1, 2. Ngbanga ti nyen la mo ndoye Jéhovah Nzapa?

MO NDOYE Nzapa? Peut-être mo ndoye lo mingi la mo mû terê ti mo na lo. Peut-être mo bâ so lo yeke kota Kamarade ti mo. Me même kozo ti tene mo ndoye Jéhovah, lo ndoye mo awe. Bible atene: “E yeke na ndoye, ngbanga ti so lo ndoye e kozoni.”​—1 Jean 4:19.

² Gbu li na ndö ti alege kue so Jéhovah afa so lo ndoye e. Lo mû na e sese so ayeke pendere ndo ti tene e duti dä nga na aye kue so e bezoin ni ti duti na ngia na yâ ti fini ti e (Matthieu 5:43-48; Apocalypse 4:11). Lo ye ti tene e duti na nzoni songo na lo nga lo mû lege na e ti manda ye na ndö ti lo. Na ngoi so e yeke diko Bible, e yeke mä Jéhovah. Nga, na ngoi so e sambela, lo yeke mä e (Psaume 65:2). Lo yeke fa lege na e nga lo yeke kpengba e na lege ti yingo vulu ti lo so ayeke ngangu mingi (Luc 11:13). Lo tokua même Molenge ti lo so lo ye lo mingi na sese ti zi e na gbe ti siokpari na kuâ.​—Diko Jean 3:16; aRomain 5:8.

3. Tongana nyen la e yeke ngbâ ti duti na nzoni songo na Jéhovah?

³ Gbu li kete na ndö ti mbeni kota kamarade ti mo, mbeni kamarade so ayeke na terê ti mo na yâ ti angoi  ti ngia nga na angoi ti vundu. Ti ngbâ ti duti na mara ti kpengba songo tongaso, a hunda ti sara ngangu. A hunda nga ti sara ngangu tongaso ti ngbâ ti duti na songo na Jéhovah, so ayeke kota Kamarade ahon atanga ni kue. Songo ti e ti kamarade na lo alingbi ti ngbâ lakue lakue. Tongaso, Bible atene: “Ala ngbâ na yâ ti ndoye ti Nzapa.” (Jude 21). E lingbi ti sara ni tongana nyen? Bible akiri tënë, atene: “Ndoye ti Nzapa ayeke so: e bata acommandement ti lo; me acommandement ti lo ayeke ye so ane pëpe.”​—1 Jean 5:3.

4, 5. (a) “Ndoye ti Nzapa” aye ti sara tënë ti nyen? (b) Ndoye ti mo na mbage ti Jéhovah akomanse lani ti maï tongana nyen?

⁴ Tongana Bible atene “ndoye ti Nzapa”, a ye ti sara tënë ti nyen la? A ye pëpe ti sara tënë ti ndoye so Nzapa andoye na e, me ti ndoye so e ndoye na lo. Mo dabe ti mo na kozo ngoi so mo komanse ti ndoye Jéhovah?

⁵ Na ngoi so ti kozoni mo manda so Jéhovah aye ti tene mo duti na fini lakue lakue na yâ ti fini dunia, a sara mo lani tongana nyen? Mo dabe ti mo na ni? Mo manda lani ye na ndö ti aye kue so lo sara ti mû lege na azo ti duti na yâ ti fini dunia, nga mo comprendre so cadeau so Jéhovah amû na e so lo tokua Molenge ti lo na sese ayeke ye ti ngangu ngere (Matthieu 20:28; Jean 8:29; aRomain 5:12, 18). Na ngoi so mo hinga tongana nyen la Jéhovah aye mo mingi, a ndu bê ti mo na mo komanse ti ndoye lo nga.​—Diko 1 Jean 4:9, 10.

