1, 2. Nyen la e lingbi ti sara ti ngbâ na yâ ti ndoye ti Nzapa?

E KUE e ye ti kpengba nga ti duti na nzoni seni. Ni la e yeke gi ti te nzoni kobe, ti sara sport lakue nga ti bâ lege ti terê ti e nzoni. Atâa so aye so ahunda ti sara ngangu, anzoni ye ti peko ni anzere na e, ni la e ngbâ ti sara ni. Me e bezoin nga ti kpengba nga ti duti na nzoni seni na mbeni lege nde.

² E komanse awe ti hinga Jéhovah, na so ayeke mbeni nzoni tongo nda ni. Me a lingbi e sara si songo ti e na Jéhovah angbâ lakue ti kpengba. Tongana Jude awa aChrétien ti “ngbâ na yâ ti ndoye ti Nzapa”, lo fa tongana nyen la ala lingbi ti sara ni. Lo tene na ala: “Ala sara si ala wani ala kpengba na ndö ti fondation ni so ayeke mabe ti ala so ayeke nzoni ahon tanga ti aye kue.” (Jude 20, 21). Tongaso, tongana nyen la e lingbi ti sara si mabe ti e akpengba?

3-5. (a) Satan aye ti tene e bâ aye so Jéhovah ahunda na e ti sara tongana nyen? (b) Mo bâ andia nga na amama-ndia ti Jéhovah tongana nyen?

³ A yeke kota ye ti tene mo duti na kite oko ape so fason ti sarango ye ti Jéhovah ayeke nzoni mingi. Satan aye ti  tene mo pensé so aye so Nzapa ahunda na e ti sara ahon ngangu ti e nga so mo yeke duti na ngia mingi tongana mo mû desizion mo wani na ndö ti ye so ayeke na lege ni nga na ye so ayeke na lege ni ape. Ngbene ye na yaka ti Éden ti ga na ni, Satan agi ti sara si azo ayeda na tënë so (Genèse 3:1-6). Lo yeke sara nga ngangu mingi laso ti sara si azo ayeda na ni.

⁴ Eskê Satan ayeke na raison? Eskê aye so Jéhovah ahunda na e ti sara akanga lege na e ngangu? Ên-ën. Na tapande, imaginé so mo yeke tambela na yâ ti mbeni pendere ndo. Mo bâ mbeni yongoro gbagba so akanga lege na mo ti gue na mbeni place na ndo so mo yeke tambela dä. Peut-être mo hunda terê ti mo: ‘Ngbanga ti nyen la gbagba so akanga lege na mbi?’ Me na ngoi so mo yeke hunda terê ti mo, mo mä go ti mbeni bamara so ayeke toto na mbage ti gbagba ni. Mo yeke pensé nyen fadeso na ndö ti gbagba ni? Mo yeke kiri singila so gbagba ni abata mo si bamara ni ate mo ape so. Amama-ndia ti Jéhovah ayeke tongana gbagba so, na Zabolo ayeke tongana bamara ni. Bible awa e, atene: “Ala bata bibe ti ala, zia lê ti ala akpengba. Wato ti ala Zabolo ayeke tambela tongana mbeni bamara so ayeke toto, na lo yeke gi mbeni zo ti te lo.”​—1 Pierre 5:8.

⁵ Jéhovah aye ti tene e duti na mbeni fini so ayeke pendere mingi. Lo ye ti tene Satan ahanda e ape. Ndani la lo lu na e andia na amama-ndia ti bata e nga ti sara si e duti na ngia (aÉphésien 6:11). Jacques atene: “Zo so ayôro lê ti lo na yâ ti ndia so ayeke mbilimbili-kue, ndia ti liberté, na lo ngbâ dä . . . lo yeke duti ande na ngia na yâ ti aye so lo yeke sara.”​—Jacques 1:25.

6. Tongana nyen la e lingbi ti hinga biani so fason ti sarango ye ti Jéhovah ayeke nzoni mingi?

⁶ Tongana e sara ye so Jéhovah afa na e ti sara, fini ti e  ayeke ga nzoni mingi nga songo ti e na lo ayeke kpengba mingi. Na tapande, e yeke wara aye ti nzoni mingi tongana e yeda ti sambela Jéhovah fani mingi tongana ti so lo hunda na e (Matthieu 6:5-8; 1 aThessalonicien 5:17). Tongana e mä yanga ti Jéhovah e bungbi ndo oko ti voro lo, e kpengba mba, e fa tënë nga e fa ye alingbi na ngangu ti e, e yeke duti na ngia mingi (Matthieu 28:19, 20; aGalate 6:2; aHébreu 10:24, 25). Tongana e gbu li ti e na ndö ti lege so aye so amû maboko na e ti ngbâ ti kpengba mabe ti e, e yeke hinga biani so fason ti sarango ye ti Jéhovah ayeke nzoni mingi.

