NYEN la asi ge nyen? Sioni asi na molenge-koli so alango na sese so? Bâ! mbeni oko ti akoli so asigigi so ayeke Paul! Mo bâ nga Timothée ge? Molenge ni alondo na lê ti fenêtre si lo tï na sese?

A yeke tâ gi tongaso. Paul ayeke fa tënë fade na adisciple ge na kodoro ti Troas. Lo hinga so lo yeke kiri ti bâ ala mbeni pëpe teti angoi mingi ngbanga ti so lo yeke mû bateau na ndade ni ti gue. Tongaso lo fa tënë na ala juska na bê ti bï.

Iri ti molenge-koli so ayeke Eutyche (Eutychus). Lo duti fade na yanga ti mbeni fenêtre na ota étage ti da ni, na lango ahon na lo si lo londo kâ lo tï na sese. Mo hinga fadeso awe ngbanga ti nyen bê ti azo ni ayeke na nduzu? Tongana ala yô molenge ni na nduzu, andâ lo kui awe!

Tongana Paul abâ so molenge ni akui, lo kuku na ndo ti lo, na lo mû lo na yâ ti maboko ti lo, si lo tene: ‘Ala zia bê ti ala na sese. Lo yeke na fini!’ Tâ tënë, molenge ni akiri na fini. Paul la asara miracle so! Bê ti azo ni kue ayeke na ngia.

Ala kue akiri na yâ ti da ni na nduzu na ala te kobe. Paul angbâ ti fa tënë juska ndo ahan. Me ti so ni so, kite ayeke pëpe so Eutyche akiri alango pëpe! Na pekoni, Paul, Timothée na azo so ague legeoko na ala amû bateau ala hon. Mo hinga ndo so ala yeke gue dä?

Paul ahunzi ota tambela ti lo ni awe na lo yeke kiri na kodoro. Ti so ni, lo ngbâ lo oko na kodoro ti Ephèse ngu ota. Tongaso, ota tambela ni aninga ahon ti use ni.

Tongana Paul amû bateau na Troas, bateau ni ague aluti na Milet teti kete ngoi. Ndali ti so Ephèse ayo na Milet mingi pëpe, Paul atokua yanga na a-ancien ti kongregation ti Ephèse ti ga ti wara lo na Milet si lo lingbi ti sara lisoro na ala ti tanga ni. Na pekoni, tongana bateau ni aye ti hon, vundu asara aita ti Ephèse mingi ti bâ Paul na hongo ni.

Na nda ni, bateau ni asi na Césarée. Paul ague alango na da ti disciple Philippe. Na ndembe so lo ngbâ kâ, prophète Agabus aga atene na Paul so tongana lo si na Jérusalem a yeke kanga ande lo. A yeke ye so asi biani. Lo sara ngu use na kanga na Césarée. Na pekoni, a tokua lo na Rome na gbele César, gbia ti Rome, ti tene a fâ ngbanga na ndo ti lo. Zia e bâ ye so asi na lo na lege ti guengo na Rome.