BÂ TONGANA nyen Moïse ayeke kpe sese ti Égypte. Mo bâ azo so ayeke kpe na peko ti lo? Ala ye ti fâ Moïse. Ngbanga ti nyen? Zia e bâ nda ni.

Moïse akono na da ti Pharaon, gbia ti Égypte. Lo ga kota zo ti ndara mingi. Moïse ahinga so lo yeke molenge ti Égypte pëpe, me babâ na mama ti lo ayeke azo ti Israël so ayeke azo ti ngbâa.

Mbeni lâ, tongana Moïse awara ngu 40 awe, lo gue ti bâ wala azo ti mara ti lo ayeke nzoni. Lo bâ tongana nyen a yeke sara ngangu mingi na ala. Lo bâ mbeni zo ti Égypte ayeke pika mbeni zo ti Israël. Moïse abâ ndo na tere ti lo, lo bâ so mbeni zo ayeke dä pëpe na lo pika zo ti Égypte ni si lo kui. Na pekoni, Moïse alu lo na yâ ti mbutu.

Na ndade ni, Moïse akiri ague ti bâ azo ti mara ti lo. Lo pensé so lo lingbi ti mû na ala maboko si ala duti ngbâa mbeni pëpe. Me lo bâ azo use ti Israël ayeke tiri. Lo hunda na lo so ayeke na faute, lo tene: ‘Mo pika ita ti mo ngbanga ti nyen?’

Koli ni atene: ‘Zo wa si azia mo zo ti komande ti fâ ngbanga na li ti e? Mo ye ti fâ mbi tongana ti so mo fâ zo ti Égypte so?’

Mbeto asara Moïse fadeso. Lo hinga so azo kue amä so lo fâ mbeni zo ti Égypte. Pharaon kue amä tënë ni na lo tokua azo ti fâ Moïse. Ni la, a lingbi Moïse akpe sese ti Égypte.

Tongana lo kpe kodoro ti Égypte, lo gue yongoro na sese ti Madian. Kâ, lo tingbi na sewa ti Jéthro, na lo mû Zipporah na wali, mbeni oko ti amolenge ti Jéthro ti wali. Moïse aga zo ti batango nyama, na lo bata angasangbaga ti kogara ti lo. Lo duti na sese ti Madian ngu 40. Ngu ti Moïse asi fadeso 80. Mbeni lâ, tongana lo yeke bata angasangbaga ti Jéthro, mbeni ye ti kpene asi, so agbian fini ti Moïse kue. Zia e turne lembeti ni ti bâ ye so asi.