MINGI ti akodoro ti Canaan aleke tere ti ala ti tiri bira na Israël. Ala pensé so ala yeke hon ala na ngangu. Me azo ti kodoro ti Gabaon so ayeke nduru na azo ti Israël abâ ti ala ni tongaso pëpe. Ti ala, Nzapa ayeke mû maboko na azo ti Israël, na ala ye ti tiri na Nzapa pëpe. Tongaso, mo hinga ye so azo ti Gabaon asara?

Ala leke ti sara si a bâ ala tongana azo so alango na mbeni ndo yongoro. Tongaso, ambeni koli ni ayü asurungo bongo nga na asurungo poro. Ala zia agbagbara bozo na ndo ti alele ti ala, na ala mû na tere ti ala akuru mapa. Na pekoni, ala gue na Josué na ala tene: ‘E londo na mbeni ndo so ayo, ngbanga ti so e mä tënë na ndo ti Jéhovah, kota Nzapa ti ala. E mä tënë ti ye kue so lo sara na ala na Égypte. Ni la, amokonzi ti e atene na e ti mû kobe na tere ti e na ti ga ti tene na ala: “E yeke azo ti kua ti ala. Ala mû na e yanga so ala yeke tiri bira na e pëpe.” Tongana ti so ala bâ, bongo asuru na tere ti e kue ndali ti yongoro tambela so, na amapa ti e kue ahule.’

Josué na ambeni mokonzi ti Israël ni ayeda na tënë ti azo ti Gabaon ni. Tongaso, ala mû yanga ti tiri bira na ala pëpe. Me lango ota na pekoni, ala mä so azo ti Gabaon ayeke lango tâ gi nduru na ala.

Josué ahunda na ala, lo tene: ‘Ngbanga ti nyen ala tene na e so ala londo na mbeni kodoro so ayo na e?’

Ala tene: ‘E sara tongaso ngbanga ti so e mä so Jéhovah Nzapa ti ala ayeke mû na ala sese ti Canaan kue. Ni la mbeto asara e so fade ala yeke fâ e kue.’ Me azo ti Israël asara ye alingbi na yanga so ala mû, ala fâ azo ti Gabaon pëpe. Nde na so, ala mû ala tongana azo ti kua ti ala.

Tongana gbia ti Jérusalem amä so azo ti Gabaon amä tere awe na Israël, ngonzo agbu lo mingi. Tongaso, lo tene na ambeni gbia osio: ‘Ala ga amû maboko na mbi ti tiri na Gabaon.’ A yeke ye so agbia oku so asara la. Ndali ti so azo ti Gabaon aduti na siriri na azo ti Israël, agbia so aga fadeso ti tiri bira na ala. Me so azo ti Gabaon asara tongaso, a yeke lege ti ndara la? E yeke bâ ni ande.