Na Ninive, so ayeke mbeni gbata ti Assyrie, azo ti ndo ni ayeke sioni. Jéhovah atene na prophète ti lo Jonas ti gue na Ninive na ti gboto mê ti azo ni ti tene ala changé asarango ye ti ala. Me Jonas akpe amû ti lo mbeni lege nde. Lo gue lo wara mbeni bateau so ayeke gue na Tarsis na lo monté na yâ ni.

Na ngoi so bateau ni ayeke na lê ti ngu-ingo, mbeni ngangu pupu asara, na mbeto akomanse ti sara azo ti yâ ti bateau ni. Ala sambela anzapa ti ala na ala hunda ndo, atene: ‘Ye ni so asi ngbanga ti nyen?’ Na nda ni Jonas atene na ala: ‘A yeke faute ti mbi. Mbi ye ti sara pëpe ye so Jéhovah atene na mbi ti sara. Ala bi mbi na yâ ti ngu-ingo, na pupu ni ayeke kaï.’ Azo ti bateau ni aye pëpe ti bi Jonas na yâ ti ngu ni, me Jonas aye gï ti tene ala bi lo na yâ ti ngu ni. Na ngoi so ala bi lo na yâ ti ngu-ingo ni, pupu ni akaï.

Jonas apensé so lo yeke kui. Tongana lo yeke lï yeke yeke na gbe ti ngu ni, lo sambela Jéhovah. Mo ye ti bâ, Jéhovah atokua mbeni kota susu. Susu ni amene Jonas me lo fâ lo ape. Na yâ ti susu ni kâ, Jonas asambela, atene: ‘Mbi mû na mo zendo so mbi yeke mä yanga ti mo lakue.’ Jéhovah abata Jonas na yâ ti susu ni teti lango ota, na pekoni lo sara si susu ni adë Jonas na gigi na ndö ti mbeni kuru sese.

So Jéhovah asö Jonas so, a ye ti tene so lo yeke gue encore na Ninive ni ape la? Ên-ën. Jéhovah akiri atene na Jonas ti gue kâ. Ti so  ni so, Jonas amä yanga. Lo gue kâ na lo tene na asioni zo ni so, lo tene: ‘A ngbâ lango 40 ti tene a futi Ninive.’ Mo ye ti bâ, mbeni ye so zo aku terê ti lo na ni ape asi: Azo ti Ninive amä tënë ni na ala changé asarango ye ti ala. Gbia ti Ninive atene na azo ti gbata ni, atene: ‘Ala iri ndo na Nzapa, na ala changé sarango ye ti ala. Peut-être Lo yeke futi e ande ape.’ Tongana Jéhovah abâ so azo ni achangé asioni sarango ye ti ala, lo futi gbata ti Ninive ape.

So a futi gbata ni ape so, ngonzo asara Jonas. Bâ si: Jéhovah akanga bê na Jonas nga lo sara nzoni bê na lo, me Jonas asara nzoni bê ape na azo ti kodro ti Ninive. Lo gue lo duti na gigi ti gbata ni na gbe ti mbeni kete keke ti kangu na lo suku ngbangba. Na pekoni kete keke ni akui, na ngonzo asara Jonas. Tongaso Jéhovah atene na lo: ‘Mo sara mawa ti kete keke so ahon ti so mo doit ti sara mawa ti azo ti Ninive. Mbi sara nzoni bê na ala, na ala sö kuâ.’ Nyen la Jéhovah aye ti fa ge? Lo ye ti fa so azo ti Ninive ayeke kota mingi ahon akete keke kue.