MO HINGA ngbanga ti nyen koli so asuru yâ ti bongo ti lo kete kete? Jéhovah la atene na lo ti suru ni. Koli so ayeke mbeni prophète ti Nzapa. Iri ti lo ayeke Ahija. Prophète ayeke nyen? Mo hinga? A yeke zo so Nzapa afa na lo kozoni awe ye so ayeke si ande.

Prophète Ahija ayeke sara tënë ge na Jéroboam. Jéroboam ayeke zo so Salomon azia lo na ndo ti kusala ti lekengo ada nde nde. Tongana Ahija atingbi lo na lege, Ahija asara mbeni ye so zo ahinga li ti lo na ni pëpe. Lo zi fini bongo so lo yü na tere ti lo na lo suru yâ ni 12. Lo tene na Jéroboam: ‘Mû ti mo ayanga ti bongo ni 10.’ Mo hinga ngbanga ti nyen Ahija amû na Jéroboam ayanga ti bongo ni 10?

Ahija afa so Jéhovah ayeke zi royaume ni na tïtî Salomon. Lo tene so Jéhovah ayeke mû akete mara 10 ti Israël na Jéroboam. So ti tene gi akete mara use ti Israël si ayeke ngbâ na Roboam, molenge ti Salomon, ti komande na ndo ti ala.

Tongana Salomon amä tënë so Ahija atene na Jéroboam, ngonzo agbu lo ngangu, si lo gi ti fâ Jéroboam. Me Jéroboam akpe, lo gue na Égypte. Ngoi kete na pekoni, Salomon akui. Lo komande lani ngu 40, na fadeso molenge ti lo Roboam aga gbia na peko ti lo. Kâ na sese ti Égypte, Jéroboam amä so Salomon akui, na lo kiri na Israël.

Roboam ayeke nzoni gbia pëpe. Lo sara sioni mingi na azo ti Israël ahon babâ ti lo Salomon. Tongaso, Jéroboam na ambeni kota zo ti kodoro ni ague abâ gbia Roboam, na ala hunda lo ti sara ye nzoni na azo ti kodoro ni. Me Roboam amä ala pëpe, lo kiri lo sara sioni mingi na azo ni ahon ti kozo. Ye so asara si azo ni amû Jéroboam ti komande na ndo ti akete mara 10 ti Israël, me akete mara ti Benjamin na ti Juda angbâ ti ala na gbe ti komandema ti Roboam.

Jéroboam aye pëpe si azo ti lo ague na Jérusalem ti voro Jéhovah na yâ ti temple ti lo. Tongaso, lo sara ayanda use ti molenge ti bagara ti lor na lo sara si azo ti akete mara 10 ni avoro ayanda so. A ninga pëpe, kodoro ni asi singo na aye ti sioni nga na sarango ngangu na zo.

Aye ti ngangu asi nga na royaume ti akete mara use ni. Kozoni si Roboam asi na ngu oku ni ti komandema ti lo, gbia ti Égypte aga ti tiri na Jérusalem. Lo mû gbâ ti apendere ye ti temple ti Jéhovah, lo gue na ni. Tongaso, temple ni angbâ tongana ti so a leke ni lani gi teti kete ngoi.