KOLI so akuku na sese so ayeke Étienne. Lo yeke mbeni disciple be-ta-zo ti Jésus. Me bâ ye so asi na lo! Akoli so ayeke bo lo na akota tênë. Ndali ti nyen si ala ke Étienne ngangu tongaso si ala sara ye ti sioni so na tere ti lo so? Zia e bâ.

Nzapa amû maboko na Étienne ti sara amiracle mingi. A nzere na akoli so pëpe, tongaso ala papa na lo ndali ti so lo fa tâ tënë na azo. Me Nzapa amû ndara mingi na Étienne, si Étienne afa so akoli so ayeke fa atënë ti mvene na azo. Ye so akiri azia ngonzo na bê ti ala mingi. Tongaso ala gbu lo, na ala iri azo ti ga ti tene mvene na ndo ti lo.

Kota prêtre ahunda na Étienne, lo tene: ‘Tâ tënë la ala tene so?’ Étienne akiri tënë na ala na fango na ala ye so ayeke na yâ ti Mbeti ti Nzapa na mbeni lege so ayeke pendere mingi. Na hunzingo ni, lo fa tongana nyen asioni zo ake giriri aprophète ti Jéhovah. Na pekoni, lo tene: ‘Ala yeke tâ gi tongana azo so. Ala fâ Jésus, lo so ayeke wakua ti Nzapa, na ala sara ye alingbi na andia ti Nzapa pëpe.’

Ye so asara si lê ti amokonzi-nzapa ni abe na ngonzo na ala te pembe ti ala. Me Étienne ayô li ti lo na nduzu na lo tene: ‘Bâ! Mbi bâ Jésus aluti na koti ti Nzapa na yayu.’ Na mango tënë so, azo ni akanga mê ti ala na ala tuku na ndo ti lo, si ala gbu lo agboto lo, na ala asigigi na lo na yâ ti kodoro ni.

Kâ, ala zi bongo ti ala ti ndo ni na ala mû ni na mbeni maseka-koli so iri ti lo ayeke Saul ti bata ni. Mo bâ Saul ge? Fadeso, azo ni amû atênë ti bo na Étienne. Étienne akuku na sese na lo sambela Nzapa tongana ti so mo bâ na lê ti foto so. Lo tene: ‘Jéhovah, kiri na ala pëpe sioni so ala sara so.’ Lo hinga so a yeke amokonzi-nzapa la si ahanda ambeni na popo ti ala. Na pekoni, Étienne akui.

Tongana mbeni zo asara sioni na mo, mo yeke gi ti kiri ni na lo, wala mo yeke hunda na Nzapa ti kiri sioni so na lo? Étienne na Jésus asara tongaso pëpe. Ala sara nzoni même na azo so asara sioni na ala. Zia e tara ti sara ye tongana ala.