7, 8. Nyen la ayeke mû maboko na e ti gi bê ti e ape na ndö ti atara so e lingbi ti wara ande na yâ ti angoi so ayeke ga?

⁷ E lingbi ti gi bê ti e so na yâ ti angoi so ayeke ga, mbeni ye ayeke tara mabe ti e na a yeke duti ngangu mingi na e ti  gbu lê ni. Tongana mbeni lâ mo pensé tongaso, girisa atënë ti Jéhovah so ape: “Mbi Jéhovah, mbi yeke Nzapa ti mo. Mbi la mbi yeke fa ye na mo ti tene mo bâ nzoni dä. Mbi la mbi yeke fa na mo lege so a yeke nzoni mo mû ni. Tongana fade mo dengi mê na acommandement ti mbi, ka siriri ti mo ayeke ga tongana kota ngu, mbilimbili ti mo ayeke duti tongana amapo ti ngu-ingo.”​—Ésaïe 48:17, 18.

⁸ Tongana e mä yanga ti Jéhovah, siriri ti e ayeke ga tongana kota ngu so ayeke hule ape nga mbilimbili ti e ayeke duti tongana amapo ti ngu-ingo so ayeke ga lakue na yanga ti ngu. Atâa nyen la asi na yâ ti fini ti e, e lingbi ti duti be-ta-zo. Bible atene: “Aye so ane mo, mo bi ni na ndö ti Jéhovah, na lo yeke mû ngangu na mo. Lo yeke zia lâ oko pëpe si zo ti mbilimbili atï.”​—Psaume 55:22.

9, 10. Ti duti biazo aye ti tene nyen?

⁹ Na ngoi so songo ti mo na Jéhovah ayeke kpengba, mo yeke “sara kue ti ga biazo”. (aHébreu 6:1). Ti ga biazo aye ti tene nyen?

¹⁰ Ngu ti zo la ayeke sara si lo ga biazo ape. Ti tene e ga biazo, a lingbi e sara si Jéhovah aga kota Kamarade ti e nga e gi ti bâ aye tongana ti so lo yeke bâ na ni (Jean 4:23). Paul atene: “Ala so ayeke sara ye alingbi na mitele abi bê ti ala na ndö ti aye ti mitele, me ala so ayeke sara ye alingbi na yingo abi bê ti ala na ndö ti aye ti yingo.” (aRomain 8:5). Aye so ayeke kota ye na yâ ti fini ti zo so ayeke biazo ayeke pëpe angia wala aye ti sese. Me lo yeke zia li ti lo na ndö ti kua ti Jéhovah nga lo soro aye na lege ti ndara na yâ ti fini ti lo. (aProverbe 27:11; diko Jacques 1:2, 3.) Lo zia pëpe si azo apusu lo ti sara sioni ye. Zo so ayeke biazo ahinga ye so ayeke na lege ni nga lo leke na bê ti lo ti ngbâ ti sara ni.

11, 12. (a) Paul atene nyen na ndö ti “ngangu ti gbungo li” ti mbeni Chrétien? (b) Tongana nyen la ti ga mbeni Chrétien so ayeke biazo ayeke tongana gango mbeni zo ti sarango sport?

 ¹¹ A lingbi zo asara ngangu si lo ga biazo. Bazengele Paul atene: “Kpengbango kobe ayeke ti abiazo, azo so, na lege ti sarango kusala na ngangu ti gbungo li ti ala, asara si ngangu ti gbungo li ti ala ni aga nzoni awe ti hinga popo ti ye ti nzoni na ye ti sioni.” (aHébreu 5:14). Tënë ti Grec so a kiri peko ni na tënë ‘asara si a ga nzoni awe’ aye ti tene “a fa kode ti sarango mbeni ye na zo awe.” A lingbi ti sara si e pensé na mbeni zo ti sarango sport so a fa ye na lo.