6. Ti ye mbeni zo aye ti tene nyen? Yengo so mo ye na Nzapa apusu mo ti sara nyen?

⁶ Me so mo bâ lani so mo komanse ti ndoye Nzapa ayeke gï tongo nda ni la. Na tapande, tongana e ye  mbeni zo, e yeke sara aye mingi ahon gï ti tene na yanga: “Mbi ye mo.” Yengo so e ye na zo ni apusu e ti sara aye so anzere na lo. Legeoko nga, yengo so mo ye na Jéhovah apusu mo ti duti na fini so anzere na lo. Na ngoi so ndoye so ayeke maï lani na bê ti mo, peut-être mo mû terê ti mo na lo nga mo wara batême. So mo sara tongaso, mo mû zendo ti sara na Jéhovah teti lakue lakue. (Diko aRomain 14:7, 8.) Tongana nyen la mo lingbi ti sara ye alingbi na zendo so?

7. Tongana e ye Jéhovah, nyen la e yeke sara? Ambeni commandement ti lo ayeke so wa?

⁷ Ndali ti so e ye Jéhovah, “e bata acommandement ti lo”. E yeke sara ni tongana nyen? E yeke sara ni na mango yanga ti lo. Bible afa na e fason so Jéhovah aye ti tene e vivre na ni. Na tapande, lo tene na e so a yeke sioni ti soulé, ti nzi wala ti tene mvene, ti bungbi koli na wali na mbeni zo so e sara mariage na lo ape wala ti voro mbeni zo wala mbeni ye nde na lo.​—1 aCorinthien 5:11; 6:18; 10:14; aÉphésien 4:28; aColossien 3:9.

8, 9. Tongana nyen la e yeke hinga ye so Jéhovah aye ti tene e sara na yâ ti aye so mbeni mbilimbili ndia ti Bible ayeke na ndö ni ape? Mû mbeni tapande ti fa ni.

⁸ Me ti nzere na Jéhovah, a lingbi e sara aye mingi ahon gï ti sara ye alingbi na acommandement ti lo. Lo mû na e pëpe mbeni yongoro molongo ti andia so asara tënë na ndö ti aye kue na yâ ti fini ti e. Tongaso, a yeke si so na yâ ti ambeni ye, mbeni mbilimbili ndia ti Bible ayeke dä pëpe so afa na e mbeni ye ti sarango ni. Tongana nyen la e lingbi ti mû anzoni desizion? (aÉphésien 5:17). Na yâ ti Bible e yeke na amama-ndia,  so ayeke atâ tënë so afa na e fason so Jéhovah ayeke bâ na aye. Nga tongana e diko Bible, e yeke hinga Jéhovah nzoni. E yeke hinga fason so lo yeke pensé na ni, na a sara si e hinga aye so lo ye nga na aye so lo ke.​—Diko Psaume 97:10; aProverbe 6:16-19; bâ Kete tënë 1.

⁹ Na tapande, tongana nyen la e yeke mû desizion na ndö ti ye so e ye ti bâ na télé wala na ndö ti Internet? Jéhovah afa na e pëpe mbeni mbilimbili ye so e doit ti sara. Me amama-ndia so lo lu ayeke mû maboko na e ti mû anzoni desizion. Sarango ye ti ngangu na zo nga na bungbingo koli na wali ayeke mingi na yâ ti angia laso. Na yâ ti Bible, Jéhovah atene na e so “lo ke zo kue so aye sarango ye ti ngangu na zo” nga so lo yeke “fâ ngbanga ande na li ti azo ti sarango lango-sioni”. (Psaume 11:5; aHébreu 13:4). Tongana nyen la amama-ndia so alingbi ti mû maboko na e ti mû anzoni desizion? Tongana e hinga so Jéhovah ake mbeni ye wala lo bâ ni tongana sioni ye, e doit ti ke ni.

10, 11. E yeke mä yanga ti Jéhovah ngbanga ti nyen?

