Na peko ti Matanga ti Pâque, Jésus na adisciple ti lo amû lege ti kiri na Galilée, ala hon na yâ ti Samarie. Nduru na gbata ti Sychar, Jésus aluti na lege na mbeni place so a iri ni dû ti ngu ti Jacob. Na ngoi so lo ngbâ ti wu terê na place ni so, adisciple ti lo ague na gbata ni ti vo kobe.

Mbeni wali aga na dû ti ngu ni ti tö ngu. Jésus atene na lo: “Mû na mbi ngu mbi nyon.” Wali ni atene: ‘Mo sara tënë na mbi ngbanga ti nyen? Mbi yeke zo ti Samarie. A-Juif ayeke sara ka tënë na e azo ti Samarie ape.’ Jésus atene na lo: ‘Tongana mo hinga fade mbi, andâ mo la mo yeke hunda fade na mbi ngu na mbi yeke mû na mo ngu so amû fini.’ Wali ni angbâ ahunda lo, atene: ‘Mo ye ti tënë nyen la? Mo yeke nga même na mbeni rambâi ape.’ Jésus atene na lo: ‘Zo kue so anyon ngu so mbi mû na lo, nzara ti ngu ayeke kiri ti sara lo ape.’ Wali ni atene na lo: ‘Kota zo, mû na mbi ngu ni so.’

Na pekoni Jésus atene na lo: ‘Gue mo iri koli ti mo ti ga ge.’ Wali ni atene na lo, atene: ‘Mbi yeke na koli ape.’ Jésus atene na lo: ‘Tâ tënë la mo tene so. Mo sara mariage fani oku, na koli so mo yeke duti na lo fadeso, ade mo sara mariage na lo ape.’ Wali ni atene na lo: ‘Mbi bâ so mo yeke mbeni prophète. Azo ti kodro ti mbi amä na bê so a doit ti voro Nzapa na ndö ti hoto so, me aJuif atene so a doit ti voro Nzapa gï na Jérusalem oko awe. Mbi mä na bê so tongana Messie aga ande, lo yeke fa na e tongana nyen ti voro Nzapa.’ Jésus angbâ atene na lo mbeni tënë so ade lo tene ni na mbeni zo ape, lo tene: ‘Mbi la mbi yeke Messie ni.’

 Wali ni ague hio na gbata ti lo na lo tene na azo ti Samarie, lo tene: ‘Âmanke mbi wara Messie ni awe. Lo hinga ye kue na ndö ti mbi. Ala ga ala bâ!’ Azo ni amû peko ti lo na dû ti ngu ni na ala mä aye so Jésus ayeke fa.

Azo ti Samarie ahunda na Jésus ti ga ti ngbâ kete na yâ ti gbata ti ala. Kâ, Jésus afa ye na ala teti lango use, na gbâ ti azo amä na bê na lo. Ala tene na wali ti Samarie ni, atene: ‘Na peko ti so e mä koli so, e hinga so lo yeke biani sauveur ti dunia so.’