1, 2. Nyen la a lingbi e hinga na ndö ti Satan nga na asioni yingo?

NA YÂ ti fini dunia ti Nzapa, gigi ayeke duti ande pendere mingi. Na nda ni, e yeke vivre ande tongana ti so Nzapa aye lani ti tene e vivre na ni. Me ti laso e yeke na yâ ti dunia so Satan na asioni yingo ti lo la akomande ni (2 aCorinthien 4:4). Atâa so e lingbi ti bâ ala ape, ala yeke dä nga ala yeke ngangu mingi.

² Na yâ ti chapitre so, e yeke bâ tongana nyen la e lingbi ti ngbâ nduru na Jéhovah nga tongana nyen ti bata terê ti e si Satan asara sioni na e ape. Jéhovah amû zendo so lo yeke mû maboko na e. Me a lingbi e hinga akode so Satan nga na asioni yingo ayeke sara na kua ti handa na e nga ti sara sioni na e.

3. Nyen la Satan aye ti sara na e?

³ Satan atene so azo ayeke voro Jéhovah gï ti wara anzoni ye na pekoni nga ala yeke zia lege ti vorongo Lo tongana aye aga ngangu mingi na ala. (Diko Job 2:4, 5.) Tongana mbeni zo afa so lo ye ti manda ye na ndö ti Jéhovah, Satan nga na asioni yingo ayeke bâ ni, na ala yeke gi ti kanga lege na lo. Tongana mbeni zo amû terê ti lo na Jéhovah nga lo wara  batême ngonzo ayeke sara ala. Bible ahaka Zabolo na “mbeni bamara so ayeke toto, na lo yeke gi mbeni zo ti te lo.” (1 Pierre 5:8). Satan aye ti buba songo ti e na Jéhovah.​—Psaume 7:1, 2; 2 Timothée 3:12.

4, 5. (a) Nyen la Satan alingbi ti sara ape? (b) Tongana nyen la e lingbi ti “luti na Zabolo”?

⁴ Me e bezoin ti sara mbeto ti Satan na asioni yingo ti lo ape. Ye kue la Jéhovah azia lege na ala ti sara na e ape. Jéhovah amû zendo so “azo mingi mingi” so ayeke atâ Chrétien ayeke sö kuâ ande na ngoi ti “kota ye ti  vundu”. (Apocalypse 7:9, 14). Satan alingbi ti sara ye oko ape ti kanga lege na ye so ti si ndali ti so Jéhovah ayeke bata azo ti Lo.

⁵ Tongana e ngbâ nduru na Jéhovah, Satan alingbi pëpe ti buba yâ ti songo ti e na Jéhovah. Bible adë bê ti e, atene: “Jéhovah ayeke na ala na ngoi kue so ala ngbâ na lo.” (2 Chronique 15:2; diko 1 aCorinthien 10:13.) Gbâ ti akoli na awali ti giriri so ayeke be-ta-zo, na tapande, Abel, Hénok, Noé, Sara nga na Moïse, aluti lani na Zabolo na lege so ala ngbâ nduru na Jéhovah (aHébreu 11:4-40). E lingbi ti sara nga tongaso. Bible atene: “Ala luti na Zabolo, na lo yeke kpe ande yongoro na ala.”​—Jacques 4:7.

6. Satan ayeke tiri na e tongana nyen?

⁶ Atâa so Satan ahinga so Jéhovah azia pëpe lege na lo ti sara ye kue na e, lo ngbâ ti gi ti sara aye kue so lo lingbi ti sara ti woko yâ ti songo ti e na Nzapa. Laso Satan ayeke tiri na e na alege nde nde, nga lo yeke sara kua na akode so lo sara kua na ni teti angu saki mingi awe. Ambeni kode ni ayeke so wa?

7. Ngbanga ti nyen la Satan ayeke tiri na awakua ti Jéhovah?

⁷ Bazengele Jean atene: “Dunia so kue ayeke na gbe ti Zo ti sioni.” (1 Jean 5:19). Dunia so ayeke na gbe ti komandema ti Satan na lo ye nga ti komande na ndö ti awakua ti Jéhovah (Michée 4:1; Jean 15:19; Apocalypse 12:12, 17). Zabolo ahinga so ngoi so angbâ na lo ayeke mingi ape, ni la lo yeke pusu e ngangu ti duti be-ta-zo na Nzapa ape. Na ambeni ngoi lo yeke tiri na e vîi vîi tongaso, me na ambeni ngoi lo yeke tiri na e tâ gï yeke.

