tene na ala, lo tene: ‘Ala fa nzoni tënë na azo kue na ndö ti sese. Ala fa na ala tënë ti Nzapa, nga ala batize ala.’