¹⁰ E yeke mä yanga ti Jéhovah ngbanga ti nyen? E yeke mä yanga ti Jéhovah gï pëpe ti kpe ti tene lo punir e wala ti kpe akpale so ayeke ga na peko ti mungo asioni desizion (aGalate 6:7). Me e yeke mä yanga ti Jéhovah ndali ti so e ye lo. Gï tongana ti so amolenge aye ti zia ngia na bê ti babâ ti ala, e nga e ye ti zia ngia na bê ti Babâ ti e ti yayu. Mbeni ye so ayeke nzoni mingi ahon hingango so e zia ngia na bê ti Jéhovah ayeke dä ape.​—Psaume 5:12; aProverbe 12:2; bâ Kete tënë 2.

¹¹ E yeke mä yanga ti Jéhovah gï pëpe na ngoi so a yeke ngangu ape ti sara ni wala na ngoi so mbeni ye nde ti sarango ni ayeke dä ape. E yeke soro sorongo  pëpe andia nga na aye so Nzapa ahunda so e yeke sara ye alingbi na ni (Deutéronome 12:32). Me e yeke mä yanga ti lo na bê ti e kue tongana ti mbeni zo ti sungo psaume so atene: “Acommandement ti mo agbu bê ti mbi mingi, mbi ye ni mingi.” (Psaume 119:47; aRomain 6:17). E ye ti sara ye tongana Noé, so afa so lo ye Jéhovah na lege so lo sara ye kue so Jéhovah ahunda na lo ti sara. Bible atene so Noé ‘asara gï tongana ti so a hunda.’ (Genèse 6:22). Mo ye ti tene Jéhovah atene tongaso na ndö ti mo?

12. Tongana nyen la e lingbi ti zia ngia na bê ti Jéhovah?

¹² Tongana e mä yanga ti Jéhovah ayeke sara lo tongana nyen? E yeke zia “ngia na bê” ti lo (aProverbe 11:20; 27:11). Gbu gï li kete na ndö ni! E yeke sara si Lo so asara aye kue aduti na ngia tongana e mä yanga ti lo. Me lo gbu e lâ oko ape na ngangu ti sara ni. Lo mû na e liberté ti soro ye. So aye ti tene so e yeke na liberté ti soro ti sara nzoni ye wala sioni ye. Jéhovah aye ti tene yengo so e ye na lo apusu e ti mû anzoni desizion tongaso si e lingbi ti duti nzoni mingi na yâ ti gigi ti e.​—Deutéronome 30:15, 16, 19, 20; bâ Kete tënë 3.

13, 14. Tongana nyen la e hinga so ti sara ye alingbi na acommandement ti Nzapa ahon ngangu ti e ape? Mû mbeni tapande ti fa ni.

¹³ Ka tongana e pensé so ti sara ye alingbi na acommandement ti Jéhovah ahon ngangu ti e wala e pensé so acommandement ni asara si e yeke duti na liberté ape? Bible atene polele, atene: “Acommandement ti lo ayeke ye so ane pëpe.” (1 Jean 5:3). A sara kua na tënë ti Grec so a kiri peko ni na “ane” na yâ ti ambeni versê ti sara tënë ti andia so ayeke na lege ni ape wala ti azo  so asara ye na lege ni ape, so agi ti komande na ndö ti amba ti ala nga ti sara sioni na ala (Matthieu 23:4; Kusala 20:29, 30). Acommandement ti Jéhovah “ane” ape, so ti tene, ti sara ye alingbi na ni ahon ngangu ti e ape. Jéhovah ayeke sara ye lakue na lege ni na yâ ti aye so lo hunda na e.