8. Nyen la a lingbi Chrétien oko oko kue ahinga?

 ⁸ A-Éphésien 6:12 atene: “E yeke tiri [“tiri ti pongo,” kete tënë na gbe ni] . . . na asioni yingo so ayeke na yayu.” Chrétien oko oko kue ayeke tiri na Zabolo nga na asioni yingo. A lingbi e hinga so azo kue so amû terê ti ala na Jéhovah ayeke na yâ ti tiri so. Na yâ ti lettre so Paul atokua na aChrétien ti Éphèse, lo wa ala fani ota ti “luti ngangu”.​—aÉphésien 6:11, 13, 14.

9. Nyen la Satan nga na asioni yingo agi ti sara na e?

⁹ Satan na asioni yingo agi ti handa e na alege mingi. Gï so e luti na Satan na yâ ti mbeni ye oko aye pëpe ti tene so lo lingbi pëpe ti hon e na ngangu na yâ ti mbeni ye nde. Zabolo ayeke gi ando so e woko dä tongaso si lo lingbi ti soro akûkû ti gbu na e. Me a lingbi e zia si Zabolo agbu e ape ndali ti so Bible afa na e akûkû ti lo (2 aCorinthien 2:11; bâ Kete tënë 31). Mbeni kûkû ni ayeke aye ti asioni yingo.

10. (a) Aye ti asioni yingo ayeke nyen? (b) Jéhovah abâ ni tongana nyen?

¹⁰ Aye ti asioni yingo ayeke aye so asara si zo ayeke na songo na asioni yingo, na tapande aye tongana fango aye so ayeke si ande na zo, likundu, sarango sioni na zo na lege ti yorö wala gingo ti sara lisoro na akuâ. Bible atene na e so aye ti asioni yingo ayeke “sioni mingi” nga so e lingbi pëpe ti sara ni nga na oko ngoi ni e voro Jéhovah (Deutéronome 18:10-12; Apocalypse 21:8). A lingbi aChrétien akpe aye kue so andu aye ti asioni yingo.​—aRomain 12:9.

11. Ti gi ti hinga ye na ndö ti aye ti ndima ayeke gue na e na ndo wa?

¹¹ Satan ahinga so tongana aye ti ndima agbu bê ti e, a yeke duti ngangu na lo ape ti gboto e na yâ ti aye ti  asioni yingo. Ye kue so andu aye ti asioni yingo ayeke buba songo ti e na Jéhovah.

12. Satan aye ti sara ngangu na ndö ti pensé ti e tongana nyen?

¹² Ye so Satan aye ayeke ti sara si pensé ti azo aga kirikiri. Lo yeke sara ni na lege so lo yeke dü kite yeke yeke na yâ ti bê ti azo juska ala pensé so “nzoni ye ayeke sioni nga sioni ye ayeke nzoni”. (Ésaïe 5:20). Zabolo ayeke maï na yâ ti li ti azo so awango ti Bible ayeke nzoni ape nga so e yeke duti na ngia mingi tongana e sara sanka ti aye so Nzapa ahunda na e ti sara.

13. Tongana nyen la Satan agi lani ti dü kite na bê ti azo?

¹³ Dungo kite na yâ ti bê ti azo ayeke mbeni kode so Satan asara kua na ni nzoni mingi. Lo sara kua na ni teti angu mingi awe. Na yaka ti Éden, lo gi lani ti dü kite na yâ ti bê ti Ève na ngoi so lo hunda lo, lo tene: “Tâ tënë, Nzapa atene ala te lê ti akeke kue ti yaka so ape?” (Genèse 3:1). Ambeni ngu na pekoni, na ngoi ti Job, Satan ahunda Jéhovah na devant ti a-ange, lo tene: “A yeke senge la Job akpe mbeto ti Nzapa so?” (Job 1:9). Na peko ti batême ti Jésus, Satan atara lo na lege so lo tene: “Tongana mo yeke mbeni molenge ti Nzapa, tene na atênë so ti ga mapa.”​—Matthieu 4:3.

