MOLENGE-WALI so ayeke na ngu 12. Jésus agbu maboko ti lo, nga babâ na mama ti molenge ni aluti na tere ti gbogbo ti lo. Mo hinga ngbanga ti nyen tere ti ala anzere mingi tongaso? Zia e bâ.

Babâ ti molenge ni ayeke mbeni kota zo. Iri ti lo ayeke Jaïrus. Mbeni lâ, molenge ni atï kobela si a zia lo na gbogbo. Me tere ti lo akaï pëpe. Kobela ti lo ni ayeke ga gi ngangu. Bê ti Jaïrus na ti wali ti lo ayeke gi na nduzu, ngbanga ti so ala bâ so molenge ti ala ni ayeke gue ti kui. Gi oko molenge ti ala la. Tongaso, Jaïrus ague ti gi Jésus teti lo mä tënë ti amiracle so Jésus ayeke sara.

Tongana Jaïrus awara Jésus awe, gbâ ti azo angoro Jésus. Me Jaïrus alï na popo ti azo ni na lo gue lo tï na gere ti Jésus. Lo tene: ‘Tere ti molenge ti mbi aso mingi. Mbi gbu gere ti mo, ga mo sö lo.’ Jésus atene ni yeke ga.

Tongana ala ngbâ na lege, azo ayeke gbugburu tere ti ga nduru na Jésus. Mo ye ti bâ, Jésus aluti. Lo hunda ndo, lo tene: ‘Zo wa la andu mbi, zo wa?’ Lo hinga so mbeni zo andu lo ngbanga ti so mbeni ngangu asigigi na tere ti lo. Me zo ni so ayeke zo wa? A yeke mbeni wali so ayeke na mbeni kota kobela so a sara ngu 12 na tere ti lo. Lo pusu fade nduru na tere ti Jésus ti ndu bongo ti lo, na kobela ni ahon na tere ti lo!

Ye so adë bê ti Jaïrus, ngbanga ti so lo bâ tongana nyen mbeni kobela ti kara Jésus ayeke dä pëpe. Me mo ye ti bâ, mbeni zo aga atene na Jaïrus, a tene: ‘Hunda na Jésus ti gue kâ senge senge pëpe. Molenge ti mo ni akui awe.’ Jésus amä tënë so, si lo tene na Jaïrus: ‘Gi bê ti mo pëpe, lo yeke ga ande nzoni.’

Tongana ala si na da ti Jaïrus, azo ayeke toto kuâ ni ngangu. Me Jésus atene na ala: ‘Ala toto pëpe. Molenge ni akui pëpe. Lo lango gi langongo.’ Me ala he Jésus, ngbanga ti so ala hinga atene molenge ni akui awe.

Na pekoni, Jésus amû babâ na mama ti molenge ni nga na ambeni bazengele ti lo ota, ala lï na yâ ti chambre so a zia molenge ni dä. Lo gbu maboko ti molenge ni, na lo tene: ‘Londo!’ Molenge ni akiri na fini tongana ti so mo bâ ge. Lo londo lo tambela. Nda ni la si tere ti babâ na mama ti lo anzere mingi tongaso!

Molenge-wali so ayeke kozo zo so Jésus azingo na kuâ la pëpe. Kozo zo ni so Bible asara tënë ni ayeke molenge ti mbeni womua ti kodoro ti Naïn. Na pekoni, Jésus azingo nga Lazare, ita ti Marie na Marthe. Na ngoi so Jésus ayeke komande tongana gbia, lo yeke zingo ande gbâ ti azo na kuâ. Tënë so azia ngia na bê ti e pëpe?