NGU use ahon, na Joseph angbâ na da ti kanga. Zo ti mû ye ti nyon na Pharaon agirisa na ndo ti lo awe. Me, na mbeni bï, Pharaon abâ li ti lo lege use. Lo ye ti hinga nda ti abango li so. Mo bâ lo na lango na lê ti foto so? Na ndapre, Pharaon airi awandara ti lo kue ti fa nda ti abango li ti lo. Me ala lingbi ti fa nda ni pëpe.

Fadeso, li ti zo ti mû ye ti nyon na Pharaon atï na ndo ti Joseph. Lo tene na Pharaon: ‘Lani so mbi yeke na da ti kanga, mbeni koli ayeke dä so ahinga ti fa nda ti abango li.’ Pharaon ahunda ti tene a sigigi na Joseph na da ti kanga hio.

Pharaon afa peko ti abango li ti lo na Joseph, lo tene: ‘Mbi bâ abagara mbasambala so akono pendere. Na pekoni, mbi bâ ambeni bagara mbasambala so angen mingi. Ala so angen mingi ate ala so akono.’

‘Na yâ ti use bango li ni, mbi bâ li ti le-kobe mbasambala so alë na abe nzoni. Ala sigigi na tere ti gere ti keke oko. Na peko ti so, mbi bâ li ti le-kobe mbasambala so angen na so ahule kue asigigi nga. Ala so angen amene ala so alë nzoni so.’

Joseph atene na Pharaon: ‘Abango li use so kue aye ti sara tënë ti ye oko. Abagara mbasambala so akono pendere nga li ti le-kobe mbasambala so alë nzoni aye ti tene ngu mbasambala. Abagara mbasambala so angen na ale-kobe mbasambala so angen nga aye ti sara tënë ti ambeni ngu mbasambala nde. Ni la, teti ngu mbasambala, akobe ayeke lë mingi na Égypte. Me teti ambeni ngu mbasambala na pekoni, akobe ayeke lë ande mingi pëpe.’

Joseph atene na Pharaon: ‘Mû mbeni zo ti ndara ti bungbi akobe na gogoro teti ngu mbasambala na ngoi so kobe ayeke lë mingi. Tongaso, tongana ngu mbasambala so na yâ ni kobe alë mingi pëpe aga, azo ayeke kui ande nzara pëpe.’

Tënë ni anzere na Pharaon, na lo mû Joseph ti bungbi akobe ni. Na peko ti Pharaon, Joseph aga zo-ti-komande ti sese ti Égypte so ayeke kota ahon atanga ni kue.

Ngu miombe na pekoni, tongana kota nzara ayeke dä, Joseph abâ ambeni koli aga. Ala yeke azo wa? Ala yeke ayaya ti lo 10! Babâ ti ala Jacob atokua ala na Égypte ti wara kobe, ndali ti so kobe ayeke gue ti hunzi na sese ti Canaan. Joseph agirisa aita ti lo pëpe, me ala, ala girisa lo. Ngbanga ti nyen? Ngbanga ti so lo ga kota koli awe, na lo yü ambeni bongo nde.

Joseph adabe ti lo so tongana lo de lani kete molenge, lo bâ li ti lo so aita ti lo aga akuku na gbele lo. Mo dabe ti mo na mbaï so? Tongaso, Joseph abâ so a yeke Jéhovah si atokua lo na sese ti Égypte, na lo sara ni senge pëpe. Ti mo, Joseph ayeke sara nyen? Zia e bâ ni.