JOSEPH ayeke lani gi na ngu 17 tongana a gue na lo na Égypte. Kâ, a kä lo na mbeni koli so iri ti lo ayeke Potiphar. Koli so asara kua ndali ti Pharaon, gbia ti Égypte.

Joseph asara kua ngangu ndali ti Potiphar. Tongana Joseph akpengba awe, Potiphar azia lo mokonzi ti da ti lo. Tongaso, ngbanga ti nyen lo yeke na da ti kanga? A yeke ndali ti wali ti Potiphar.

Joseph aga pendere koli, na wali ti Potiphar aye ti lango na lo. Me Joseph ahinga so ye so ayeke sioni, na lo ke ti sara ni. Ngonzo agbu wali ti Potiphar. Tongana koli ti lo akiri na yanga-da, lo tene mvene na lo tongaso: ‘Sioni Joseph so aye fade ti lango na mbi!’ Potiphar amä tënë ti wali ti lo na ngonzo asara lo mingi na tere ti Joseph si lo bi lo na da ti kanga.

Mokonzi ti da ti kanga ni abâ so Joseph ayeke nzoni zo. Tongaso lo zia lo ti bâ ndo na ndo ti azo ti da ti kanga ni kue. Mbeni lâ, ngonzo agbu Pharaon na tere ti zo so ayeke mû ye ti nyon na lo nga na tere ti zo ti sarango mapa ti lo si lo bi ala na da ti kanga. Na mbeni bï, azo use so abâ li ti ala, me ala hinga nda ni pëpe. Na ndapre, Joseph atene na ala: ‘Ala fa bango li ti ala na mbi.’ Ala fa peko ti bango li ti ala ni, na Nzapa amû maboko na Joseph ti fa nda ni na ala.

Na zo ti mû ye ti nyon na Pharaon, Joseph atene: ‘Na yâ ti lango ota, Pharaon ayeke zi mo na da ti kanga na mo yeke kiri na kua ti mo.’ Na lo bi mbeni tënë dä, lo tene: ‘Tongana a zi mo awe, tene na Pharaon ti zi mbi na da ti kanga.’ Me Joseph atene na zo ti sarango mapa: ‘Na yâ ti lango ota, Pharaon ayeke tene ande ti dë go ti mo.’

Ye kue so Joseph atene aga tâ tënë. Na yâ ti lango ota, Pharaon atene ti dë go ti zo ti sarango mapa ni. Me a zi zo ti mû ye ti nyon na Pharaon na da ti kanga, na lo kiri na kua ti lo. Me lo girisa na ndo ti Joseph kue. Lo tene tënë oko na Pharaon pëpe, na Joseph angbâ na da ti kanga.