AZO ti Israël nduru na 50 000 asigigi lani na Babylone ti kiri na Jérusalem. Me tongana ala si kâ awe, ala bâ so kodoro ni kue abuba. Zo oko alango dä pëpe. A lingbi azo ti Israël akiri aleke aye kue so ayeke na yâ ni.

Mbeni oko ti aye so ala leke kozoni ayeke mbeni gbalaka. A yeke mbeni ndo so ala lingbi ti mû anyama, wala amatabisi, na sandaga na Jéhovah. Anze kete na pekoni, ala to nda ti leke temple ni. Me awato ti ala so ayeke ti akodoro so ayeke nduru na ala aye si azo ti Israël aleke temple ni pëpe. Tongaso, ala zia mbeto na bê ti azo ti Israël ti tene ala zia lege ti kua ni. Na nda ni, awato ni asara si fini gbia ti Perse asigigi na mbeni ndia so akanga lege na kua ti lekengo temple ni.

Ngu 17 ahon awe ngbene ye so azo ti Israël asigigi na Babylone. Jéhovah atokua aprophète ti lo Aggée na Zacharie ti tene na azo ni ti kiri ti mû kua ti lekengo temple ni. Azo ni azia bê ti ala na Nzapa, na ala mä tënë ti aprophète ni. Ala to nda ti kiri ti leke ni, atâa so mbeni ndia agbanzi ala ti sara ni.

Tongaso, mbeni kota zo ti Perse so iri ti lo ayeke Thathnaï aga ahunda na ala ti fa zo wa si amû yanga na ala ti leke temple ni. Azo ti Israël atene na lo so tongana ala de lani na Babylone, gbia Cyrus atene na ala: ‘Ala gue na Jérusalem, na ala leke temple ti Jéhovah, Nzapa ti ala.’

Thathnaï atokua mbeti na Babylone ti hunda wala gbia Cyrus so akui awe atene lani tongaso. Kete na pekoni, mbeni mbeti alondo na fini gbia ti Perse aga na atene a yeke ye so Cyrus atene lani la. Na yâ ti mbeti ni, fini gbia ni atene na Thathnaï: ‘Zia azo ti Israël aleke temple ti Nzapa ti ala. Mû nga maboko na ala.’ Ngu osio tongaso, azo ti Israël ahunzi ti leke temple ni, na ala yeke na ngia mingi.

Angu mingi ahon. A sara nduru na ngu 48 awe so kua ti lekengo temple ni ahunzi. Azo ti Jérusalem ayeke azo ti mawa, na temple ti Nzapa ayeke pendere mingi pëpe. Esdras, mbeni zo ti Israël so ayeke kâ na Babylone, amä so a lingbi a leke temple ni pendere. Mo hinga ye so lo sara?

Esdras ague abâ Artaxerxès, gbia ti Perse. Lo yeke nzoni gbia, na tongaso lo mû na Esdras amatabisi mingi ti gue na ni na Jérusalem. Esdras ahunda na azo ti Israël so angbâ na Babylone ti mû maboko na lo ti gue na amatabisi so na Jérusalem. Azo 6 000 tongaso atene ala yeke gue. Ala gue na gbâ ti argent na lor nga na ambeni ye so ngere ni ane.

Bê ti Esdras agi lo mingi ngbanga ti so asioni zo ayeke na lege ni. Azo so alingbi ti nzi argent na lor ti ala, nga ti fâ ala. Tongaso, lo iri azo ni kue ti bungbi oko, tongana ti so mo yeke bâ na lê ti foto so. Ala sambela Jéhovah ti bata ala na lege juska ala si na Jérusalem.

Biani, Jéhovah abata ala. Ala si nzoni na Jérusalem na peko ti so ala tambela nze osio na lege. Ye so afa so Jéhovah alingbi ti bata azo so azia bê ti ala kue na lo. Mo bâ ti mo ni tongaso nga?