NA PEKO ti so David afâ Goliath, Abner, mokonzi ti aturugu ti Israël, aga na lo na gbele Saül. Tere ti Saül anzere mingi ndali ti ye so David asara. Lo zia lo tongana mokonzi na popo ti aturugu ti Israël, na Saül amû lo ti duti na da ti lo mveni.

Na pekoni, aturugu ti Israël akiri ague atiri bira na aPhilistin. Na kiringo ti ala, awali ahe bia, ala tene: ‘Saül afâ azo saki oko, me David afâ ti lo saki bale-oko.’ Tënë so asara si bê asara Saül, ngbanga ti so a gonda David mingi ahon lo. Me Jonathan, molenge ti Saül ti koli, asara kota bê pëpe. Lo ye David mingi, na David nga aye Jonathan mingi. Tongaso, ala use kue amû yanga ti ngbâa lakue akamarade.

David ayeke pika harpe pendere mingi, na Saül aye mozoko so David ayeke pika ka ni. Me mbeni lâ kota bê ti Saül apusu lo ti sara mbeni ye ti sioni. Na ndembe so David ayeke pika harpe, Saül amû likongo ti lo na lo bi ni na mbage ti David, lo tene: ‘Mbi yeke kpo lo na tere ti mur!’ Me David adengi tere ti lo, na likongo ni awara lo pëpe. Mbeni lâ, Saül akiri abi likongo ti kpo David, ti so ni so nga likongo ni awara lo pëpe. Tongaso, David abâ so a lingbi lo sara hange mingi.

Mo dabe ti mo na ye so Saül atene ni yeke mû na zo so ayeke fâ Goliath? Lo tene ni yeke mû na lo molenge ti ni ti wali ti ga wali ti lo. Saül atene na David so lo lingbi ti mû Mical, molenge ti lo ti wali, me kozoni kue a lingbi lo fâ awato ti ala aPhilistin 100 si. Bâ kete si! Saül aye ti lo ti tene aPhilistin afâ David. Me ala fâ lo pëpe, tongaso Saül amû molenge ti lo ti wali ni na David.

Mbeni lâ Saül atene na Jonathan nga na azo ti kua ti lo kue so lo ye ti fâ David. Me Jonathan atene na babâ ti lo, lo tene: ‘Sara sioni na David pëpe. Lo sara sioni na mo lâ oko pëpe. Me ye kue so lo sara amû maboko na mo mingi. Lani so lo fâ Goliath, lo zia fini ti lo na lê ti kuâ, na mo yeke lani na ngia tongana lo fâ Goliath.’

Saül amä molenge ti lo, na lo tene so ni yeke sara sioni na David pëpe. Tongaso, a kiri na David na da ti Saül, na lo sara kusala na tere ti lo tongana ti kozo. Me, mbeni lâ, tongana David ayeke pika mozoko na harpe ti lo, Saül akiri abi likongo ti lo ti kpo David. David adengi tere ti lo si likongo ni akpo mur. Fani ota ni ti tene Saül asara tongaso la! David abâ so ti so ni so a lingbi lo kpe!

Na bï ni so, David ague na da ti lo. Me Saül atokua ambeni zo ti fâ lo. Mical ahinga ye so babâ ti lo aye ti sara na David. Tongaso lo tene na koli ti lo, lo tene: ‘Tongana mo kpe na bï so pëpe, kekereke a yeke wara gi kuâ ti mo.’ Gi na oko bï ni so, Mical amû maboko na David ti sigigi na fenêtre ti kpe. Teti ngu mbasambala tongaso, David ahonde tere ti lo na ando nde nde si Saül awara lo pëpe.