14. Tongana nyen la Satan alingbi ti sara si azo ahunda terê ti ala wala aye ti asioni yingo ayeke biani sioni?

¹⁴ Laso, Zabolo angbâ ti dü kite na bê ti azo. Lo yeke gi ti sara si azo ayeke hunda terê ti ala wala aye ti asioni yingo ayeke biani sioni na lege so lo yeke sara si ambeni ye ti asioni yingo akpa mbeni ye so ayeke sioni ape. Même ambeni Chrétien abâ pëpe akpale ti peko ti aye ti asioni yingo (2 aCorinthien 11:3). Tongaso, nyen la e lingbi ti sara ti bata terê ti e? Tongana nyen la e lingbi  ti sara kue si Satan ahanda e pëpe na aye so lo yeke sara na kua ti handa na e? Zia e bâ ambeni ye use so lo yeke sara na kua ti handa na e: angia nga na kode ti kaïngo na kobela.

15. Tongana nyen la na lege ti angia e lingbi ti sara aye ti asioni yingo?

¹⁵ Laso, gbâ ti afilm, avidéo, akuasinga ti télé, angia ti vidéo nga na asite Internet ayeke fa aye ti asioni yingo, aye ti magie nga na aye ti ndima. Azo mingi abâ aye so tongana angia so asara sioni na zo ape nga ala hinga pëpe kpale so ala lingbi ti wara so ala zia si asioni yingo alï na yâ ti fini ti ala so. Mbeni zo alingbi ti komanse ti sara aye ti asioni yingo na lege ti aye tongana matanga ti place kuâ, yungo deuil nga na zingo deuil, mungo asandaga na akuâ wala langongo na place ti kuâ. Zabolo ahonde kpale ti peko ti aye so nga lo gi ti sara si aye so akpa aye so ahon gbungo li ti zo anzere na zo. Mbeni zo alingbi même ti pensé so tongana lo sara aye ti asioni yingo wala aye ti ndima vrai tongaso ape, a yeke sioni ape ti bâ ni. Ngbanga ti nyen la pensé so ayeke sioni?​—1 aCorinthien 10:12.

16. Ngbanga ti nyen la a lingbi e ke angia so a fa aye ti ndima na yâ ni?

¹⁶ Satan na asioni yingo alingbi pëpe ti hinga ye so ayeke na yâ ti li ti e. Me ala lingbi ti hinga aye so e ye nga fason so e yeke pensé na ni na lege so ala bâ aye tongana angia so e soro ndali ti e wani nga na azo ti sewa ti e. Afilm, abia nga na ambeti ayeke dä so asara tënë ti azo so asara tënë na yingo ti akuâ, ti sarango sioni na zo na lege ti yorö, ti azo so asioni yingo ayeke na yâ ti ala,  ti azo ti likundu, ti azo so anyon mênë ti azo wala ti ambeni ye tongaso. Tongana e soro angia so aye so ayeke na yâ ni, Satan nga na asioni yingo ayeke hinga so e ye ti hinga ye na ndö ti ala. Na pekoni, ala lingbi même ti gi ti pusu e ti lï mingi na yâ ti sarango aye ti asioni yingo.​—Diko aGalate 6:7.

17. Tongana nyen la Satan alingbi ti wara go na ndö ti nzara so e yeke na ni ti duti na nzoni seni?

¹⁷ Satan alingbi nga ti wara go na ndö ti nzara so e yeke na ni ti duti na nzoni seni. Laso, azo mingi ayeke na nzoni seni ape. Mbeni zo alingbi ti tara akode nde nde ti kaïngo na kobela, me gbä (Marc 5:25, 26). Lo  lingbi même ti découragé nga lo yeke nduru ti tara akode kue. Me ti e aChrétien, a lingbi e sara hange si e soro pëpe akode ti kaïngo na kobela so andu sarango “magie”.​—Ésaïe 1:13.

