EKOLE TI AWAFANGO NZONI TËNË TI ROYAUME: A hunda na apionnier so ngu ti ala ayeke na popo ti ngu 23 na ngu 65, so aye ti kono yâ ti kua ti ala ti fango tënë, ti ga na bungbi so a leke ndali ti ala so aye ti sara Ekole ti awafango nzoni tënë ti Royaume. Bungbi ni ayeke duti na dimanche na peko ti kapa ti ndapre. A yeke fa ande ndo nga na l’heure so a yeke sara bungbi ni dä.

NDOKUA TI YAMBANGO AZO Kua ti azo ti ndokua so ayeke ti mû maboko na mo. Sara kua maboko na maboko na ala, so ti tene ti yeda na fango lege ti ala na ndö ti tënë ti ndo ti ziango a-oto dä, ti fango ndo ti duti na azo, ti batango place na ambeni zo nga na ambeni ye tongaso.

BATÊME Ndo ti duti so a leke teti ala so aye ti wara batême ayeke ande na kozo banc na devant ti estrade. A lingbi ala so aye ti wara batême aduti na ndo so a leke teti ala kozoni si diskur ti batême ato nda ni na samedi na ndapre. A lingbi zo oko oko aga na mbeni esume nga na mbeni bongo so alingbi ti tene lo linda na ni na ngu.

A-OFFRANDE A futa nginza mingi ti leke aye kue, ti mû aye ti duti so alingbi, ti leke aye ti sonorisation, aye ti vidéo nga na ambeni kua nde so asara si dutingo na kota bungbi ni amû ngia nga amû lege na e ti ga nduru mingi na Jéhovah. A-offrande so mo mû na bê ti mo kue amû maboko ti kanga dû ti adépense so nga amû maboko na kusala ni na yâ ti dunia kue. Ti mû maboko na mo ti mû a-offrande, a zia na ando nde nde ti kota bungbi ni aboîte ti offrande so zo alingbi ti bâ ni hio. A bâ na nene ni mingi a-offrande kue. Bebungbi aye ti kiri singila na mo teti mungo maboko so mo yeke mû na bê ti mo kue ndali ti aye so andu kua ti Royaume.

NDO TI MUNGO YORÖ Hinga so ndokua so ayeke mû yorö GÏ na azo so terê ti ala ason na ngoi ti kota bungbi ni, na so a lingbi a bâ lege ti ala HIO.

NDOKUA TI BATANGO AYE SO AGIRISA SI A WARA NI A lingbi ti zia na ndokua so ye kue so agirisa si a wara ni. Tongana mo girisa mbeni ye, hunda na ndokua so, na gi ti mû ye so ayeke ti mo. Tongana mo wara mbeni molenge so agirisa, teti so lo hon yongoro na terê ti babâ na mama ti lo, a lingbi mo gue na lo na ndokua so nga. Me, ti kpe ti tene li ti azo aga kirikiri senge senge ape, bâ ndo nzoni na ndö ti amolenge ti mo, na bata ala na terê ti mo.

ANDO TI DUTI A lingbi mo ne amba ti mo. Girisa ape so mo lingbi ti bata ndo ti duti gï na azo ti sewa ti mo, ala so mo na ala aga oko, ala so alango da oko na mo wala azo so mo yeke manda Bible na ala. Tongana mo bata ndo ti duti na mbeni zo ape, a yeke nzoni mo zia aye na ndö ti abanc ni ape.

NDOKUA TI AVOLONTAIRE Tongana mo ye ti sara ambeni kua tongana volontaire na ngoi ti kota bungbi ni, sara tënë ni na ndokua so, na fade a yeke fa na mo ndo so kua ayeke dä ti sara.