Moïse na Aaron ague ti tene na Pharaon tënë so Jéhovah atene: ‘Tongana mo zia lege na azo ti mbi ti gue pëpe, mbi yeke tokua akota ngungu ti tengo zo na yâ ti kodro ni.’ Gbâ ti akota ngungu amû yâ ti da ti azo ti Égypte kue, azo ti mosoro na awayere. Akota ngungu amû yâ ti kodro ni kue. Me na Goshen, kodro so azo ti Israël ayeke dä, mbeni kota ngungu oko ayeke dä pëpe. Ti londo na ye ti ngangu osio ni so ti gue na ni, atanga ti aye ti ngangu ni awara gï azo ti Égypte. Pharaon avoro yanga na ala, lo tene: ‘Ala hunda na Jéhovah ti zi akota ngungu so yongoro. Azo ti ala apeut ti gue.’ Me na ngoi so Jéhovah asara si akota ngungu ni ahon, Pharaon akiri achangé yanga ti lo. Tâ Pharaon ayeke mä ande ndo la?

Jéhovah atene: ‘Tongana Pharaon ake ti zia lege na azo ti mbi ti gue, anyama ti azo ti Égypte ayeke tï kobela na ala yeke kui.’ Na ndade ni, anyama ni akomanse ti kui. Me anyama ti azo ti Israël akui ti ala ape. Li ti Pharaon angbâ ti kpengba, na lo ke ti zia ala ti tene ala gue.

Na pekoni, Jéhovah atene na Moïse ti kiri na gbele Pharaon na ti tuku mburu ti wâ na nduzu. Mburu ti wâ ni aga poussière, a mû ndo na li ti azo ti Égypte kue. Poussière ni asara si afuroncle so ason mingi amû terê ti azo ti Égypte na anyama ti ala kue. Atâa so kue, Pharaon ake ti zia azo ti Israël ti gue.

Jéhovah atokua Moïse na Aaron ti kiri encore na gbele Pharaon ti tene na lo, atene: ‘Mo ngbâ ti ke ti zia  azo ti mbi ti tene ala gue? Kekereke akota glason ayeke tï na yâ ti kodro ni.’ Na ndade ni, Jéhovah atokua bekpa, akota glason, wâ nga na mbeni kota pupu so azo ti Égypte ade ti bâ mara ni lâ oko ape. A buba akeke nga na alê ti kobe kue, me aye so ayeke na Goshen abuba ape. Pharaon atene: ‘Ala voro yanga na Jéhovah ti kaï aye so. Na pekoni ala yeke gue.’ Me tâ gï na ngoi so akota glason na ngu ni akaï awe, Pharaon akiri achangé yanga ti lo.

Na pekoni Moïse atene: ‘Agbadora ayeke te ande tanga ti akugbe ti keke kue so akota glason abuba ni ape so.’ Gbâ ti agbadora ate aye kue so angbâ na yâ ti ayaka nga na li ti akeke. Pharaon avoro terê ti lo, lo tene: ‘Ala voro yanga na Jéhovah ti tomba agbadora so ahon ayo.’ Me même na ngoi so Jéhovah asara si agbadora ni ahon, Pharaon angbâ lakue ti sara kpengba-li.

Jéhovah atene na Moïse: ‘Yôro maboko ti mo na nduzu.’ Mo ye ti bâ, lê ti nduzu kue avuko. Teti lango ota, azo ti Égypte apeut ti bâ ye oko ape. Gï azo ti Israël la ayeke na lumière na ndo so ala yeke dä.

Pharaon atene na Moïse: ‘Mo na azo ti mo ni apeut ti gue. Me ala yeke zia gï anyama ti ala.’ Moïse atene: ‘E doit ti mû anyama ti e, tongaso si e mû ala na sandaga na Nzapa ti e.’ Pharaon asara ngonzo sioni. Lo dekongo na ndö ti Moïse, lo tene: ‘Hon ka na lê ti mbi! Tongana mbi bâ mo encore, mbi yeke fâ mo.’