¹⁴ Na tapande, imaginé so mo yeke mû maboko na mbeni kamarade ti mo ti gue na fini ndo ti lo. Lo zia aye ti lo kue na yâ ti acarton. Ambeni carton ni ane ape nga a yeke ngangu ape ti yô ni, me ambeni ane mingi na azo use la alingbi ti yô ni. Eskê kamarade ti mo ni ayeke hunda na mo ti yô mo oko mbeni carton so ane mingi? Ên-ën. Ngbanga ti nyen? Ngbanga ti so lo ye ti tene sioni asi na mo ape. Legeoko tongana ti kamarade so, Jéhovah ayeke hunda lâ oko ape na e ti sara mbeni ye so ahon ngangu ti e (Deutéronome 30:11-14). Jéhovah ahinga e. Lo “hinga nzoni mingi lege so a leke na e, lo dabe ti lo so e yeke fuku ti sese.”​—Psaume 103:14.

15. Ngbanga ti nyen la e lingbi ti hinga na bê ti e kue so acommandement ti Jéhovah ayeke ndali ti nzoni ti e?

¹⁵ Moïse atene lani na azo ti Israël so ala yeke “bâ nzoni lakue” na lege ti acommandement ti Jéhovah nga tongana ala sara ye alingbi na ni ala yeke “ngbâ na fini”. (Deutéronome 5:28-33; 6:24). A yeke nga tongaso laso. Ye kue so Jéhovah ahunda na e ti sara ayeke sara si gigi ti e aduti nzoni mingi. (Diko Ésaïe 48:17.) Jéhovah, Babâ ti e, ahinga lakue ye so ayeke nzoni mingi ndali ti e (aRomain 11:33). Bible atene: “Nzapa ayeke ndoye.” (1 Jean 4:8). So ti tene ye kue so Jéhovah atene nga lo sara, a yeke ndoye la apusu lo ti tene ni nga ti sara ni.

16. E hinga tongana nyen so e lingbi ti mä yanga ti Nzapa atâa so e yeke mbilimbili-kue ape nga e yeke na yâ ti sioni dunia?

 ¹⁶ A yeke lakue kete ye ape ti mä yanga ti Nzapa. E yeke na yâ ti sioni dunia so Zabolo la akomande ni. Lo yeke gi ti pusu azo ti sara sioni ye (1 Jean 5:19). Nga, e yeke tiri na apensé nga na atënë ti bê ti e so ayeke mbilimbili-kue ape ndali ti so alingbi ti sara si e ke yanga ti Nzapa (aRomain 7:21-25). Me yengo so e ye na Jéhovah amû ngangu na e ti sara ye so ayeke na lege ni. Lo yeke bâ ngangu so e yeke sara ti mä yanga ti lo nga lo mû maboko na e na lege ti yingo vulu ti lo so ayeke ngangu mingi (1 Samuel 15:22, 23; Kusala 5:32). Yingo vulu ayeke mû maboko na e ti duti na asarango ye so asara si a yeke ngangu na e ape ti mä yanga ti lo.​—aGalate 5:22, 23.

17, 18. (a) Nyen la e yeke manda na yâ ti mbeti so? (b) Nyen la e yeke sara tënë na ndö ni na yâ ti chapitre ti peko?

¹⁷ Na yâ ti mbeti so, e yeke manda tongana nyen ti duti na fini so azia ngia na bê ti Jéhovah. E yeke manda tongana nyen ti sara ye na yâ ti fini ti e alingbi na amama-ndia ti lo nga na andia ti nzoni sarango ye so lo lu. Girisa ape so Jéhovah agbu e lâ oko ape na ngangu ti mä yanga ti lo. Tongana e soro ti mä yanga ti Nzapa, gigi ti e ayeke ga nzoni nga e yeke duti na pendere beku. Ye so ayeke kota mingi ayeke so mango yanga ti Nzapa ayeke fa na lo so e ye lo mingi.​—Bâ Kete tënë 4.

¹⁸ Ti mû maboko na e ti hinga ye so ayeke nzoni nga na ye so ayeke sioni, Jéhovah amû na e oko oko kue conscience. Tongana e fa lege na conscience ti e, a yeke mû maboko na e ti “bata acommandement ti lo”. Tongaso, conscience ti e ni ayeke nyen? Tongana nyen la e lingbi ti fa lege na ni? Zia e bâ ni.