¹² Tongana e bâ mbeni kpengba zo ti sarango sport so ayeke sara sport, e hinga so a mû ngoi nga a fa ni na lo fani mingi ni la lo sara ni nzoni. A dü lo lani zo ti sarango sport ape. Na ngoi so a dü mbeni bébé, lo hinga mbilimbili pëpe tongana nyen ti sara kua na amaboko ti lo nga na agere ti lo. Me ambeni ngoi na pekoni, lo yeke manda ti gbu ye nga ti tambela. Tongana a fa ye na lo, lo lingbi ti ga mbeni zo ti sarango sport. Legeoko nga, ti tene e ga aChrétien so ayeke abiazo, a mû ngoi nga a lingbi a fa ye na e.

13. Nyen la ayeke mû maboko na e ti manda ti pensé tongana Jéhovah?

¹³ Na yâ ti mbeti so, e bâ tongana nyen la e lingbi ti pensé tongana Jéhovah nga ti bâ aye tongana ti so lo bâ na ni. E manda awe ti bâ aye so Jéhovah ahunda na e ti sara na nene ni nga ti ye ni. Na ngoi so e yeke mû adesizion, e yeke hunda terê ti e: ‘Andia wala amama-ndia ti Bible wa la alingbi na ye so? Tongana nyen la mbi lingbi ti sara ye alingbi na ni? Nyen la Jéhovah aye ti tene mbi sara?’​—Diko aProverbe 3:5, 6; Jacques 1:5.

14. Tongana e ye ti tene mabe ti e akpengba, a lingbi e sara nyen?

¹⁴ E yeke ngbâ lakue ti kpengba mabe ti e na Jéhovah. Gï tongana ti so tengo anzoni kobe ayeke sara si e kpengba,  ti manda ye na ndö ti Jéhovah ayeke kpengba mabe ti e. Na ngoi so e komanse ti manda Bible lani, e manda akpengba tâ tënë na ndö ti Jéhovah nga fason ti sarango ye ti lo. Me tongana ngoi ayeke hon, e bezoin ti hinga ambeni ye so ndani alï mingi. A yeke ye so Paul aye ti tene tongana lo tene: “Kpengbango kobe ayeke ti abiazo.” Tongana e sara ye alingbi na aye so e manda, e yeke wara ndara. Bible atene na e, atene: “Ndara ayeke kota ahon tanga ti aye kue.”​—aProverbe 4:5-7; 1 Pierre 2:2.

15. Ngbanga ti nyen la a yeke kota ye ti ye biani Jéhovah nga na aita ti e?

¹⁵ Mbeni zo alingbi ti duti na ngangu nga lo yeke na nzoni seni, me ti ngbâ tongaso, lo hinga so lo doit ti ngbâ ti bâ lege ti lo wani nzoni. Legeoko nga, zo so ayeke biazo ahinga so lo doit ti sara ngangu ti tene songo ti lo na Jéhovah angbâ ti kpengba. Paul adabe ti e, atene: “Ala ngbâ ti bâ terê ti ala ti bâ wala ala yeke na yâ ti mabe, ala ngbâ ti bâ terê ti ala ti bâ wala ala wani ala yeke tongana nyen.” (2 aCorinthien 13:5). Ye oko, e bezoin aye mingi ahon ti duti gï na kpengba mabe. Yengo so e ye na Jéhovah nga na aita ti e adoit ti ngbâ ti maï. Paul atene: “Tongana . . . mbi hinga ye kue, tongana mbi yeke na mabe kue ti zi ahoto ti zia na mbeni ndo nde, me mbi yeke na ndoye pëpe, mbi yeke ye oko pëpe.”​—1 aCorinthien 13:1-3.

16. Satan aye ti tene e pensé nyen?

¹⁶ Satan aye ti tene e pensé so atâa nyen la e sara, e lingbi lâ oko ape ti nzere na lê ti Jéhovah. Lo ye ti tene e découragé na e bâ so mbeni lege ti leke na akpale ti e ayeke dä ape. Lo ye pëpe ti tene e sara confiance na amba ti e aChrétien, nga lo ye pëpe ti tene e duti na ngia (aÉphésien 2:2). Satan ahinga so asioni pensé alingbi ti sara sioni  na e nga na songo ti e na Nzapa. Me Jéhovah amû na e mbeni ye ti mû maboko na e ti hon ndö ti asioni pensé. Lo mû na e beku.

17. Beku ti e ayeke kota ye ngbanga ti nyen?

¹⁷ Na 1 aThessalonicien 5:8, Bible ahaka beku ti e na casque so ayeke bata li ti mbeni turugu na yâ ti bira, na a iri casque so “beku ti salut”. Ti duti na beku na azendo ti Jéhovah alingbi ti bata bibe ti e nga ti mû maboko na e ti ke asioni pensé.

18, 19. Beku akpengba lani Jésus tongana nyen?

