Azo so aye Jéhovah Nzapa nga na Mbeti ti lo, Bible:

Jésus atene: “Ala yeke hinga ande tâ tënë, na tâ tënë ayeke zi ala.” (Jean 8:32). Na ngoi so mo hinga lani tâ tënë ti Bible pan asara mo lani tongana nyen? A nzere lani na mo mingi ti hinga so na yâ ti dunia so amvene ahon ndö ni, e lingbi ti manda tâ tënë.​—2 Timothée 3:1.

Jéhovah Nzapa aye ti tene e hinga tâ tënë. Na ndö ni, ndali ti so e ye azo, e ye ti fa tâ tënë na ala. Me ti sara na Nzapa andu aye mingi. A lingbi e sara kue ti sara ye tongana aChrétien ndali ti so e ne amama-ndia ti Jéhovah ngangu. Jésus afa na e mbeni kpengba ye so e lingbi ti sara ti fa na Nzapa so e ye lo. Lo tene: “Tongana ala bata acommandement ti mbi, ala yeke ngbâ na yâ ti ndoye ti mbi, tongana ti so mbi bata acommandement ti Babâ na mbi ngbâ na yâ ti ndoye ti lo.”​—Jean 15:10.

Jésus aye biani Babâ ti lo, nga lo sara ye kue so Babâ ti lo ahunda na lo ti sara. Tongana e mû tapande ti Jésus na yâ ti fason so e yeke vivre na ni, Jéhovah ayeke ye e nga e yeke duti biani na ngia. Jésus atene: “Tongana ala hinga aye so, ala yeke duti na ngia tongana ala sara ye alingbi na ni.”​—Jean 13:17.

E yeke na confiance so mbeti so ayeke mû maboko na mo ti manda ti sara ye alingbi na tâ tënë ti Bible nga ti ga kamarade ti Nzapa. E sambela ti tene mo kiri mo ye Nzapa mingi nga mo ngbâ “na yâ ti ndoye ti Nzapa . . . si [mo] wara fini ti lakue lakue.”​—Jude 21.