JÉSUS la ayeke na ndo ti hoto ti akeke ti olive so. Akoli osio so ayeke abazengele ti lo. A yeke André na Pierre, aita, nga Jacques na Jean, so ayeke aita nga. Temple ti Nzapa so ayeke na Jérusalem la mo yeke bâ kâ na gbe ni so.

Jésus alï na Jérusalem na ndo ti molenge ti lele a sara lango use awe. A yeke lango ti mardi, na Jésus ague fade na temple na ndapre ni. Kâ, aprêtre agi fade lege ti gbu lo na ti fâ lo. Me ala sara mbeto ndali ti so azo aye Jésus mingi.

Jésus airi amokonzi-nzapa so angbo nga na amolenge ti angbo. Jésus atene na ala so Nzapa ayeke fâ ngbanga na ndo ti ala ndali ti asioni ye kue so ala sara. Na pekoni, Jésus ague na hoto ti akeke ti olive. Kâ, abazengele ti lo osio so ato nda ti hunda lo na atënë. Mo hinga tënë so ala hunda na Jésus?

Abazengele ni ahunda tënë na lo na ndo ti aye so ayeke si na yâ ti angoi so ayeke ga. Ala hinga so Jésus ayeke zi ande aye ti sioni kue na ndo ti sese. Me ala ye ti ala ti hinga lawa si aye ni so ayeke si. Ala hunda nga ti hinga lawa si Jésus ayeke kiri ande ti ga ti komande tongana Gbia.

Jésus ahinga so adisciple ti lo na ndo ti sese ge alingbi ande ti bâ lo pëpe na ngoi so lo yeke kiri ti ga. Ngbanga ti nyen? A yeke ngbanga ti so lo yeke duti na yayu, na ala lingbi ti bâ lo kâ pëpe. Tongaso, Jésus afa na abazengele ti lo ambeni ye so ayeke si ande na ndo ti sese ge na ndembe so lo yeke komande tongana Gbia na yayu. Ambeni ye ni ayeke nyen?

Jésus afa so akota bira ayeke duti dä, kobela nga na nzara ayeke sara ande azo gbani gbani, azo ayeke sara ande aye ti sioni mingi, nga sese ayeke yengi ande na ando nde nde. Jésus atene nga so a yeke fa nzo tënë ti Royaume ti Nzapa na ndo lê ti sese kue. Aye so kue ayeke si na ngoi ti e? En, a yeke si! Ye so afa na e biani so Jésus aga Gbia na yayu awe. Na yâ ti ngoi kete, lo yeke zi ande aye ti sioni kue na ndo ti sese.