AKOLI so mo bâ ala ge so ayeke gbu azo na ngangu ti sara kua. Bâ koli so ayeke pika mbeni zo na zaza! Azo ti kua so ayeke azo ti yâ ti sewa ti Jacob, wala azo ti Israël. Akoli so ayeke gbu ala na ngangu ti sara kua ayeke azo ti Égypte. Ala sara azo ti Israël na ngbâa. Me ye so asi tongana nyen?

Teti ngu mingi, kota sewa ti Jacob aduti na siriri na Égypte. Joseph, so lani ayeke kozo kota zo na Égypte na peko ti Pharaon, abâ lege ti ala nzoni. Me na pekoni Joseph akui. Mbeni Pharaon nde aga gbia na Égypte, na lo ye amolenge ti Israël pëpe.

Tongaso, sioni Pharaon so asara azo ti Israël na ngbâa. Lo zia na ndo ti ala akoli so asara ye na ngangu na ayeke sioni. Ala pusu azo ti Israël ti sara kua ngangu ti leke akota kodoro ndali ti Pharaon. Me li ti azo ti Israël angbâ ti wu. Kete na pekoni, azo ti Égypte asara mbeto so wungo ti azo ti Israël ayeke hon ndo ni ande, nga ala yeke ga ngangu mingi.

Mo hinga ye so Pharaon asara? Lo tene na awali so ayeke mû maboko na awali ti Israël ti dü molenge, lo tene: ‘Ala fâ amolenge ti koli kue so awali ni adü.’ Me awali so ayeke anzoni zo, na ala fâ amolenge ni pëpe.

Tongaso, Pharaon atene na azo ti Égypte kue: ‘Ala mû amolenge-koli ti azo ti Israël kue na ala fâ ala. Ala zia gi amolenge-wali ni na fini.’ Tënë ti Pharaon so ayeke sioni mingi. Zia e bâ tongana nyen a bata fini ti mbeni molenge-koli oko.