18. Akode ti kaïngo na kobela wa la a lingbi Chrétien ake ni?

¹⁸ Na ngoi ti Israël ti giriri, azo ti sarango “magie” ayeke lani dä. Jéhovah atene na ala, atene: “Tongana ala yâa maboko ti ala na nduzu, mbi yeke kanga lê ti mbi si mbi bâ ala pëpe. Même tongana ala sambela gbani, mbi yeke mä pëpe.” (Ésaïe 1:15). Gbu gï li kete, Jéhovah ayeke mä même sambela ti ala ape! E ye pëpe ti sara mbeni ye so alingbi ti buba songo ti e na Jéhovah nga so alingbi ti sara si lo mû maboko na e ape, mbilimbili na ngoi so terê ti e ason (Psaume 41:3). Tongaso, a lingbi e gi ti hinga wala kode ti kaïngo na kobela so e pensé ti sara kua na ni ague oko na mbeni ye ti asioni yingo wala ye ti ndima wala pëpe (Matthieu 6:13). Tongana e bâ so peut-être a gue oko na ni, a lingbi e ke ni.​—Bâ Kete tënë 32.

19. Nyen la asara si azo mingi asara mbeto ti Zabolo?

¹⁹ Atâa so ambeni zo apensé so Zabolo na asioni yingo ayeke dä ape, ambeni nde ahinga ti ala so ala yeke dä biani ndali ti aye so asi na ala wani. Mbeto ti asioni yingo asara ambeni zo mingi nga ala ga angbâa ti angobo so ayeke tâ tënë ape. Ambeni zo ayeke sara si mbeto ti asioni yingo amû ndo na lege so ala yeke fa peko ti aye so ayeke sioni mingi so asioni yingo asara na azo. Fani mingi, atënë tongaso anzere na azo mingi nga anzere na ala ti fa peko ni na ambeni zo. Mingi ni, ambaï so asara si azo asara mbeto ti Zabolo.

20. E lingbi ti sara si amvene ti Satan amû ndo tongana nyen?

 ²⁰ Gbu li na ndö ti ye so: Satan aye ti tene azo asara mbeto ti lo (2 aThessalonicien 2:9, 10). Lo yeke zo ti mvene so ahinga ti sara ngangu na ndö ti pensé ti azo so aye tënë ti aye ti asioni yingo nga lo yeke sara si ala mä na bê na aye so ayeke biani tâ tënë ape. Azo ni so alingbi ti fa peko ti aye so ala pensé so ala bâ ni wala ala mä ni. Tongana azo afa peko ti ambaï ni so mingi, ala yeke kono yâ ti tënë ni ngangu. E ye pëpe ti mû maboko na Satan ti sara si mbeto ti lo amû ndo na lege so e yeke fa peko ti ambaï so.​—Jean 8:44; 2 Timothée 2:16.

21. A hon ti sara tënë na ndö ti aye so asioni yingo asara, e lingbi ti sara tënë na ndö ti nyen?

²¹ Tongana asioni yingo asara lani mbeni ye na mbeni wakua ti Jéhovah, lo yeke tene pëpe peko ni ti tene anzere na azo. A lingbi awakua ti Jéhovah asara pëpe mbeto ti mbeni ye so Zabolo na asioni yingo ti lo alingbi ti sara. Me a lingbi e zia li ti e na ndö ti Jésus nga na ngangu so Jéhovah amû na lo (aHébreu 12:2). Jésus atene lani pëpe ambaï na ndö ti asioni yingo ti tene anzere na adisciple ti lo. Lo gboto lani lê ti ala na ndö ti tënë ti Royaume nga na “apendere ye so Nzapa asara.”​—Kusala 2:11; Luc 8:1; aRomain 1:11, 12.

22. Nyen la mo leke na bê ti mo ti ngbâ ti sara?

²² Zia e girisa ape so Satan aye ti buba songo ti e na Jéhovah. Lo yeke sara kue ti sara ni. Me e hinga akode ti Zabolo nga e leke na bê ti e ti ngbâ ti ke aye ti asioni yingo kue. E yeke “zia lege na Zabolo pëpe” ti woko yâ ti ye so e leke na bê ti e ti ngbâ ti sara. (Diko aÉphésien 4:27.) Biani, tongana e luti na Zabolo, e yeke tï pëpe na yâ ti akûkû ti lo nga Jéhovah ayeke bata e.​—aÉphésien 6:11.