¹⁸ Beku ti Jésus akpengba lani lo. Na ndangba bï ti fini ti lo na sese, lo tingbi lani na angangu kpale na peko ti terê. Mbeni kota kamarade ti lo akä lo. Mbeni abere même atene ni hinga lo ape. Ambeni adö lo azia akpe. Azo ti kodro ti lo wani alondo na terê ti lo, ala hunda ti tene a sara pasi na lo juska na kuâ. Nyen la amû lani maboko na lo ti gbu ngangu na yâ ti aye so ason mingi so? Bible atene: “Ndali ti  ngia so a zia na gbele lo, lo gbu ngangu juska lo kui na ndö ti keke ti pasi, lo bi kamene yongoro, na fadeso lo duti na terê ti trône ti Nzapa na mbage ti koli.”​—aHébreu 12:2.

¹⁹ Jésus ahinga lani so tongana lo ngbâ be-ta-zo, lo yeke mû gloire na Babâ ti lo nga lo yeke fa so Satan ayeke zo ti mvene. Beku so aga lani na lo kota ngia. Lo hinga nga lani so na yâ ti ngoi kete lo yeke kiri ti bungbi oko na Babâ ti lo na yayu. Beku so amû maboko na lo lani ti gbu ngangu. E doit ti zia li ti e na ndö ti beku ti e tongana ti Jésus. Beku ti e ayeke mû maboko na e ti gbu ngangu atâa nyen la asi.

20. Nyen la alingbi ti mû maboko na mo ti duti na nzoni bango ndo?

²⁰ Jéhovah abâ mabe so mo yeke na ni nga na gbungo ngangu ti mo. (Ésaïe 30:18; diko Malachie 3:10.) Lo mû zendo ti “mû na mo aye so bê ti mo asara nzara ni.” (Psaume 37:4). Tongaso, zia li ti mo na ndö ti beku ti mo. Satan aye ti tene mo perdre beku ti mo nga mo bâ so  azendo ti Jéhovah ayeke ga tâ tënë lâ oko ape. Me zia pëpe si asioni pensé ahon ndö ti mo. Tongana mo bâ so beku ti mo ayeke tâ ye na lê ti mo tongana ti kozo ape, hunda Jéhovah ti mû maboko na mo. Girisa ape atënë so ayeke na aPhilippien 4:6, 7: “Ala gi bê ti ala na ndö ti mbeni ye pëpe, me na yâ ti aye kue, na lege ti sambela, na lege ti vorongo terê na Nzapa nga na sambela ti kiringo singila, ala hunda na Nzapa aye so agbu bê ti ala, na fade siriri ti Nzapa so ahon ndö ti bibe kue ayeke bata bê ti ala nga na lege ti hingango ndo ti ala na lege ti Christ Jésus.”

21, 22. (a) Nyen la Jéhovah aleke na bê ti lo ti sara ndali ti sese? (b) Nyen la mo leke na bê ti mo ti ngbâ ti sara?

²¹ Mû ngoi lakue ti gbu li na ndö ti apendere ye so ayeke na devant. Fafadeso, azo kue so ayeke na fini ayeke voro Jéhovah (Apocalypse 7:9, 14). Gbu li na ndö ti fini na yâ ti fini dunia. A yeke duti ande nzoni mingi ahon aye kue so e lingbi ti imaginé! Satan, asioni yingo ti lo nga na asioni ye kue ayeke duti ande dä encore ape. Terê ti mo ayeke son ape nga mo yeke kui ande ape. Me lâ oko oko, mo yeke zingo na lango mo yeke na ngangu mingi nga mo yeke duti na ngia ti duti na fini. Azo kue ayeke sara kua maboko na maboko ti sara si sese aga mbeni paradis. Azo kue ayeke wara anzoni kobe ti te nga na nzoni ndo ti lango. Azo ayeke duti ande pëpe asioni zo wala azo ti sarango aye ti ngangu na zo, me azo ayeke duti ande azo so asara ye na nzoni bê mingi na amba ti ala. Ande, azo kue na ndö ti sese ayeke wara “liberté ti gloire ti amolenge ti Nzapa.”​—aRomain 8:21.

²² Jéhovah aye ti tene mo sara si lo ga kota Kamarade ti mo. Tongaso, sara ye kue so mo lingbi ti sara ti mä yanga ti Jéhovah nga ti ga nduru mingi na lo lâ oko oko. Zia e kue e ngbâ na yâ ti ndoye ti Nzapa lakue lakue.​—Jude 21.